ނިއު ދިއްލީ، އިންޑިއާ (ޑިސެމްބަރު 6) - ކޮވިޑް ބަލިމަޑުކަން އައި ފަހުން ރަޝިއާގެ ރައީސް ލެޑިމިއަ ޕުޓިން ގައުމުން ބޭރަށް ކުރައްވާ ފުރަތަމަ ދަތުރުގައި މިއަދު އިންޑިއާއަށް ވަޑައިގަންނަވާނެ އެވެ.
ދަތުރުގެ ބޭނުމަކީ ދެ ގައުމުގެ ހަކަތަ އާއި އަސްކަރީ ގުޅުން ވަރުގަދަ ކުރުމެވެ. ތާރީހީ ގޮތުން ރަޝިއާއާ ގާތް ގުޅުމެއް އޮތް އިންޑިއާގެ ތާއީދު ޔަގީންކުރަން އެމެރިކާ އިން ވެސް ދަނީ ގިނަ މަސައްކަތް ކުރަމުންނެވެ.
ޗައިނާއާ އޮތް ވާދަވެރިކަމުގެ ސަބަބުން އެމެރިކާ އިން ވަނީ "ކުއެޑް" ގެ ނަމުގައި ހަތަރު ގައުމުގެ ގްރޫޕެއް ހަދާފަ އެވެ. އެއީ އެމެރިކާ، އިންޑިއާ، ޖަޕާން އަދި އޮސްޓްރޭލިއާ އެވެ. އޭގެ ސަބަބުން ޗައިނާ އާއި ރަޝިއާގެ ކަންބޮޑުވުން އިތުރުވި އެވެ.
ފިނި ހަނގުރާމައިގެ ދުވަސްވަރު އިންޑިއާ އާއި ރަޝިއާއާ ދެމެދު އޮތީ ވަރަށް ގާތް ގުޅުމެކެވެ. އެ ގުޅުން މިއަދާ ހަމައަށް ވެސް އޮތް އިރު، އިންޑިއާ އިން ރަޝިއާ ސިފަކުރަނީ "ހާއްސަ ސްޓްރެޓެޖިކް ޕާޓްނަރެއް" ގޮތުގަ އެވެ.
މިދިޔަ ސެޕްޓެމްބަރު މަހު އޮތް ވާޗުއަލް ސަމިޓެއްގައި ބޮޑު ވަޒީރު ނަރެންދްރަ މޯދީ ރައީސް ޕުޓިން އަށް ވިދާޅުވީ ފާއިތުވި ދުވަސްތަކުން ކަށަވަރުވީ ދެ ގައުމުގެ ގުޅުމުގެ ވަރުގަދަކަން ކަމަށެވެ.
"ރަޝިއާ އަކީ އަބަދުވެސް އިންޑިއާގެ ވަރަށް ގާތް އެކުވެރިއެއް،" މޯދީ ވިދާޅުވި އެވެ.
މިއީ ދެ އަހަރު ދުވަސް ކުރިން ކޮވިޑް ބަލި ފެތުރެން ފެށި ފަހުން ޕުޓިން ގައުމުން ބޭރަށް ކުރައްވާ ދެވަނަ ދަތުރެވެ. މި އަހަރު އޮތް ޖީ20 އަދި ކޮޕް26 ސަމިޓަށް ވެސް ޕުޓިން ވަޑައިނުގަންނަވަ އެވެ. ނަމަވެސް މިދިޔަ ޖޫން މަހު ޖެނީވާގައި އެމެރިކާގެ ރައީސް ޖޯ ބައިޑެންއާ ބައްދަލުކުރެއްވި އެވެ.
ގުޅުމާ މެދު އެމެރިކާގެ ކަންބޮޑުވުން
ރަޝިއާ އިން ބުނީ ދެ ގައުމުގެ މެދުގައި ކުރާ މަޝްވަރާތަކުގައި އެންމެ ބޮޑު އިސްކަމެއް ދޭނީ ހަކަތަ އާއި އަސްކަރީ ގުޅުމަށް ކަމަށެވެ. ރަޝިއާގެ ހަކަތަ އުފައްދާ ކުންފުނި ރޮސްނެފްޓްގެ ވެރިޔާ އައިގޯ ސެޗިން ވެސް މި ދަތުރުގައި ބައިވެރިވެ އެވެ. އެހެންކަމުން ހަކަތައާ ގުޅޭ މުހިއްމު އެއްބަސްވުންތަކުގައި ސޮއިކުރާނެ ކަމަށް ބެލެވެ އެވެ.
