ލުމަޖަންގް، އިންޑޮނީޝިއާ (ޑިސެމްބަރު 6) - މިދިޔަ ހޮނިހިރު ދުވަހު ގޮވި އިންޑޮނީޝިއާގެ އަލިފާން ފަރުބަދަ ހޯމަ ދުވަހު ދެވަނަ ފަހަރަށް ގޮވައިފި އެވެ.
ޖާވާ ރަށުގައި ހުންނަ ސެމެރޫ ފަރުބަދަ ގޮވުމުން މިހާތަނަށް ޖުމްލަ 15 މީހުން މަރުވެފައި ވާއިރު، 50 އަށް ވުރެ ގިނަ މީހުންނަށް ވަނީ އަނިޔާވެފަ އެވެ.
އެ ސަރަހައްދުގައި ހުންނަ އަވަށްތަކުގެ އެތައް ހާސް ބަޔަކު ވަނީ ވަގުތީ ހިޔާތަކަށް ބަދަލުވެފަ އެވެ. މިހާރު ދައުރުވަމުންދާ ފޮޓޯތަކުން ފެންނަނީ އަވަށްތަކަށް ވަރަށް ބޮޑަށް ދުމާއި އަޅީގެ އަސަރުކޮށްފައި ވަނިކޮށެވެ.
އިންޑޮނޭޝިއާގެ ނޭޝަނަލް ޑިޒާޒްޓާ އެޖެންސީން ބުނީ 27 މީހަކު ގެއްލިގެން ހޯދަމުންދާ ކަމަށެވެ. ނަމަވެސް ހޯމަ ދުވަހު އަނެއްކާވެސް ފަރުބަދަ ގޮވުމުން އެ މަސައްކަތަށް ހުރަސް އެޅުނެވެ.
ފަރުބަދަ ވަށައިގެން ފަސް ކިލޯމީޓަރުގެ ސަރަހައްދަކަށް ނުދިޔުމަށް އާއްމުންނަށް ވަނީ އަންގާފަ އެވެ. އެ ސަރަހައްދުގެ ވައި ވެސް ވަނީ ވަރަށް ބޮޑަށް ތަގައްޔަރުވެފަ އެވެ.
ސެމެރޫ ފަރުބަދަ އަކީ "ހަރަކާތްތެރި" ފަރުބަދައެއްގެ ގޮތުގައި ފާހަގަކޮށްފައިވާ އަލިފާން ފަރުބަދަ އެކެވެ. އެ ފަރުބަދަ އެންމެ ފަހުން ގޮވީ މިދިޔަ އަހަރުގެ ޑިސެމްބަރު މަހު އެވެ.
