ރާއްޖެ އައި ފަތުރުވެރިއަކު، އެންމެ ނުރައްކާތެރިކަމަށް ބުނާ އޮމިކްރޯން ވޭރިއަންޓަށް ޕޮޒިޓިވްވެފައިވާ ކަމަށް ހެލްތު ޕްރޮޓެކްޝަން އޭޖެންސީ (އެޗްޕީއޭ)އިން މިރޭ ބުނެފި އެވެ.
އެޗްޕީއޭއިން މިރޭ ކުރި ޓްވީޓެއްގައި ބުނީ އޮމިކްރޯން ވޭރިއަންޓްގެ ފުރަތަމަ ކޭސް ރާއްޖޭން ފެނިފައިވާ ކަމަށެވެ.
އަދި އެ ވޭރިއަންޓް ފެނިފައިވަނީ ރާއްޖެއަށް އައި ފަތުރުވެރިއެއްގެ ކޮވިޑު ޕޮޒިޓިވްވި ސާމްޕަލްގެ ޖެނޯމިކް ސީކުއެންސިން ހަދައިގެން ކަމަށެވެ.
ނަމަވެސް، އެ ވޭރިއަންޓް ފެނުނީ ކޮން ގައުމަކުން އައި ޓޫރިސްޓުންގެ ފަރާތުން ކަމެއް އެޗްޕީއޭއިން ނުބުނެ އެވެ.
ކޮވިޑުގެ އާ ވައްތަރެއްކަމުގައި ސައިންސްވެރިން ބުނާ އޮމިކްރޯން ނަމަކަށް ކިޔާ އެ ވޭރިއެންޓް އެންމެ ފުރަތަމަ ފެނިފައިވަނީ މީގެ ހަފްތާއެއްހާ ދުވަސް ކުރިން ދެކުނު އެފްރިކާ އިންނެވެ.
އެއާއެކު މިދިޔަ މަހުގެ 27 ވަނަ ދުވަހުން ފެށިގެން އެފްރިކާގެ ބައެއް ގައުމުތަކުން ރާއްޖެއަށް ދަތުރުކުރުން ވަނީ މަނާކޮށްފަ އެވެ.
އޮމިކްރޮން ވޭރިއެންޓާ ގުޅިގެން ރާއްޖެއަށް ދަތުރުކުރުން މަނާކޮށްފައިވާ ގައުމުތަކަކީ ސައުތު އެފްރިކާ، ނެމީބިއާ، މޮޒެމްބީކް، ލެސޯތޯ، ބޮޓްސްވާނާ، ޒިންބާބްވޭ އަދި އެސްވާޓީނީ ހިމެނޭހެން ހަތް ގައުމަކުންނެވެ.
އެ ގައުމުތަކުން ރާއްޖެއަށް ދަތުރުކުރުން މަނާ ފަރާތްތަކުގެ ތެރޭގައި ދަތުރުކުރުމުގެ 14 ދުވަސް ކުރިން އެ ގައުމުތަކުގައި ދިރިއުޅުނު އަދި 12 ގަޑިއިރަށްވުރެ ގިނައިރު އެ ގައުމުތަކުގައި ޓްރާންސިޓް ކުރި ފަރާތްތައް ހިމެނޭނެ ކަމަށް އެޗްޕީއޭއިން ބުނެ އެވެ.
މީގެ ތެރޭގައި ދިވެހިންނާއި ރާއްޖޭގައި ވޯކް ޕާމިޓް އޮންނަ ފަރާތްތައް ނުހިމެނެ އެވެ. އެ ފަރާތްތަކަށް އެޗްޕީއޭއިން ވަނީ ހާއްސަ އުސޫލެއް ގާއިމްކޮށްފަ އެވެ.
އެގޮތުން 14 ދުވަސް ކުރިން އެ ގައުމުތަކުގައި އުޅުނު, 12 ގަޑިއިރަށް އެ ގައުމުތަކުން ގައުމެއްގައި ޓްރާންސިޓްވި ދިވެހިންނާއި ވޯކް ޕާމިޓް އޮންނަ ފަރާތްތައް ރާއްޖެއަށް އައުމާއެކު 14 ދުވަހުގެ ކަރަންޓީނެއް ފުރިހަމަކުރަން ޖެހޭނެ ކަމަށް އެޗްޕީއޭއިން ބުނެ އެވެ.
އަދި 14 ދުވަސް ފަހުން ކަރަންޓީނުން ދޫކުރެވޭނީ ކޮވިޑަށް ޓެސްޓުކޮށް ޓެސްޓުގެ ނަތީޖާ ނެގެޓިވްވުމުން ކަމަށް ވެސް އެޗްޕީއޭއިން ބުނެ އެވެ.
އެފްރިކާގެ ބައެއް ގައުމުތަކުން އަންނަ މީހުންނަށް ފިޔަވަޅުތައް ހަރުކަށި ކުރި ފަހުން، ބާރު ދުވެލީގައި ފެތުރެމުން އަންނަ މި އާ ވޭރިއަންޓް މިހާރު ވަނީ އަވަށްޓެރި ސްރީލަންކާގެ އިތުރުން އިންޑިއާއިން ވެސް ފެނިފަ އެވެ.
އޮމިކްރޯންގެ ނުރައްކާ ބޮޑު؟
ރިޕޯޓުތައް ބުނާ ގޮތުން 40 ގައުމަކުން އޮމިކްރޯން ވޭރިއެންޓް މިހާރު ވަނީ ފެނިފަ އެވެ. ވަރަށް ބޮޑެތި މިޔުޓޭޝަންތަކެއް އައިސްފައިވާ އެ ވޭރިއެންޓުން ކުރާ އަސަރު އަދިވެސް ޔަގީންކޮށް ހޯދިފައެއް ނުވެ އެވެ.
ދެކުނު އެފްރިކާގެ ސައިންޓިސްޓުން ހެދި ދިރާސާގެ ފުރަތަމަ ޑޭޓާ ދައްކާ ގޮތުން ކޮވިޑް ޖެހިފައި ހުރި ނަމަވެސް އަލުން އޮމިކްރޯން ވޭރިއެންޓާ ހެދި ބަލި ޖެހުމުގެ ފުރުސަތު ބޮޑުވެ އެވެ.
ނަމަވެސް އެނެލިސްޓުން ބުނީ އެއީ އަދި ފުރިހަމަ ޑޭޓާއެއް ނޫން ކަމަށެވެ. އޮމިކްރޯން ވޭރިއެންޓް އެންމެ ފުރަތަމަ ހޯދީ ދެކުނު އެފްރިކާގެ ސައިންޓިސްޓުންނެވެ.
އޮމިކްރޯންއާ މެދު ހާސްވުމުގެ ބަދަލުގައި އެއާ ކުރިމަތިލުމަށް ގައުމުތަކުން ތައްޔާރުވުމަށް ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ)އިން ވަނީ އިލްތިމާސްކޮށްފަ އެވެ.
