ބްރެޒިލް އިން ރާއްޖެއަށް ވައިގެ މަގުން އައި 28 އަހަރުގެ ބްރެޒިލް ފިރިހެނެއްގެ އަތުން ގާތްގަނޑަކަށް 19 ކިލޯގެ ކޮކެއިން ކަސްޓަމްސް އިން އަތުލައިގެންފި އެވެ.
މިއީ މި އަހަރުގެ ތެރޭގައި ބްރެޒިލް މަގުން އެތެރެކުރަނިކޮށް މަސްތުވާތަކެތި އަތުލައިގަތް ހަތަރު ވަނަ ފަހަރެވެ.
އެކަމަކު މިއީ މި އަހަރުގެ ތެރޭގައި އެ ގައުމުން އަންނަނިކޮށް އެންމެ ގިނަ އަދަދެއްގެ މަސްތުވާތަކެތި އަތުލައިގަނެވުނު ފަހަރެވެ. މިފަހަރު އަތުލައިގަތް ކޮކެއިންގެ މަގުމަތީ އަގަކީ 94 މިލިއަން ރުފިޔާ އެވެ.
ބްރެޒިލް މަގުން 2021 ގައި އަތުލައިގެންފާ ކޮކެއިންގެ ބަރުދަނާއި މަގުމަތީ އަގު
ޖެނުއަރީ - 3.12 ކިލޯ (10.9 މިލިއަން ރުފިޔާ)
- އޮގަސްޓު - 3.179 ކިލޯ (15.9 މިލިއަން ރުފިޔާ)
- އޮގަސްޓު - 16.723 ކިލޯ (83 މިލިއަން ރުފިޔާ)
ކަސްޓަމުން ބުނީ ނޮވެންބަރު މަހު ރާއްޖެއަށް ދަތުރުކުރި މި މީހާއާ މެދު ޝައްކުކުރެވިގެން ފާސްކުރިއިރު، މަސްތުވާތަކެތި ފެނުނީ އޭނާގެ ލަގެޖު ތެރެއިން ކަމަށެވެ. އަދި އޮންނަ އުސޫލުގެ ތެރެއިން މައްސަލަ ބަލަން ފުލުހުންނާ ހަވާލުކޮށްފައިވާ ކަމަށެވެ.
