ކްލަބް މޯލްޑިވްސް ކަޕްގައި މިރޭ ކުޅުނު މެޗުން ރޯޑް ރިކްރިއޭޝަން ކްލަބް (އާރްއާރްސީ) 1-0 އިން ބަލިކޮށް ކްލަބް އެޗްޑީސީ މުބާރާތުގެ ދެ ވަނަަ ބުރާ ގާތަށް ޖެހިލައިފި އެވެ.
ކުުޅުނު ފުރަތަމަ މެޗުން އެޗްޑީސީން ވަނީ އެންމެ ފަހުގެ ޗެމްޕިއަން ޔުނައިޓެޑް ބީއެމްއެލް 3-0 އިން ބަލިކޮށްފަ އެވެ. މިރޭ ރެހެންދި ފުޓްސަލް އެއް ވަނަ ދަނޑުގައި ގިނަ ސަޕޯޓަރުންތަކެއްގެ ކުރިމަތީގައި ކުޅުނު ފޯރިގަދަ މެޗުން އާރްއާރްސީ އަތުން އެޗްޑީސީ މޮޅުވީ ހަނި ތަފާތަކުންނެވެ.
ފުރަތަމަ ހާފުގައި އާރްއާރްސީގެ އިބްރާހިމް މައިސާން (މައި) އަށް ލިބުނު ބޯޅަ ހުއްޓުވީ އެޗްޑީސީގެ ކީޕަރު ފައްޔާޒު ފަޔާޒު (ފައިއްޓެ) އެވެ. މި ހާފުގައި އެޗްޑީސީ އަށް ލީޑުނަގައިދޭން އެ ޓީމުގެ ޔާމީން މުހައްމަދު (ޔާންޓެ) ޖެހި ބޯޅަ ދެ ދަނޑީގައި ޖެހިފައި ބޭރުވިއިރު، އެ ބޯޅަ ދެ ވަނަ ފަހަރުން ގޯލަށް ފޮނުވާލަން މުހައްމަދު ރިއްފަތު (ރިއްޕެ) ޖެހި ބޯޅަ ބޭރުވީ ހުރަސްދަނޑީގައި ޖެހިފަ އެވެ.
އާރްއާރްސީގެ ކެޕްޓަން އިބްރާހިމް އަސްވަދު (ގަބޭ) އަށް އެޗްޑީސީން ގިނަ ފައުލުތަކެއް ކުރި މި މެޗުގައި އޭނާ ފޮނުވާލި ބޯޅަތައް އެޗްޑީސީން ވަނީ ރަނގަޅަށް ޑިފެންސްކޮށްފަ އެވެ. މި މެޗުގައި ފެނިގެންދިޔަ ހަމައެކަނި ގޯލު މެޗުގެ 31 ވަނަ މިނިޓްގައި ޖެހީ އެޗްޑީސީގެ އިބްރާހިމް ރިމާހު (ރިމޭ) އެވެ. އާރްއާރްސީގެ އަލީ ޝާމިސް (ތޮއްޕޭ) އެތެރެއަށް ކުޅުނު ބޯޅައެއް ހޯދައި ރިމޭ ވަނީ ރަނގަޅު ވަގުތުގައި ގޯލުގެ ދުރު ކަނަށް ބޯޅަ ފޮނުވާލައިފަ އެވެ.
ނަތީޖާ ހަމަހަމަކުރަން ގަބޭ ޖެހި ބޯޅައެއް ހުރަސްދަނޑިމަތިން ދިޔައިރު، ހިލޭ ޖެހުމަކުން އާރްއާރްސީގެ އަބްދުﷲ މިދުހަތު ފަހުމީ (ބިޗަޑް) ޖެހި ބޯޅަ ކީޕަރު ފައިއްޓެ ވަނީ ހުށިޔާރުކަމާ އެކު މަތަކޮށްފަ އެވެ.
ގްރޫޕް ޑީގެ އެއް ވަނައިގައި އެޗްޑީސީ އޮތީ ދެ މެޗުން ހަ ޕޮއިންޓާ އެކު އެވެ. ދެ ވަނައިގައި އޮތް އާރްއާރްސީ އަށް ދެ މެޗުން ތިން ޕޮއިންޓް ލިބިފައިވާއިރު، ތިން ވަނައިގައި އޮތް ފެން ކްލަބާއި ހަތަރެއްގައި އޮތް ބީއެމްއެލް އަށް އަދި އެއް މެޗު ކުޅުނުއިރު، ޕޮއިންޓެއް ނުލިބެ އެވެ.
ފަހު މެޗުގައި އެޗްޑީސީން ފެން ކްލަބާ ކުޅޭއިރު، އެ މެޗުން ޕޮއިންޓެއް ހޯދައިގެން ވެސް އަނެއް ބުރުގެ ޖާގަ ލިބޭނެ އެވެ.
