ކާބުލް، އަފްގާނިސްތާން (ނޮވެމްބަރު 23) - ޓީވީ މީޑިއާގައި އަންހެނުންގެ ދައުރު ލިމިޓު ކުރުމަށް ފަހު ތާލިބާނުން ނެރުނު ގައިޑްލައިންއާ މެދު އަފްގާނިސްތާނުގެ ނޫސްވެރިން ނުރުހުން ފާޅުކޮށްފި އެވެ.
ރަނގަޅު ކަންކަން ކުރިއަރުވައި، ނުބައި ކަންކަން މަނާ ކުރުމަށް ހާއްސަ މިނިސްޓްރީން އާދީއްތަ ދުވަހު ޓީވީ ޗެނަލްތަކަށް އެންގީ އަންހެން އެކްޓަރުން ހިމެނޭ ޑްރާމާތައް ދެއްކުން ހުއްޓާލުމަށެވެ.
އިސްލާމްދީނާއި އަފްގާނިސްތާނުގެ އުސޫލުތަކަށް ނުފެރޭ ފިލްމާއި ޕްރޮގްރާމްތައް ދެއްކުން ހުއްޓާލުމަށް ވެސް އެންގި އެވެ. އަންހެން ނޫސްވެރިން ޓީވީ އަށް އަރާއިރު، ހިޖާބް އަޅައިގެން ތިބުމަށް ވެސް އެންގި އެވެ.
ހުސް އަންހެން ޕްރޮޑިއުސަރުންނާއި ރިޕޯޓަރުންނާ އެކު އަފްގާނިސްތާނުގައި ފުރަތަމަ އުފެއްދި ޒާން ޓީވީ އިން ބުނީ "ގައިޑްލައިނުން މީޑިއާގެ މިނިވަންކަމަށް ހުރަސް އެޅޭ" ކަމަށެވެ.
ގައިޑްލައިންގައި ހިޖާބް މާނަކޮށްފައި އޮތީ ކޮން ގޮތަކަށްކަން ސާފު ނުވާ ކަމަށް ރިޕޯޓުތައް ބުނެ އެވެ. އަފްގާނިސްތާނުގެ ގިނަ އަންހެނުންނަކީ ހަށިގަނޑު ނިވާކޮށް، ބުރުގާ އަޅާ މީހުންނެވެ.
މީޑިއާއާ ގުޅޭ ގައިޑްލައިނެއް އާއްމުކޮށްފައި މި ވަނީ ތާލިބާނުން ވެރިކަމަށް އައިތާ ތިން މަސް ފަހުންނެވެ.
ފެޑެރޭޝަން އޮފް އަފްގާން ޖާނަލިސްޓްސްގެ ފައުންޑަރު ހުޖާތުﷲ މުޖާދިދީ ވިދާޅުވީ ގައިޑްލައިން ތަންފީޒުކޮށްފި ނަމަ ބައެއް މީޑިއާތައް ހިންގުން ހުއްޓާލަން ޖެހޭނެ ކަމަށެވެ.
ޓީވީ ޗެނަލްތަކުގައި ހުސް ވަގުތު ފުރިހަމަ ކުރުމަށް މިހާރު އާއްމުކޮށް ދައްކަނީ އިންޑިއާ އާއި ތުރުކީގައި އުފައްދާފައި ހުންނަ ޑްރާމާތަކެވެ. އެއީ އާ ގައިޑްލައިނަށް ނުފެތޭ ކޮންޓެންޓެވެ.
