ކުށުގެ ވެށީގައި އުޅޭ ކުދިން މުޖުތަމައުން އެކަހެރިކޮށްގެން ރިހެބިލިޓޭޓް ކުރަން އަޅާ ފުރަތަމަ ރެޒިޑެންޝަލް ޓްރީޓްމަންޓް ސެންޓަރުގެ ބިންގާ ދ. ކުޑަހުވަދޫގައި މިއަދު އަޅައިފި އެވެ.
މިތަނުގެ ބިންގާ އަޅުއްވައިދެއްވީ ހޯމް މިނިސްޓަރު އިމްރާން އަބްދުﷲ އެވެ.
ކުޑަކުދިންގެ އަދުލުގެ ގާނޫނުގެ ބަޔާންކުރާ މި ސެންޓަރު ބޭނުންކުރާނީ ކުޑަކުދިން އިސްލާހުކޮށްގެން އަލުން މުޖުތަމައަށް ނެރުން ބޭނުންވާ ޕްރޮގްރާމްތައް ހިންގުމަށެވެ. މިތަނުގައި ބައިތިއްބާ ކުދިންނަކީ ކުށުގެ ރެކޯޑަށް ބަލާފައި މުޖުތަމައުން އެކަހެރިކޮށްގެން ރިހެބިލިޓޭޓް ކުރަން ޖެހޭ ގިންތީގެ ކުދިންނެވެ.
ވަކި މުއްދަތަކަށް ކޯޓު އަމުރެއްގެ ދަށުން މިތަނުގައި ކުދިން ބައިތިއްބާނީ ފުރިހަމަ ކުރަން ޖެހޭ ޕްރޮގްރާމްތައް ނިމެންދެންނެވެ.
އެ ރަސްމިއްޔާތުގައި މިނިސްޓަަރު އިމްރާން މި ސެންޓަރު ސިފަކުރެއްވީ އިޖުތިމާއީ ބޮޑު މައްސަލައެއްގެ ހައްލެއްގެ ގޮތުގަ އެވެ. އަދި ވިދާޅުވީ މިއަދު މި އެޅުނު ބިންގަލަކީ ކުޑަކުދިންގެ އަދުލުގެ ޤާނޫނުގެ މައްޗަށް ކުރެވުނު މަސައްކަތްތަކުގެ މުހިއްމު އެއް މަސައްކަތުގެ ބިންގާ ކަމަށެވެ.
އިމްރާން އިތުރަށް ވިދާޅުވީ އުފާވެރި މުޖުތަމައަކަށް ވާން އިގުތިސޯދީ އަދި މާލީ ތަރައްގީއާ އެއްވަރަށް އިޖުތިމާއީ ދުޅަހެޔޮކަމާއި ރައްކާތެރިކަން އޮންނަން ޖެހޭ ކަމަށެވެ. އަދި މި ސަރުކާރުން ކުރަމުންދާ މަސައްކަތުގެ އަމާޒަކީ އެއީ ކަމަށް ވިދާޅުވި އެވެ.
"އިންސާނީ މުޖުތަމައެއް އުފާވެރި ހިތްހަމަޖެހޭ މުޖުތަމައަކަށް ވާނީ އިޤްތިސާދީ ތަނަވަސްކަމާއި, ތިޔާގިކަމާ އެއްވަރަށް ނުވަތަ އެއަށް ވުރެ ކުރިއަށް އިޖުތިމާއީ ދުޅަހެޔޮކަމާއި, ބަދަހިކަމާއި ރައްކާތެރިކަން ހޯދައިގެން." އިމްރާން ވިދާޅުވިއެވެ.
ހޯމް މިނިސްޓަރު އިމްރާން އަބްދުﷲ ބިންގާ އެޅުމުގެ ރަސްމިއްޔާތުގައި ވާހަކަ ދައްކަވަނީ. -- ފޮޓޯ: ހޯމް މިނިސްޓްރީ
ދެ ބުރީގެ މި އިމާރާތް އަޅަން ހަވާލުކުރީ 21.6 މިލިއަން ރުފިޔާއަށް ވީއަވާ ޕްރައިވެޓް ލިމިޓެޑާ، ދޮޅު އަހަރުން ނިންމާ ގޮތަށެވެ.