ފުރަތަމަ މެޗުގައި ކްލަބް އިމިގްރޭޝަނާ ލަނޑެއް ނުޖެހި އެއްވަރުވި ދިރާގުން ވަނީ މިރޭ ޕްލޭނިން މިނިސްޓްރީ އަތުން 7-2 އިން މޮޅުވެފަ އެވެ. ދިރާގުގެ ގޯލުތައް ޖެހީ އެ ޓީމަށް ކުޅޭ ގައުމީ ޓީމުގެ ފޯވާޑް އަލީ ހައިޝަމް (ޗުމްޕު) ހެޓްރިކެއްގެ އިތުރުން އިބްރާހިމް އަތީގް (އިއްބެ)، ހުޒައިފަތުﷲ އިބްރާހިމް، ފައުޒާން ހަބީބް އަދި ހަސަން ޖުމައިލް އެވެ. ކުޅުނު ދެ މެޗުން ވެސް ބަލިވި ޕްލޭނިން މިނިސްޓްރީން މިރޭ ޖެހި ދެ ގޯލު ވެސް ކާމިޔާބުކުރީ މުހައްމަދު މައުރޫފް ހުސެއިން އެވެ.
ކުޅުނު ފުރަތަަަމަ މެޗުތަކުން ބަލިވި ރާއްޖެ އޮންލައިން (އާރްއޯއެލް) އާއި އޭވިއޭޝަން ސެކިއުރިޓީ (އޭވްސެކް)ގެ މެޗު ނިމުނީ ފޯރިގަދަ ކުރިމަތިލުމަކަށް ފަހު 4-3 އިން އާރްއޯއެލް މޮޅުވެގެންނެވެ. މި މެޗުގެ މޮޅު ކުޅުންތެރިޔާ، އާރްއޯއެލްގެ އައިރޫން އަހުމަދު ރަޝީދު ވަނީ ހެޓްރިކެއް ހަދައިފަ އެވެ. އަނެއް ގޯލު ޖެހީ ފުރަތަމަ ޑިވިޝަނުގައި ކްލަބް ވެލެންސިއާ އަށް ކުޅޭ ޔޫސުފް ރަމީޒް (ރަމީ) އެވެ.
އޭވްސެކްގެ ގޯލުތައް ޖެހީ ކެޕްޓަން ހާޝިމް ހާލިދު (ހާއްޓެ) އާއި ޒައްމަތު މުހައްމަދު ވަހީދު ދެ ގޯލެވެ. މި މެޗުން އޭވްސެކް ބަލިވި އެންމެ ބޮޑު ސަބަބަކީ ގޯލު ޖަހަން ލިބުނު ގިނަ ހުސް ފުރުސަތުތަކެއް ނަގާލުމެވެ.
ފުރަތަމަ މެޗުގައި އެމްޕީއެލް އަތުން ބަލިވި ދިވެހި ސިފައިންގެ ކްލަބުން ވަނީ މިރޭ ކްލަބް 220 (ޕީޖީ) އޮފީސް އަތުން 5-2 އިން މޮޅުވެފަ އެވެ. ސިފައިންގެ ޓީމުގެ ގޯލުތައް ޖެހީ އަހުމަދު ޝައިހާން ޖަލީލް ދެ ގޯލާއި އަބްދުﷲ ސުޖާއު، މުހައްމަދު އަލާއު އަދި އިބްރާހިމް ތޯއިފް ކޮންމެ ކުޅުންތެރިއަކު ގޯލެކެވެ. ކްލަބް 220 ގެ ދެ ގޯލު ޖެހީ އަލީ އިކްރާމާއި އަހުމަދު ސާމިހު އެވެ.
މުބާރާތުގައި މާދަމާ ހަވީރު އޮންނާނީ ކްލަބް މޯލްޑިވްސް ކަޕްގެ އަންހެން ޑިވިޝަން، 18/30 ވިމެންސް ފުޓްސަލް ފިއެސްޓާގެ ދެ މެޗެވެ. ޕޮލިހުން ސިފައިންނާ ކުޅޭއިރު، ފެނަަކަ ބައްދަލުކުރާނީ އެންމެ ފަހުގެ ޗެމްޕިއަން އެމްޕީއެލްއާ އެވެ.
މާދަމާރޭ ކްލަބް މޯލްޑިވްސް ކަޕްގެ ހަތަރު މެޗެއް ކުޅޭނެ އެވެ. އުރީދޫ އާއި މީޑިއާނެޓް ބައްދަލުކުރާއިރު، ކްލަބް އެމްޓީސީސީ ކުޅޭނީ މޯލްޑިވްގޭސްއާ އެވެ. ޕޮލިހުން ޓްރޭޑް ކްލަބާ ކުޅޭއިރު، ސްޓެލްކޯ ކުޅޭނީ މާލެ ސިޓީ ކައުންސިލްއާ އެވެ.
