ހޮނިއަރާ، ސޮލޮމޮން އައިލެންޑްސް (ނޮވެމްބަރު 27) - ސޮލޮމޮން އައިލެންޑްސްގެ ވެރިރަށް ހޮނިއަރާގައި މިދިޔަ ހަފުތާގައި ހިނގި ހަމަނުޖެހުންތަކަށް ނިމުމެއް އައި އިރު ތިން މީހުން މަރުވެ، ބޮޑެތި ގެއްލުންތަކެއް ލިބިއްޖެ އެވެ.
ޕެޓްރޯލް ސްޓޭޝަންތަކާއި ފިހާރަތަކާއި އެހެން ވިޔަފާރިތައް ހޮނިހިރު ދުވަހު ވަނީ އަލުން ހުޅުވާފަ އެވެ. އެއާއެކު ގެތަކުން ނުނިކުމެ ތިބި އާއްމުން ވަނީ ޒަރޫރީ ތަކެތި ގަންނަން އަވަސްވެގަނެފަ އެވެ. ނަމަވެސް ކޮންމެ ވަގުތަކު ވެސް އަލުން ހަމަނުޖެހުން ފެށުމުގެ ބިރު އަދިވެސް އެބަ އޮތެވެ.
މިދިޔަ ބުދަ ދުވަހު ކުޑަ މުޒާހަރާއެއްގެ ގޮތުގައި ފެށި ހަރަކާތް ބޮޑު ހަމަނުޖެހުމަކަށް ބަދަލުވީ ފަގީރު ހާލަތުގައި ދިރިއުޅޭ އާއްމުން މުޒާހަރާގައި ބައިވެރިވެ، ސަރުކާރުގެ އިސްތިއުފާ އަށް ގޮވަމުން ތަންތަނަށް ގެއްލުން ދޭން ފެށުމުންނެވެ.
ތިން ދުވަސް ވަންދެން މެދުކެނޑުމެއް ނެތި ހިންގި ހަމަނުޖެހުމުގައި ރުޅިގަދަވެފައި ތިބި އާއްމުން ވަނީ އިމާރާތްތަކުގައި ހުޅު ޖަހައި، ބިއްލޫރިތައް ތަޅައި ހަދާފަ އެވެ. އެ މީހުން ޑިމާންޑު ކުރީ ބޮޑު ވަޒީރު މަނާސޭ ސޮގަވަރޭގެ އިސްތިއުފާ އަށެވެ.
ކުރިން ވެސް ފަގީރު ހާލަތުގައި އުޅެމުން އައި ސޮލޮމޮން އައިލެންޑްސްގެ ގިނަ ބަޔެއްގެ ހާލަތު އިތުރަށް ގޯސްވީ، ކޮވިޑް ބަލިމަޑުކަމާ ހެދި ދެ އަހަރުގެ ލޮކްޑައުނެއްގައި އުޅެން ޖެހުމުންނެވެ. އިގްތިސާދު ފުނޑި، ވަޒީފާ ގެއްލި، ގިނަ ބަޔަކު ހާލުގައި ޖެހުނެވެ.
ހޮނިއަރާ ސިޓީގެ ޗައިނާޓައުން ޑިސްޓްރިކްޓުގައި އަނދާ ހުލިވެފައިވާ އިމާރާތެއްގެ ތެރެއިން ފެނުނު ތިން މީހެއްގެ ހަށިގަނޑު ދެނެގަންނަން ފުލުހުންގެ ފޮރެންސިކް ޓީމުން ދަނީ މަސައްކަތް ކުރަމުންނެވެ.
އެ ސިޓީ އަށް ހަމަޖެހުން އައިސްފައި ވަނީ ރޭގަނޑުގެ ކާފިއުއާ އެކު ސުލްހަ ބަލަހައްޓަން އޮސްޓްރޭލިއާ އާއި ޕަޕުއާ ނިއު ގިނީގެ 150 އަށް ވުރެ ގިނަ ފުލުހުންނާއި ސިފައިން ހުކުރު ދުވަހު މަސައްކަތް ފެށުމުންނެވެ.
ސޮލޮމޮން އައިލެންޑްސްގެ ގިނަ ރައްޔިތުން ދެކޭ ގޮތުގައި ސަރުކާރުގެ ތެރޭގައި ކޮރަޕްޝަން ފެތުރި، ޗައިނާ އާއި އެހެން ބޭރު ގައުމުތަކުގެ ނުފޫޒަށް ދަނީ ދޫދެމުންނެވެ.
ރައްޔިތުންގެ ތެރެއިން ގިނަ ބަޔަކު ބަނޑުހައި ހޫނުކަމުގައި އުޅެމުން ދާއިރު، އާދައިގެ މުޒާހަރާއަކުން އެހާ ބޮޑު ހަމަނުޖެހުމް އުފެދުނީ ބަނޑުހައި ހޫނުކަމުގެ ސަބަބުން ކަމަށް ރައްޔިތުން ދެކެ އެވެ.
މުޒާހަރާގެ ބައިވެރިންގެ ރުޅިގަނޑު ސީދާ އަމާޒު ކުރީ ސޮގަވަރޭ އާއި ސަރުކާރަށެވެ. އެގޮތުން ޕާލިމެންޓާއި، ބޮޑު ވަޒީރުގެ ގެކޮޅުގައި ހުޅުޖަހަން ވެސް މަސައްކަތް ކުރި އެވެ. ހަމަނުޖެހުމާ ގުޅިގެން 100 އަށް ވުރެ ގިނަ މީހުން ހައްޔަރުކޮށްފައި ވެ އެވެ.
