ބްރަސެލްސް، ބެލްޖިއަމް (ނޮވެމްބަރު 29) - އަފްގާނިސްތާނުގެ އެއާޕޯޓުތައް ހިންގުމުގައި ޔޫރަޕިއަން ޔޫނިއަން (އީޔޫ) ގެ އެހީ އަށް ތާލިބާން ސަރުކާރުން އެދެފި އެވެ.
އީޔޫ އާއި ތާލިބާނުންގެ އޮފިޝަލުން ފާއިތުވި ހަފުތާ ބަންދުގައި ވަނީ ގަތަރުގެ ވެރިރަށް ދޯހާގައި ބައްދަލުކޮށްފަ އެވެ. މިހާރު ތާލިބާނުން ތައްޔާރުވެގެން ތިބީ އެމެރިކާއާ އެކު ބައްދަލުވުން ފެށުމަށެވެ.
އީޔޫގެ ޔޫރަޕިއަން އެކްސްޓާނަލް އެކްޝަން ސާވިސް (އީއީއޭއެސް) ގެ ބަޔާނުގައި ބުނީ މަޝްވަރާ ކުރި ނަމަވެސް، އެއީ އީޔޫ އިން ތާލިބާން ސަރުކާރު ބަލައިގަތްކަމުގެ ހެއްކެއް ނޫން ކަމަށެވެ.
"ނަމަވެސް މިއީ އީޔޫ އާއި އަފްގާނިސްތާނުގެ ރައްޔިތުންގެ ހައްގުގައި ކުރަން ޖެހޭ ކަންކަމާ މެދު ބާއްވަން ޖެހޭ މަޝްވަރާތަކެއް،" ބަޔާނުގައި ވެ އެވެ.
ތާލިބާން ވަފުދުގެ އިސްވެރިޔަކަށް ހުރީ ފޮރިން މިނިސްޓަރު އާމިރް ހާން މުއްތަގީ އެވެ. އޭގެ އިތުރުން އެޑިއުކޭޝަން މިނިސްޓަރާއި ހެލްތު މިނިސްޓަރު، މަރުކަޒީ ބޭންކުގެ ގަވަރުނަރު އަދި އެކި ވުޒާރާތަކާއި ޖާސޫސީ އިދާރާގެ އޮފިޝަލުން ވެސް ބައިވެރިވި އެވެ.
އީޔޫ ވަފްދުގެ އިސްވެރިޔަކަށް ހުރީ އަފްގާނިސްތާނަށް ކަނޑައަޅާފައި ހުންނަ މަންދޫބު ޓޯމަސް ނިކްލަސަން އެވެ. އީޔޫގެ ފަރާތުން ދެން ބައިވެރިވީ އީއީއޭއެސް އާއި އިންސާނީ އެހީ އާއި ހިޖުރަ ކުރުމާއި، ބައިނަލްއަގްވާމީ ގުޅުންތަކާ ބެހޭ އޮފިޝަލުންނެވެ.
އީޔޫގެ ބަޔާނުގައި ބުނީ އަފްގާނިސްތާނުގެ 20 އަހަރުގެ ހަނގުރާމައިގައި ތާލިބާނުންނާ ދެކޮޅަށް މަސައްކަތް ކުރި މީހުންނަށް ހިމާޔަތް ދޭނެ ކަމަށް ތާލިބާނުން ވައުދުވެފައިވާ ކަމަށެވެ.
ތާލިބާނުން ވެސް ބުނީ ގައުމު ދޫކޮށް ދާން ބޭނުން ބަޔަކަށް އެ ފުރުސަތު ފަހިކޮށްދޭނެ ކަމަށާއި ނަމަވެސް އެއާޕޯޓުގެ ހިންގުން ހުއްޓުމެއް ނެތި ކުރިއަށް ގެންދަން އީޔޫގެ އެހީ އަށް އެދޭ ކަމަށެވެ.
"ދެ ފަރާތުން ވެސް ވަނީ ފިނި މޫސުން ކުރިމަތިވަމުން ދާއިރު، އަފްގާނިސްތާނުގެ އިންސާނީ ހާލަތު އިތުރަށް ގޯސްވަމުން ދާތީ ކަންބޮޑުވުން ފާޅުކޮށްފައި،" އީޔޫ އިން އިންސާނީ އެހީ ފޯރުކޮށްދޭނެ ކަމަށް ބުނެ، ބަޔާނުގައި ފާހަގަކުރި އެވެ.
އީޔޫ އިން ތާލިބާނުންނަށް ގޮވާލީ "އެންމެންގެ ބައިވެރިވުން ހިމެނޭ ސަރުކާރެއް" ގާއިމްކޮށް، ޑިމޮކްރަސީ ކުރިއަރުވައި، އަންހެން ކުދިންނަށް ސްކޫލަށް ދެވޭނެ ގޮތް ހަދައި، ޓެރަރިސްޓުންގެ ނުފޫޒުން ގައުމު ސަލާމަތް ކުރުމަށެވެ.
އީޔޫގެ ޝަރުތުތައް ތާލިބާނުން ބަލައިގަނެފި ނަމަ މާލީ އެހީ އިތުރު ކުރާނެ ކަމަށް ވެސް އީޔޫ އިން ބުންޏެވެ. ތާލިބާނުން ބުނީ "އިސްލާމީ ހަމަތަކުގެ" މަތިން އިންސާނީ ހައްގުތައް ލިބޭނެ ކަމަށާއި ބަންދުކޮށްފައިވާ ޑިޕްލޮމެޓިކް މިޝަންތައް އަނބުރާ އައުމަށް މަރުހަބާ ކިޔާ ކަމަށެވެ.
