އިންޑިއާގެ ހުޅަނގު މަހަރާޝްތްރަ ސްޓޭޓުގައި މާބަނޑު ދައްތަގެ ބޯ ބުރިކޮށްލި ކަމަށް ތުހުމަތު ކުރެވޭ ފުރާވަރު އުމުރުގެ ކުއްޖަކު ހައްޔަރުކޮށްފި އެވެ.
އުމުރުން 19 އަހަރުގެ އަންހެން މީހާ ކައިވެނިކޮށްފައި ވަނީ އާއިލާގެ ނުރުހުމުގައި ކަމަށް ފުލުހުން ބުންޏެވެ. އޭނާ އަށް ހަމަލާ ދިނީ މަންމަ އާއި ފިރިހެން ކޮއްކޮ އަށް ސައި ހަދަން ހުއްޓަ އެވެ.
ދަނޑުތަކުގައި ބޭނުން ކުރާ ފަދަ ބޮޑު ވަޅިއަކުން ހަމަލާ ދިނުމަށް ފަހު މަންމަ އާއި ފިރިހެން ކޮއްކޮ އަމިއްލަ އަށް ފުލުހުންނާ ހަވާލުވި އެވެ.
ފުލުހުން ތުހުމަތު ކުރާ ގޮތުގައި އަންހެން މީހާގެ ބޯ ބުރިއާ އެކު އެ ދެ މީހުން ސެލްފީ ވެސް ނެގި އެވެ.
ފިރިހެން ކޮއްކޮ އަކީ އުމުރުން 18 އަހަރު ނުވާ ކުއްޖެއް ކަމަށް އޭނާގެ ވަކީލު ބުނަން ފެށުމުން މިހާރު ވަނީ ކުށްކުރާ ކުދިން ބަހައްޓާ ހާއްސަ މަރުކަޒަކަށް ބަދަލުކޮށްފަ އެވެ.
ނަމަވެސް ފުލުހުން ބުނީ އޭނާ އަށް އުމުރުން 18 އަހަރުވެފައިވާކަން ސާބިތުވާ ލިޔުންތައް ފެނިފައި ވާތީ އެކަން ކޯޓަށް ހުށަހަޅައި، ޖަލަށް ބަދަލުކުރާނެ ކަމަށެވެ.
އެ މީހުންގެ މަންމަ ހުރީ ފުލުހުންގެ ބެލުމުގެ ދަށުގަ އެވެ. އެ ހާދިސާ ހިނގީ އައުރަންގްއާބާދު ޑިސްޓްރިކްޓުގައި ކަމަށް ބީބީސީ އިން ރިޕޯޓުކުރެ އެވެ.
އުމުރުން 19 އަހަރުގެ އަންހެން މީހާ ލޯބީގެ ގޮތުން ގުޅިގެން އުޅުނު މީހަކާ އެކު ގެއިން ފިލީ މިދިޔަ ޖޫން މަހު އެވެ. އެއަށްފަހު އާއިލާގެ ނުރުހުމުގައި ކައިވެނި ކުރި އެވެ.
ދެ މީހުން ވެސް ނިސްބަތް ވަނީ އިންޑިއާގެ ހިންދޫންގެ މެދުގައި ގެންގުޅޭ ދަރަޖަ ކުރުމުގެ ނިޒާމުގެ ތެރެއިން އެއް ދަރަޖައަކަށް ނަމަވެސް ފިރިހެން މީހާގެ އާއިލާ ފަގީރެވެ.
ކައިވެނީގެ ފަހުން އަންހެން މީހާ އާއިލާއާ މާ ބޮޑު ގުޅުމެއް ނުބާއްވަ އެވެ. ނަމަވެސް އެ ހާދިސާގެ ހިނގުމުގެ ހަފުތާއެއް ކުރިން އޭނާގެ މަންމަ އަށް ޒިޔާރަތް ކުރި ކަމަށް ވެ އެވެ. ފުލުހުން ބުނީ އަންހެން މީހާ ބަލިވެއިންކަން މަންމަ އަށް އެނގޭ ކަމަށެވެ.
ލަފާކުރެވޭ ގޮތުގައި ކޮންމެ އަހަރަކު ވެސް އާއިލާގެ ނުރުހުމުގައި ލޯބީގެ ގުޅުން ހިންގައިގެން ނުވަތަ ކައިވެނިކޮށްގެން އެތައް ސަތޭކަ ބަޔަކު އިންޑިއާގައި މަރާލަ އެވެ.
