ތިރީހުގެ އަހަރުތަކަށް އަޅާއިރު ބުރަަކަށީގެ ރިހުމެއް, ތަދެއް ނުހުންނަ މީހަކު އަހަރެމެންގެ ތެރޭގައި މަދުވާނެ އެވެ. މިކަހަލަ ތަދު ތަކަށް، ކަސްރަތާއި, ޑޮކްޓަރީ ފަރުވާއާއި ފަތްޕިލާވެލީގެ ބޭސް ކުރާ މީހުން ވެސް އެހާ ގިނަ އެވެ. ނަމަވެސް މި ފަހުން ސައިންސްވެރިން މިވަނީ ބުރަކަށީގެ ތަދު ފިލުވުމަށް ސައިކޮލޮޖިކަލް، ނުވަތަ ނަފްސާނީ ފަރުވާއެއް ހޯދާފަ އެވެ.
އެމެރިކާގެ ޔުނިވާސިޓީ އޮފް ކޮލޮރާޑޯ އަށް ނިސްބަތްވާ ސައިންސްވެރިންތަކެއް ހޯދި މި ފަރުވާ އަށް ދީފައިވާ ނަމަކީ ޕެއިން ފްރީ ޕްރޮސެސިން ތެރަޕީ (ޕީއާރްޓީ) އެވެ. މި ދިރާސާ ގެ ރިޕޯޓު، ނަފްސާނީ އެކި މައްސަލަތަކާއި ގުޅޭ ދިރާސާތަކާއި ލިޔުންތައް ޝާއިރުކުރާ ބައިނަލްއަގުވާމީ ޖާނަލްއެއް ކަމުގައިވާ ޖާމާ ސައިކޭޓްރީގައި ވެސް ޝާއިއުކޮށްފައި ވެއެވެ.
އެ ރިޕޯޓުގައި ފާހަގަކޮށްފައިވާ ގޮތުން، ޕީއާރްޓީ ފަރުވާ ދެވުނު ތިންބައި ކުޅަ ދެބައި މީހުންނަށް ވަނީ ފަރުވާގެ އެހީގައި ބުރަކަށީގެ ތަދު އެއްކޮށް ނުވަތަ ވަރަށް ބޮޑަށް ފިލުވާލެވިފަ އެވެ.
ޕީއާރުޓީ އަކީ، ހަތަރު ހަފްތާއަަށް ދިގުދެމިގެންދާ ނަފްސާނީ ފަރުވާ އެކެވެ. ފަރުވާގެ އަސަރު، އަހަރު ދުވަހަށް ދެމި ހުންނަ ކަމަށް ވެސް އެ ރިޕޯޓުގައި ބުނެފައިވެ އެވެ.
ބުރަކަށީގެ އާންމު ތަދަކީ ހަށިގަނޑުގައި މަސްތަކާއި ކަށިތަކުން ދިމާވާ ކަމެއް ކަމަށް މީގެ ކުރިން ހީވެފައި އޮތް ނަމަވެސް ޕީއާރުޓީގެ ނަމުގައި ދޭ މި ފަރުވާ، އަމާޒުކުރަނީ ސިކުނޑި އަށެވެ. ސައިކޮލޮޖީ އާއި ނިއުރޯސައިންސްގެ ދާއިރާއިން ޕީއެޗްޑީ ހާސިލްކުރަމުން މި ދިރާސާ ލީޑްކުރި ޔޯނީ އަޝާރު ބުނިގޮތުގައި ހަށިގަނޑަށް އެއްވެސް އިންޖަރީ އަކާއި ނުލައިވެސް ސިކުނޑިން ”ތަދު“ ޖެނެރޭޓް ކޮށްފާނެ އެވެ. އަދި މިފަދަ ތަދުތައް ހުންނަ މީހުންގެ 85 އިންސައްތަ މީހުންނަށް ގިނަ ދުވަސްތަކަކަށް ދިގުދެމިގެންދާހެން މިކަން މެދުވެރިވަނީ ސީދާ ކީއްވެގެންކަން ބުނެދޭން އުނދަގޫވާކަން އޭނާ ފާހަގަކުރި އެވެ. އަދި މިފަދަ ތަދުތައް ދިމާވާ ގަޑިތަކުގައި އެ ތަދު ކޮންޓްރޯލް ކުރުމަށް ހަށިގަނޑުގެ ބައެއް ނާރުގެ ނިޒާމުތައް އޯވާ ރިއެކްޓް ކުރާ ހާލަތު އަންނަ ކަން ވެސް އޭނާ ފާހަގަކޮށްފައި ވެއެވެ.
އެހެންކަމުން، އަޝާރު ބުނާގޮތުން ހަށިގަނޑުގެ ތަނެއްގައި ހުންނަ ރިހުމަކީ އިންޒާރުގެ ސިގްނަލެއް ކަމުގައިވާނަމަ މިފަދަ ޕްރައިމަރީ ތަދު ނުވަތަ ސަބަބު ނޭގި ދިމާވާ ތަދުތަކަކީ ނިއްވާނުލެވި އަބަދުވެސް ”އޮން“ ވެ އެގޮތުގައި ހުއްޓިފައި ހުންނަ ސްވިޗެއް ފަދަ އެއްޗެކެވެ. ޕީއާރްޓީ ފަރުވާ އިން މި ދަސްކޮށްދެނީ އެ އެލާމު ނުވަތަ ސްވިޗު ނިއްވާލުމަށް ކަމަށް އޭނާ ވަނީ ބުނެފަ އެވެ.
މި ފަރުވާގައި ވިސްނައިދެނީ ތަަދަކީ ސޭފް އެއްޗެއް ކަން. އޭގެ ސަބަބުން ތަދު ބޮޑުކުރުމުގެ ބަދަލުގައި ނިއުޓްރަލައިޒް ކުރުމަށް ސިކުނޑިން މަސައްކަތްކުރޭ“
ގައިގައި ރިއްސާ މިފަދަ ހުރިހާ ރިހުންތަކަކީ ސިކުނޑިއާ ގުޅިފައިވާ ރިހުންތަކެއް ނޫނެވެ. އެހެންވީމަ، ޕީއާރުޓީ އަކީ ވެސް ބުރަކަށީގެ ހުރިހާ ރިހުމަކަށް ދެވޭނެ ފަރުވާ އަކަށް ނުވެ ވެސް ދާނެ އެވެ.
ފަރުވާގެ ކުރިންނާއި ފަހުންވެސް ދިރާސާގެ ބައިވެރިންވަނީ ތަދު އިހުސާސްކުރުމަށް ސިކުނޑި މަސައްކަތްކުރާ ގޮތް ދެނެގަތުމަށްޓަކައި ފަންކްޝަނަލް ރެސޮނަންސް އިމޭޖިން ނުވަތަ އެފްއެމްއާރްއައި ހަދާފަ އެވެ. މިއިން އެނގުނު ގޮތުގައި ފަރުވާގެ ފަހުން 66 އިންސައްތަ މީހުންގެ ތަދު ވަނީ މުޅިން އެއްކޮށް ފިލާފަ އެވެ.
