ޓްވިޓާގެ ކޯ ފައުންޑަރު އަދި ޗީފް އެގްޒެކްޓިވްގެ މަގާމު ފުރަމުންދާ ޖެކް ޑޯސީ އެ މަގާމުން ވަކިވާން ނިންމައިފި އެވެ.
ޓްވިޓާ އިން ބުނީ އާ ސީއީއޯގެ މަގާމުގައި ދެން ހުންނާނީ މިހާރު ޗީފް ޓެކްނިކަލް އޮފިސަރުގެ މަގާމުގައި ވެސް ހުރި ޕަރަގް އަގްރަވާލް ކަމަށެވެ.
ޑޯސީ އަކީ 2006 ވަނަ އަހަރު ލޯންޗު ކުރި ޓްވިޓާގެ އެއް ފައުންޑަރެވެ. އޭނާ މިހާތަނަށް ހުރީ ޓްވިޓާ އާއި ޕޭމެންޓު ކުންފުނި ސްކޮޔާގެ ސީއީއޯގެ މަގާމުގަ އެވެ.
"އަޅުގަނޑު ވަކިވާންވީ ވަގުތު އައިސް ޖެހިއްޖެ،" އޭނާއާ ނުލައި ކުންފުނި ކުރިއަށް ދާން ތައްޔާރު ކަމަށް ފާހަގަކޮށް ނެރުނު ބަޔާނެއްގައި ޑޯސީ ވިދާޅުވި އެވެ.
ޑޯސީ ވިދާޅުވީ އޭނާގެ ބަދަލުގައި ސީއީއޯގެ މަގާމަށް އައްޔަނުކުރާ ފަރާތާ މެދު "ފުން" އިތުބާރެއް އެބަ އޮތް ކަމަށެވެ. އެގޮތުން މިއީ އަގްރަވާލް "ލީޑުކުރަންވީ ވަގުތު" ކަމަށް ވިދާޅުވި އެވެ.
އަގްރަވާލް ޓްވިޓާއާ ގުޅުނީ 2011 ވަނަ އަހަރު އެވެ. އެ ކުންފުނީގެ ޓެކްނޮލޮޖީ ޗީފްގެ ގޮތުގައި އޭނާ އައްޔަނުކުރީ 2017 ވަނަ އަހަރު އެވެ.
އުމުރުން 45 އަހަރުގެ ޑޯސީ 2006 ވަނަ އަހަރު ޓްވިޓާ އުފެއްދީ ބިޒް ސްޓޯން، އެވަން ވިލިއަމްސް އަދި ނޮއާ ގްލާސްއާ ގުޅިގެންނެވެ.
ދެހާސް އަށް ވަނަ އަހަރު ކުންފުނީގެ ސީއީއޯގެ މަގާމު ދޫކޮށް ޑިޖިޓަލް ޕޭމަންޓް އެޕް ސްކޮޔާ އުފެއްދުމުގެ މަސައްކަތް އޭނާ ފެށި އެވެ. އެ ކުންފުންޏަކީ ވެސް މިހާރު މަލްޓި ބިލިއަން ޑޮލަރުގެ ކުންފުންޏެކެވެ.
ނަމަވެސް ޓްވިޓާގެ ސީއީއޯގެ މަގާމު އޭގެ ފަހުން ފުރި ޑިކް ކޮސްޓޮލޯ 2015 ވަނަ އަހަރު އިސްތިއުފާ ދިނުމާ އެކު އަނެއްކާ ވެސް ޑޯސީ ކުންފުންޏާ ހަވާލުވި އެވެ.
