ޖެނީވާ، ސްވިޓްޒަލޭންޑް (ނޮވެމްބަރު 29) - ކޮވިޑް ފަތުރާ ވައިރަހުގެ އާ ވޭރިއެންޓުގެ ނުރައްކާ "ވަރަށް ބޮޑު" ކަމަށް ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އިން ހޯމަ ދުވަހު ކަނޑައަޅައިފި އެވެ.
އދ. ގެ ސިއްހަތާ ބެހޭ އެޖެންސީން ބުނީ ދެކުނު އެފްރިކާ އިން އެންމެ ފުރަތަމަ ފެނުނު ވޭރިއެންޓަކީ "ވަރަށް ތަފާތު އަދި ގިނަ މިޔުޓޭޝަންތަކެއް އެކުލެވޭ" ވޭރިއެންޓެއް ކަމަށާއި އޭގެ ތެރެއިން ބައެއް މިޔުޓޭޝަންތަކަކީ ހަލުވިކަމާ އެކު ބަލި ފެތުރެން މަގުފަހިވާ އަދި ވެކްސިނުގެ ރައްކާތެރިކަން ކުޑަކޮށްލާ މިޔުޓޭޝަންތަކަށް ވުމުގެ ފުރުސަތު އެބަ އޮތް ކަމަށެވެ.
"ދުނިޔޭގެ ފެންވަރުގައި އިމޮކްރޯން އިތުރަށް ފެތުރުމުގެ ފުރުސަތު ވަރަށް ބޮޑު،" ޑަބްލިއުއެޗްއޯ އިން އިންޒާރު ދިނެވެ.
އެހެން ނަމަވެސް މިއަދާ ހަމައަށް އޮމިކްރޯން ވޭރިއެންޓާ ގުޅުން ހުރި އެއްވެސް މަރެއް ރިކޯޑް ކުރެވިފައި ނުވާ ކަމަށް ޑަބްލިއުއެޗްއޯ އިން ބުންޏެވެ.
ޑަބްލިއުއެޗްއޯ އިން އިތުރަށް ބުނީ ކުރީގެ ވޭރިއެންޓުތަކާ އަޅާ ބަލާއިރު މި ވޭރިއެންޓުގެ ނުރައްކާ ކުޑަ ކަމަށް މުސްތަގުބަލުގައި ދެއްކި ނަމަވެސް، ހަލުވިކަމާ އެކު މި ވޭރިއެންޓު ފެތުރޭ ނަމަ ކޭސްތައް އިތުރުވެ، ސިއްހީ ނިޒާމުތަކަށް ބާރުބޮޑުވެ، މަރުތައް އިތުރުވުމުގެ ފުރުސަތު އެބަ އޮތް ކަމަށެވެ.
"އޮމިކްރޯންގެ ސަބަބުން ކޮވިޑުގެ އާ ރާޅެއް އަނެއްކާވެސް ކުރިމަތިވެއްޖެ ނަމަ، ނަތީޖާ ވަރަށް ގޯސްވެދާނެ،" އާ ވޭރިއެންޓާ ގުޅިގެން ދުނިޔެ އަށް އޮތް ނުރައްކާ "ވަރަށް ބޮޑު" ކަމަށް ފާހަގަކުރަމުން ޑަބްލިއުއެޗްއޯ އިން ބުންޏެވެ.
ޑަބްލިއުއެޗްއޯ އިން ގައުމުތަކަށް ގޮވާލީ ކޭސްތައް ދެނެގަންނަން ކުރާ މަސައްކަތް ފުޅާކޮށް، ބަލި ފެތުރޭ ތަންތަނާއި، ހަލުވި މިނުގެ ސާފު މަންޒަރެއް އަވަހަށް ހޯދުމަށެވެ.
އޭގެ އިތުރުން ކޮވިޑާ ދެކޮޅަށް ވެކްސިން ދިނުން އަވަސް ކުރުމަށާއި ވަކިން ހާއްސަކޮށް ބައްޔަށް ނުރައްކާ ބޮޑު ނަމަވެސް މިހާތަނަށް ވެކްސިން ނުޖަހައި ތިބި މީހުންނަށް ސަމާލުކަން ދިނުމަށް ވެސް ގޮވާލި އެވެ.
ނަމަވެސް ދަތުރު ކުރުން ހުއްޓުވަން ފިޔަވަޅު އެޅުމާ ދެކޮޅަށް ޑަބްލިއުއެޗްއޯ އިން އަނެއްކާވެސް ނަސޭހަތްދިނެވެ. އެގޮތުން އާ ވޭރިއެންޓެއް އަލަށް ފެންނަ ގައުމަކަށް ދަތުރު ކުރުން މަނާކުރުމަކީ ނަހަމަ އަދި ކޭސްތައް ޓްރެކް ކުރުމަށް އެޅޭ ހުރަހެއްގެ ގޮތުގައި ސިފަކުރި އެވެ.
"ދުނިޔޭގެ ގިނަ ހިސާބުތަކަކުން އޮމިކްރޯން ވޭރިއެންޓް މިހާރު ފެނިފައި ވާއިރު، އެފްރިކާ އަށް ޓާގެޓުކޮށް ދަތުރު ކުރުން މަނާކުރުމަކީ ދުނިޔޭގެ އެއްބައިވަންތަކަމަށް އޮތް ގޮންޖެހުމެއް،" ޑަބްލިއުއެޗްއޯގެ ސަރަހައްދީ ޑިރެކްޓަރު މަޓްޝިޑީސޯ މޮއެޓީ ވިދާޅުވި އެވެ.
ގިނަ ގައުމުތަކަކުން ވަނީ އެފްރިކާ ބައްރުގެ ދެކުނަށް ދަތުރު ކުރުން މަނާކޮށްފަ އެވެ. އޭގެ ތެރޭގައި އިނގިރޭސިވިލާތް، އިންޑޮނޭޝިއާ، ކުވެއިތު، ނެދަލޭންޑްސް، ގަތަރު، ސައުދީ އަރަބިއްޔާ އަދި އެމެރިކާ ހިމެނެ އެވެ.
