އިންސްޓާގްރާމަކީ މުޅި ދުނިޔޭގައިވެސް ފުރާވަރު އުމުރުގެ ކުދިންގެ މެދުގައި މަގުބޫލު އެޕްއެކެވެ. ރާއްޖޭގައިވެސް ހަމަ އެހާމެ މަގުބޫލެވެ.
އެޕް ބޭނުންކުރާ ކުޑަކުދިންގެ ރައްކާތެރިކަން ކަށަވަރުކުރުމާ ބެހޭ ގޮތުން އިންސްޓަގްރާމްގެ ބާނީ އެޑަމް މޮސެއިރީ ނެރުނު ބަޔާނުގައި ބުނެފައި ވަނީ އިންސްޓަގްރާމަށް ގެންނަ ބަދަލުތަކުގެ މަގްސަދަކީ އެޕް ބޭނުންކުރަމުންދާ ކުޑަކުދިންނަށް ރައްކާތެރި މާހައުލެއް ގާއިމް ކުރުމެވެ.
އެ އެޕް ބޭނުންކޮށްގެން އެކަށީގެންނުވާ ކަމަކާމެދު މައުލޫމާތު ހޯދުމުގައި މާގިނަ ވަގުތު ހޭދަކުރާނަމަ ކޮންމެވެސް އެހެން ދިމާއަކަށް އެކުދިން ޝައުގުވެރިކަން ބަދަލުކުރުމަށްޓަކައި އޮޓޯއިން އެޑްސް ފޮނުވާނެ އިންތިޒާމް ހަމަޖެހިގެންދާނެއެވެ.
މީގެ އިތުރުން އެ ކުދިން ފޮލޯ ނުކުރާ މީހުންނަށް އެކުދިންގެ އެކި ޕޯސްޓްތަކުގައި ޓެގްކުރުމާއި މެންޝަން ކުރުން ފަދަ ކަންކަން ނުކުރެވޭ ގޮތަށް ހަދާނެ އެވެ،
އިންސްޓަގްރާމް ބޭނުންކުރާ ފުރާވަރު ކުދިންނާއި ކުޑަކުދިންނަށް އެ ކުދިންގެ ޕޯސްޓްތަކުގެ ދަށުގައި ހުންނަ ކޮމެންޓުތައް އެއްފަހަރާ ޑިލީޓްކޮށްލެވޭ ގޮތްވެސް ހަމަޖައްސަން އިންސްޓަގްރާމުންވަނީ ނިންމާފައެވެ. މިހާރު މި އެޕްގައި ޖެހެނީ ފަހަރަކު ކޮމެންޓެއް ވަކިވަކިން ބަލައިގެން ޑިލީޓްކުރާށެވެ. ކުޑަކުދިންގެ ޕޯސްޓްތަކުގެ ދަށުގައި ހުންނަ ކޮމެންޓްތައް އެކުދިން ކިޔަމުން ވަކިވަކިން ޑިލީޓްކުރަން ޖެހުމަކީ އެކުދިންނަށް ނަފްސާނީ ގޮތުން ގެއްލުން ލިބުން އެކަށީގެންވާކަމެކެވެ.
އިންސްޓާގްރާމް ބޭނުންކުރުމުގައި ވަކިވަރަކަށްވުރެ ގިނަ ވަގުތު ހޭދަކުރާނަމަ ހުސްވަގުތު ކޮޅެއް ނެގުމަށް ހަނދުމަކޮށްދޭ ފީޗާއެއް ވެސް ތައާރަފްކުރުމަށް ވަނީ ނިންމާފައެވެ. "ޓޭކް އަ ބްރޭކް" ފީޗާގެ ދަށުން އިންސްޓަގްރާމްގައި އެމީހަކު ހޭދަކުރާ ވަގުތު ދެނެގަނެވޭނެއެވެ. އަދި މާގިނަ ވަގުތު ހޭދަކުރަމުންދާ ނަމަ ނޮޓިފިކޭޝަންއެއްގެ ޒަރިއްޔާއިން އެކަން އެ މީހަކަށް އެންގޭނެ އެވެ.
ހަމަ އެގޮތަށް ކުޑަކުދިން އިންސްޓަގްރާމް ބޭނުންކުރާ މިންވަރު ބެލެނިވެރިންނަށް ބެލެހެއްޓޭނެ ހަމަޖައްސަން ވަނީ ނިންމައިފަ އެވެ. ކުއްޖާ އެޕް ބޭނުންކުރުމުގައި ހޭދަކޮށްފައިވަނީ ކިހާ ވަގުތެއްތޯ ބެލޭނެ އިންތިޒާމާއެކު ވަކި ހައްދެއްގެ ދަށުން އެޕް ބޭނުންކުރުމަށް ބާރު އަޅައިދޭ ފީޗާއެއްވެސް ގާއިމް ކުރެވޭނެއެވެ.
މިބަދަލުތަކަކީ އެކި ފަރާތްތަކުގެ ލަފާ އާއި މަޝްވަރާ ހޯދައިގެން ގެންނަން ނިންމާފައިވާ ބަދަލުތަކެކެވެ. އިންސްޓާގްރާމުން ވަނީ މީގެ ކުރިންވެސް "އިންސްޓްގްރާމް ފޯ ކިޑްސް" ގެ ނަމުގައި މިފަދަ ޕްރޮގްރާމްއެއް ފަށާފައެވެ. ނަމަވެސް މީހުންގެ ފާޑުކިޔުންތަކުގެ ސަބަބުން އެ ކުންފުނިން ވަނީ އެ ޕްރޮގްރާމް މިއަހަރުގެ ސެޕްޓެމްބަރު މަހު ހުއްޓާލާފައެވެ.
އިންސްޓާގްރާމްގެ ތަރުޖަމާނު ބުނެފައިވާ ގޮތުގައި މިޕްރޮޖެކްޓު ވެސް އަލުން ފެށުމަށް އެ ކުންފުނިން އަންނަނީ ތައްޔާރުވަމުންނެވެ. މިފަދަ ކޮންމެ އެޕަކީ އެ ބޭނުންކުރުމުގައި ކުޑަކުދީންނަށް ވަރަށް ބޮޑަށް ރައްކާތެރި ވާންޖެހޭ އެޕްތަކެކެވެ.
