ކްލަބް މޯލްޑިވްސް ކަޕްގެ އަންހެން ޑިވިޝަން، 18/30 ފުޓްސަލް ފިއެސްޓާގައި މިރޭ ކުޅުނު މެޗުތަކަށް ފަހު ގްރޫޕް ސްޓޭޖުގެ މެޗުތައް ނިމުނުއިރު، ސެމީ ފައިނަލުގައި ދިވެހި ސިފައިންގެ ކްލަބާއި ކްލަބް ވެމްކޯ ކުޅެން ޖެހުނުއިރު، އަނެއް ސެމީގައި އެންމެ ފަހުގެ ޗެމްޕިއަން އެމްޕީއެލުން ޕޮލިސް ކްލަބާ ވާދަކުރަން ޖެހިއްޖެ އެވެ.
18/30 ފުޓްސަލް ފިއެސްޓާގައި މިރޭ ގްރޫޕް އޭގައި ޓްރޭޑް ކްލަބް އަތުން ޕޮލިސް މޮޅުވީ 5-0 އިންނެވެ. ގްރޫޕް ބީގައި ވެމްކޯ އަތުން އެމްޕީއެލް ވަނީ 5-1 އިން މޮޅުވެފަ އެވެ.
ގްރޫޕްގެ އޭގެ އެއް ވަނަ ހޯދީ ސިފައިންނެވެ. ހަތަރު މެޗުން މޮޅުވެ، 12 ޕޮއިންޓް ހަމަކުރި އެވެ. ދެ ވަނަ ހޯދި ޕޮލިހަށް ވަނީ ހަ ޕޮއިންޓް ލިބިފަ އެވެ. ފުލަށް ދިޔަ ޓްރޭޑް ކްލަބް ނިންމާލީ ޕޮއިންޓެއް ނުލިބި އެވެ. ގްރޫޕް ބީގެ އެއް ވަނަ ހޯދި އެމްޕީއެލް ވަނީ ހަތަރު މެޗުން 10 ޕޮއިންޓް ހޯދައިފަ އެވެ. ދެ ވަނަ އަށް ދިޔަ ވެމްކޯ އަށް ވަނީ ފަސް ޕޮއިންޓް ލިބިފަ އެވެ. ތިން ވަނަ އަށް ގޮސް ކެޓި ޓީމު ފެނަކަ އަށް ހަތަރު މެޗުން ލިބުނީ ޕޮއިންޓެކެވެ.
ސެމީގައި ކުޅޭނީ ގްރޫޕް އޭގެ އެއް ވަަނަ އާއި ގްރޫޕް ބީގެ ދެ ވަނަ އެވެ. އަދި ގްރޫޕް ބީގެ އެއް ވަނަ ކުޅޭނީ ގްރޫޕް އޭގެ ދެ ވަނައާ އެވެ. އެ ގޮތުން ސިފައިންނާއި ވެމްކޯ އަދި އެމްޕީއެލް އާއި ޕޮލިސް ކުޅޭ ސެމީ ފައިނަލް މެޗުތައް އޮންނާނީ މި މަހު 13 ވަަނަ ދުވަހުގެރޭގަ އެވެ.
ރެހެންދި ފުޓްސަލް އެއް ވަަނަ ދަނޑުގައި މިރޭ ކުޅުނު މެޗުގައި ވެމްކޯ ކޮޅަށް އެމްޕީއެލްގެ ފުރަތަމަ ގޯލު ޖެހީ ގައުމީ ވޮލީ ޓީމަށް ކުޅޭ ފާތިމަތު ޖޫޒާން ޒަރީރް އެވެ. އެމްޕީއެލްގެ ތަޖިކިސްތާން ކުޅުންތެރިޔާ މަދީނާ ފަޒިލޯވާ ނެގި ހުރަހަކުން ޖޫޒާން ވަނީ ހުސްކޮށް އޮތް ގޯލުގެ ތެރެއަށް ބޯޅަ ފޮނުވާލައިފަ އެވެ. ދެ ވަނަ ގޯލު ޖެހީ ހުސްކޮށް އަރައި ގޯލުގެ ކަނަށް ބޯޅަ ފޮނުވާލައިގެން އާމިނަތު ޝާމިލާ އެވެ.
އެމްޕީއެލްގެ އަނެއް ގޯލުތައް ޖެހީ މަދީނާ އާއި ޝާމިލާގެ އިތުރުން މެޗުގެ މޮޅު ކުޅުންތެރިއަކަށް ހޮވުނު އެމްޕީއެލްގެ ކެޕްޓަން ފާތިމަތު ޝާލިޔާ އެވެ. ވެމްކޯގެ ހަމައެކަނި ގޯލު ޖެހީ އައިމިނަތު އަރީޝާ އެވެ.
ރެހެންދި ދެ ވަނަ ދަނޑުގައި ކުޅުނު މެޗުގައި ޓްރޭޑް ކޮޅަށް ޕޮލިހުގެ ގޯލުތައް ޖެހީ ފާތިމަތު ތީބާ އާއި ލެބަނަންގެ ނެންސީ ޗޭލިއަން ކޮންމެ ކުޅުންތެރިއަކު ދެ ގޯލުގެ އިތުރުން ލެބަނަންގެ ސެލީން އަލް ހައްދާދު އެވެ.
