ރަޝިއާ އާއި އިންޑިއާގެ އަސްކަރީ ގުޅުން 2031 ވަނަ އަހަރަށް ދަމަހައްޓައި، ގުޅިގެން ހަތިޔާރު އުފައްދަން އެއްބަސްވެއްޖެ އެވެ.
އެގޮތަށް އެއްބަސްވީ ރަޝިއާ އާއި އިންޑިއާގެ ފޮރިން މިނިސްޓަރުންނާއި ޑިފެންސް މިނިސްޓަރުންނާ ދެމެދު ހޯމަ ދުވަހު ނިއު ދިއްލީގައި ބޭއްވި 2+2 ބައްދަލުވުމުގެ ތެރެއިންނެވެ.
ދެ ގައުމުން ސޮއިކުރި އެއްބަސްވުމުގެ ދަށުން ނިންމީ އޭކޭ-203 އެސޯލްޓް ރައިފަލް ބަޑި އުފެއްދުމަށް އެކުގައި މަސައްކަތް ކުރުމަށެވެ. އެ ބަޑި އިންޑިއާގައި އުފެއްދުމަށް މީގެ ކުރިން ރަޝިއާއާ އެކު ހާއްސަ ޖޮއިންޓް ވެންޗާއެއް ވެސް ގާއިމްކުރި އެވެ.
އިންޑިއާ އަށް އެންމެ ގިނައިން ހަތިޔާރު ފޯރުކޮށްދޭ އެއް ގައުމަކީ ރަޝިއާ އެވެ. އިންޑިއާ އިން މިހާރު މަސައްކަތް ކުރަނީ އަސްކަރީ ފައުޖު ޒަމާނީ ކުރުމަށެވެ. އެގޮތުން މި ވަގުތު އޮތް އެންމެ ފާހަގަކުރެވޭ އެއްބަސްވުމަކީ ދިގު ރާސްތާގެ އެސް-4000 މިސައިލް ޑިފެންސް ސިސްޓަމް އެއްބަސްވުމެވެ.
ފަސް ބިލިއަން ޑޮލަރަށް ވުރެ އަގު ބޮޑު އެއްބަސްވުމުގައި ސޮއިކުރީ 2018 ވަނަ އަހަރު އެވެ. ނަމަވެސް އެ އެއްބަސްވުމާ ހެދި އިންޑިއާ އާއި އެމެރިކާގެ ގުޅުމަށް އަސަރު ކުރުމުގެ ބިރު އެބަ އޮތެވެ.
އެމެރިކާގެ "ކައުންޓަރިން އެމެރިކާޒް އެޑްވާޒަރީސް ތްރޫ ސޭންކްޝަންސް އެކްޓް (ސީއޭއޭޓީއެސްއޭ)" ގެ ދަށުން ފިޔަވަޅު އަޅާނެ ކަމުގެ އިންޒާރު ވަނީ ދީފަ އެވެ. ސްޓޭޓް ޑިޕާޓްމަންޓުން މިދިޔަ ހަފުތާގައި ބުނީ އިންޑިއާއާ މެދު ވަކި ހާއްސަ ގޮތަކަށް އަމަލު ކުރުމަށް މިހާތަނަށް ނިންމާފައި ނުވާ ކަމަށެވެ. ވާދަވެރިންނާ މެދު އަމަލުކުރާނެ ގޮތް ކަނޑައަޅަން ކަމަށް ބުނެ އުފެއްދި ސީއޭއޭޓީއެސްއޭ އަކީ ރަޝިއާ އަށް ހާއްސަކޮށް އެމެރިކާ އިން ގެންގުޅޭ ގާނޫނެކެވެ.
ހަތިޔާރު އުފައްދަން އިންޑިއާ އާއި ރަޝިއާ އިން އެއްބަސްވެފައި ވާއިރު، މިއަދުގެ ވަގުތެއްގައި ޕުޓިން އިންޑިއާ އަށް ވަޑައިގެން ބޮޑު ވަޒީރު ނަރެންދްރަ މޯދީއާ ބައްދަލުކުރައްވާނެ އެވެ.