އިންޑިއާ އަށް އެންމެ ގިނައިން ހަތިޔާރު ފޯރުކޮށްދޭ އެއް ގައުމަކީ ރަޝިއާ އެވެ. އިންޑިއާ އިން މިހާރު މަސައްކަތް ކުރަނީ އަސްކަރީ ފައުޖު ޒަމާނީ ކުރުމަށެވެ. އެގޮތުން މި ވަގުތު އޮތް އެންމެ ފާހަގަކުރެވޭ އެއްބަސްވުމަކީ ދިގު ރާސްތާގެ އެސް-4000 މިސައިލް ޑިފެންސް ސިސްޓަމް އެއްބަސްވުމެވެ.
ފަސް ބިލިއަން ޑޮލަރަށް ވުރެ އަގު ބޮޑު އެއްބަސްވުމުގައި ސޮއިކުރީ 2018 ވަނަ އަހަރު އެވެ. ނަމަވެސް އެ އެއްބަސްވުމާ ހެދި އިންޑިއާ އާއި އެމެރިކާގެ ގުޅުމަށް އަސަރު ކުރުމުގެ ބިރު އެބަ އޮތެވެ.
އެމެރިކާގެ "ކައުންޓަރިން އެމެރިކާޒް އެޑްވާޒަރީސް ތްރޫ ސޭންކްޝަންސް އެކްޓް (ސީއޭއޭޓީއެސްއޭ)" ގެ ދަށުން ފިޔަވަޅު އަޅާނެ ކަމުގެ އިންޒާރު ވަނީ ދީފަ އެވެ. ސްޓޭޓް ޑިޕާޓްމަންޓުން މިދިޔަ ހަފުތާގައި ބުނީ އިންޑިއާއާ މެދު ވަކި ހާއްސަ ގޮތަކަށް އަމަލު ކުރުމަށް މިހާތަނަށް ނިންމާފައި ނުވާ ކަމަށެވެ. ވާދަވެރިންނާ މެދު އަމަލުކުރާނެ ގޮތް ކަނޑައަޅަން ކަމަށް ބުނެ އުފެއްދި ސީއޭއޭޓީއެސްއޭ އަކީ ރަޝިއާ އަށް ހާއްސަކޮށް އެމެރިކާ އިން ގެންގުޅޭ ގާނޫނެކެވެ.
މިސައިލް ޑިފެންސް ސިސްޓަމް އެއްބަސްވުމުގެ އިތުރުން އިންޑިއާގައި އޭކޭ-203 ރައިފަލް އުފައްދަން ހާއްސަ ޖޮއިންޓް ވެންޗާއެއް ވެސް ރަޝިއާއާ އެކު ވަނީ ފަށާފަ އެވެ.
އިންޑިއާ އާއި ރަޝިއާ އިން އާއްމުކޮށް ކޮންމެ އަހަރަކު ވެސް ސަމިޓެއް ބާއްވަ އެވެ. ނަމަވެސް އެންމެ ފަހުން ދެ ގައުމުގެ ލީޑަރުން އެއް ތަނަކުން ބައްދަލުވެވަޑައިގެންނެވީ 2019 ވަނަ އަހަރު ބްރެޒިލްގައި އޮތް ބްރިކްސް ސަމިޓުންނެވެ.
"ދެ ގައުމުގެ ގުޅުމުގެ ހާލަތާއި ކުރިއަށް އެޅޭނެ ފިޔަވަޅުތަކާ ގުޅޭ ގޮތުން އަދި ސްޓްރެޓެޖިކް ގުޅުން ވަރުގަދަ ކުރުމަށް ލީޑަރުން މަޝްވަރާ ކުރައްވާނެ،" މިދިޔަ މަހު އިންޑިއާގެ އެކްސްޓާނަލް އެފެއާޒް މިނިސްޓްރީން ނެރުނު ބަޔާނެއްގައި ބުންޏެވެ.
ދެ ގައުމުގެ ފޮރިން އަދި ޑިފެންސް މިނިސްޓަރުން ވެސް ހޯމަ ދުވަހު މަޝްވަރާތައް ބާއްވަވާނެ އެވެ.
