ޔަމަނުގެ ހޫތީ ހަނގުރާމަވެރިން ދިން ބެލިސްޓިކް މިސައިލް ހަމަލާއަކަށް ރައްދު ދިނުމުގެ ގޮތުން ސައުދީ އަރަބިއްޔާ އިން ވެރިރަށް ސަނާ އަށް ވައިގެ ހަމަލާތައް ދީފި އެވެ.
ހޯމަ ދުވަހުގެ ރޭ ދަންވަރު ސައުދީ އަސްކަރީ ކޯލިޝަނުން ދިން ހަމަލާތަކުގައި ބެލިސްޓިކް މިސައިލް ލޯންޗު ކުރަން ހޫތީން ބޭނުންކުރި ސައިޓު ވަނީ ހަލާކުކޮށްލާފަ އެވެ.
"ބެލިސްޓިކް މިސައިލާއި ޑްރޯން ލޯންޗު ކުރަން ސަނާގައި ހުރި ސައިޓުތައް އަޅުގަނޑުމެން ހަލާކުކޮށްލައިފިން،" ސައުދީ ނިއުސް އެޖެންސީ އެސްޕީއޭ އިން ކުރި ޓްވީޓެއްގައި ބުންޏެވެ.
އޭގެ ކުރިން އެސްޕީއޭ އިން ބުނީ ޔަމަނުގެ ހޫތީ ހަނގުރާމަވެރިން ސައުދީ ފަސްގަނޑަށް އަމާޒުކޮށް ފޮނުވި ބެލިސްޓިކް މިސައިލް ހަމަލާއެއް ހުއްޓުވާފައިވާ ކަމަށެވެ.
ޔަމަނުގެ އުތުރުގެ ބޮޑު ބައެއް ކޮންޓްރޯލް ކުރަނީ އިރާނުގެ ތާއީދާ އެކު އުޅޭ ހޫތީ ހަނގުރާމަވެރިންނެވެ. އެގޮތުން 2014 ވަނަ އަހަރުން ފެށިގެން ވެރިރަށް ސަނާ އޮތީ އެ މީހުންގެ އަތްދަށުގަ އެވެ.
ޔަމަނުގެ އިންތިހާބީ ސަރުކާރުގެ އެދުމުގެ މަތިން އޭގެ އަހަރެއް ފަހުން ހަނގުރާމައިގެ ތެރެއަށް ސައުދީ އަސްކަރީ ކޯލިޝަން ވަތް ފަހުން އެތައް ހާސް ބަޔަކު މަރުވެ، އެތައް މިލިއަން ބަޔަކު ވަނީ ހާލުގައި ޖެހިފަ އެވެ.
