މާލޭގެ ބައެއް ސަރަހައްދުތަކުގައި ހަދާފައިހުރި ޕާކިން ޒޯންތަކުން ރޭ ދޫކުރި 211 ޕާކިން ޖާގަ ދޫކޮށްފައި ވަނީ ފޯމު ހުށަހެޅި ތަރުތީބުން ދޫކުރި ސްލިޕްގައިވާ ނަމްބަރާ އެއްގޮތަށް ކަމަށް މާލެ ސިޓީ ކައުންސިލުން ބުނެފި އެވެ.
ޕާކިންގެ މައްސަލައަށް ހައްލު ހޯދުމަށް މާލޭގެ އެކި ހިސާބުތަކުން 450 ޖާގަ ކުއްޔަށް ދޫކުރަން ނިންމި އެވެ. އެއީ މިދިޔަ ޖުލައި މަހުގެ ތެރޭގައި މާލޭގެ ދިހަ ސަރަހައްދުން ޖުމްލަ 211 ޖާގައަށް ކުރިމަތިލުމަށް ހުޅުވައިލި ފުރުސަތުގެ ތެރެއިން ދޫކުރި ޖާގަތަކެކެވެ.
އެ ޖާގަތަކަށް އެދި 969 މީހަކު ކުރިމަތިލާފައިވާ ކަމަށް ސިޓީ ކައުންސިލުން ބުންޏެވެ.
ޕާކިން ސްލޮޓު ދޫކުރި ގޮތާ މެދު ސުވާލު އުފައްދައި، ގުރު ނަގާފައި ވަނީ ރަނގަޅަށް ނޫން ކަމަށް ބުނެ ގިނަ ބަޔަކު ދަނީ ނުރުހުން ފާޅުކުރަމުންނެވެ. އެގޮތުން ފޯމުލުމުން ދޫކުރި ސްލިޕްގައި ނަމްބަރު ނެތް ކަމަށް ބައެއް މީހުން ބުންޏެވެ.
އެކަމާ ގުޅިގެން މާލެ ސިޓީ ކައުންސިލްގެ ޑެޕިއުޓީ މޭޔަރު އަހުމަދު ނަރީޝް "އަދަދު"އަށް ވިދާޅުވީ ޕާކިން ޖާގައަށް ކުރިމަތިލި މީހުންނަށް ސްލިޕް ނަމްބަރެއް ހަވާލުކޮށްފައިވާނެ ކަމަށެވެ.
ގުރުއަތު ނަގާފައި ވަނީ އެ ސްލިޕް ނަމްބަރުންނެވެ.
ނަމަވެސް ނަރީޝް ވިދާޅުވީ ފޯމު ހަވާލުކުރިއިރު އިދާރީ ގޮތުން ދިމާވި ކަމެއްގެ ސަބަބުން ބައެއް މީހުންނަށް ސްލިޕް ނަމްބަރު ދޫނުކުރެވިވާ ކަމަށެވެ.
"ބައެއް ސްލިޕްތަކުގަ ނަމްބަރު ނުދެވި ހުރީ. ނަމަވެސް ފައިނަލް ލިސްޓުން އެ އެންމެންނަށް ވެސް ސްލިޕް ނަމްބަރު ދީ، އެ މީހުންގެ މައުލޫމާތު ހާމަކޮށްފައިވާނެ. އެ މީހުންގެ ފޯމް ނަމްބަރުވެސް ހިމަނައިގެން ގުރުއަތުލީ،" ނަރީޝް ވިދާޅުވި އެވެ.
މީގެ އިތުރުން ނަރީޝް ވިދާޅުވީ ކުރިމަތިލީ އެންމެންގެ ލިސްޓާއި ހޮވުނު މީހުންގެ ލިސްޓުތައް ގެޒެޓް ކޮށްފައިވާނެ ކަމަށެވެ. އެހެން ކަމުން އޭގައި އެއްވެސް މައްސަލައެއް ނޫޅޭނެ ކަމުގެ ޔަގީންކަން ނަރީޝް ދެއްވި އެވެ.
"ވަރަށް އިންސާފުވެރިކޮށް ގުރުއަތު ނެގީ. ޔަގީންކަން ދޭނަން މިކަމުގައި ގޯހެއް ހަދާފައި ނޯންނާނެ ކަމުގެ. ބައިވަރު މީޑިއާތައް ކުރިމަތީގަ އަޅުގަނޑުމެން ގުރު ނެގީ،" ނަރީޝް ވިދާޅުވި އެވެ.
ވެހިކަލް ޕާކްކުރަން ކުއްޔަށް ދޫކުރުމަށް ހުޅުވާލާފައިވާ އިތުރު ޖާގަތަކުގެ ތެރޭގައި މއ. ރާދަފަތިހިނގުން (އަމީނީމަގާއި ފަޅުމަތީމަގާ ދެމެދު) އިން 21 ޖާގަ، މއ. ކުރެދިގޯޅިން 10 ޖާގަ، މއ. ހުދުފަޅުހިނގުމުން 8 ޖާގަ، މ. ހިލާލީމަގު އަމީނީމަގުން ފެށިގެން ދެކުނު އިރުމަތީފަޅިން 20 ޖާގަ، މ. ހިލާލީމަގު، އަމީނީމަގު އިރުމަތީ ފަޅި (ސްޓޭޑިއަމް ފަޅީގައި) 10 ޖާގަ، ސަލާހުއްދީން ޕާކިން ޒޯނުން 10 ޖާގަ އަދި ހ. އަލިމަސް ކާނިވާ ސަރަހައްދުން 6 ޖާގަ ހިމެނެ އެވެ.
މީގެ އިތުރުން ހަމައެކަނި ޕްރައިވެޓް ކާރުތައް ޕާކުކުރުމަށް 24 ޖާގައެއް ކުއްޔަށް ދިނުމަށް ވެސް މާލޭ ސިޓީ ކައުންސިލުން ނިންމާފައިވެ އެވެ. މި 24 ޖާގަ ދިނުމަށް ހަމަޖެހިފައި ވަނީ އާޓިފިޝަލް ބީޗް ޕާކިން ހިމެނޭ ސަރަޙައްދުން ޗައިނާ އެމްބަސީ ކުރިމަތިންނެވެ.
