ދާކާ، ބަންގްލަދޭޝް (ނޮވެމްބަރު 22) - ކުރީގެ ބޮޑު ވަޒީރު ހާލިދާ ޒިއާ ބޭސް ފަރުވާ އަށް ގައުމުން ބޭރަށް ވަޑައިގެންނެވުމުގެ ހުއްދަ ދިނުމަށް ގޮވާލައި އެތައް ހާސް ބަޔަކު އެއްވެއްޖެ އެވެ.
އެއްވުމުގައި ހަމަނުޖެހުން އުފެދި، ކަރުނަ ގޭސް ޖެހުމުގެ ސަބަބުން 20 މީހުންނަށް އަނިޔާވި އެވެ. މިހާރުގެ ބޮޑު ވަޒީރު ޝެއިހް ހަސީނާއާ އެންމެ ވާދަވެރި، އުމުރުން 76 އަހަރުގެ ޒިއާ ދާކާގެ ހޮސްޕިޓަލެއްގައި އެޑްމިޓު ކުރެއްވީ މި މަހުގެ ކުރީކޮޅު އެވެ.
ދެހާސް އަށާރަ ވަނަ އަހަރު ކޮރަޕްޝަންގެ ކުށް ސާބިތުވެފައި ވާތީ ގައުމުން ބޭރަށް ދަތުރު ކުރުން ކޯޓުން ވަނީ އެކަމަނާ އަށް މަނާކޮށްފަ އެވެ.
"އެކަމަނާގެ ހާލު ސީރިއަސް. އެމެރިކާ އާއި ޖަރުމަނުވިލާތް ނުވަތަ އިނގިރޭސިވިލާތް ފަދަ ތަރައްގީވެފައިވާ ގައުމަކުން އަވަސް ފަރުވާ ބޭނުންވޭ. މި ސަރަހައްދުގައި އެކަމަނާ އަށް ދެވޭނެ ފަރުވާއެއް ނެތް،" ޑޮކްޓަރު އޭޒީއެމް ޒާހިދު ހުސެން ވިދާޅުވި އެވެ.
ހޯމަ ދުވަހު ދާކާގެ ނޭޝަނަލް ޕްރެސް ކްލަބު ކުރިމަތީގައި ބޭއްވި އެއްވުމަށް 15،000 އަށް ވުރެ ގިނަ މީހުން ޖަމާވި އެވެ. އޭގެ ތެރޭގައި ހިމެނެނީ އެކްޓިވިސްޓުންނާއި ޒިއާގެ ބަންގްލަދޭޝް ނޭޝަނަލިސްޓް ޕާޓީ (ބީއެންޕީ) ގެ ސަޕޯޓަރުންނެވެ. ނަމަވެސް ފުލުހުން ބުނީ އެއްވީ 7،000 މީހުން ކަމަށެވެ.
އެއްވުމުގެ ސެކިއުރިޓީ ބަލަހައްޓަށް އެތައް ސަތޭކަ ފުލުހުންނެއް އުޅުނެވެ. އެންމެ ފަހުން 2001 އިން 2006 އަށް ވެރިކަން ކުރި ބީއެންޕީން ވަނީ އެހެން ސިޓީތަކާއި އަވަށްތަކުގައި ވެސް އެއްވުންތައް ބާއްވާފަ އެވެ.
ބީއެންޕީން ބުނީ ލިވާ ޑިޒީޒް އާޢި ކްރޯނިކް ކިޑްނީ ޑިޒީޒް އަދި ހިތުގެ މައްސަލަތައް ޒިއާ އަށް ކުރިމަތިވެވަޑައިގެންފައިވާ ކަމަށެވެ. އެ ކަންކަމުގެ އިތުރުން ކުރިން ވެސް ދިމާވަމުން ދިޔަ ރިޔުމަޓޮއިޑް އާތްރައިޓިސް އާއި ހަކުރު ބަލި ވެސް ގޯސްވަމުންދާ ކަމަށް ބުންޏެވެ.
ބަންގްލަދޭޝްގެ ކުރީގެ ބޮޑު ވަޒީރު ހާލިދާ ޒިއާ ފުރޮޅުލީ ގޮނޑީގައި.
މިދިޔަ ހަފުތާގައި ބޮޑު ވަޒީރު ހަސީނާ ވަނީ ޒިއާގެ އާއިލާ އާއި ޕާޓީގެ އެދުމާ ގުޅޭ ގޮތުން ކުރެވޭނެ ކަމެއް ނެތް ކަމަށް ވިދާޅުވެފަ އެވެ.
"އަޅުގަނޑަށް ކުރެވެން ހުރި ހުރިހާ ކަމެއް ހާލިދާ ޒިއާ އަށް ކޮށްދީފިން. ދެން ކުރިއަށް ދާންވީ ގޮތް ނިންމަން ޖެހޭނީ ގާނޫނުން،" ޕްރެސް ކޮންފެރެންސެއްގައި ހަސީނާ ވިދާޅުވި އެވެ.
"އަޅުގަނޑަށް ލިބިފައި ހުރި ހުރިހާ ބާރެއް ބޭނުންކޮށްގެން ހާލިދާ ޒިއާ ޖަލަށް ނުގެންގޮސް، ގޭގައި ބެހެއްޓޭނެ ގޮތް އެ ވަނީ ހަދާފައި."
ކޮރަޕްޝަންގެ ކުށް ޒިއާގެ މައްޗަށް ސާބިތުވެ، 10 އަހަރަށް ޖަލަށް ހުކުމް ކުރީ ފެބްރުއަރީ 2018 ގަ އެވެ. ނަމަވެސް އެކަމަނާގެ ޕާޓީން ބުނީ އެއީ ސިޔާސީ ހުކުމެއް ކަމަށެވެ.
ޖަލުގައި ހުންނެވުމަށް ފަހު ސިއްހީ ހާލުކޮޅު ގޯސްވާން ފެށުމުން އެކަމަނާ ގެއަށް ދޫކޮށްލީ މާޗް 2020 ގަ އެވެ. އޭގެ ފަހުން ކޯޓު މެދުވެރިކޮށް ގައުމުން ފުރުން މަނާކުރި އެވެ.
