ޕެރިސް (ނޮވެމްބަރު 22) - ފްރެންޗް ލީގުގައި ރޭ ކުޅުނު މެޗުގައި ސަޕޯޓަރަކު އެއްލި ފުޅިއަކުން މާސޭގެ ޑިމިޓްރީ ޕަޔެޓް ބޮލުގައި ޖެހުމުން، މާސޭ އާއި ލިޔޯން ބައްދަލުކުރި މެޗު ހުއްޓާލައިފި އެވެ.
ކޯނަރެއް ނަގަން ގޮސް ހުއްޓައި ޕަޔެޓް ބޮލުގައި ފުޅިއަކުން ޖެހުމާ އެކު މެޗުގެ ރެފްރީ ރޫޑީ ބުކޭ ވަނީ ދެ ޓީމުގެ ކުުޅުންތެރިން ވަގުތުން ޗޭންޖިން ރޫމަށް ފޮނުވާލައިފަ އެވެ. ރައްކާތެރިކަން ކަށަވަރުނުވާތީ މާސޭ ކުޅުންތެރިން އަނބުރާ ދަނޑަށް ނުނިކުންނަން ނިންމިއިރު، ރެފްރީ އަށް ޖެހުނީ މެޗު ހުއްޓާލާށެވެ. އެ ގޮތަށް ނިންމީ ދެ ގަޑިއިރެއްހާއިރު، މެޗު އަލުން ފެށޭތޯ ބެލުމަށް ފަހު އެވެ.
ރޭގެ މެޗުގައި ސަޕޯޓަރަކު އެއްލި ފެންފުޅި ޕަޔެޓް ބޮލުގައި ޖެހިފައި ވެއްޓެނީ.-
މި ސީޒަނުގައި މާސޭގެ ގިނަ މެޗުތަކެއްގައި ސަޕޯޓަރުންގެ ގިނަ ކަންތައްތަކެއް ވަނީ ހިނގައިފަ އެވެ. އެ ގޮތުން ސީޒަންގެ ފުރަތަމަ މެޗުގައި މޮންޓެޕިއޭ ދަނޑުގައި މާސޭގެ ވަލެންޓިން ރޮނީގާ ގައިގައި ވެސް ފުޅިއަކުން ޖެހި އެވެ. އޭގެ ފަހުން މާސޭ އާއި ނީސްއާ ކުޅުނު މެޗުގައި ޕަޔެޓާ ދިމާލަށް ފުޅި އެއް އެއްލުމުން އޭނާ ވަނީ އަނބުރާ ސަޕޯޓަރުންނާ ދިމާލަށް އެ ފުޅި އެއްލައިފަ އެވެ.
އެ މައްސަލައިގައި ނީސްގެ ދެ ޕޮއިންޓު އުނިކުރަން ނިންމައި ޕަޔެޓަށް އެއް މެޗުގެ ސަސްޕެންޝަނެއް އަ އެވެ.
ޕަޔެޓަށް ރޭގެ މެޗުގައި ހަމަލާދިން ސަޕޯޓަރުން ހައްޔަރުކޮށްފައިވާ ކަމަށް ދަނޑުގައި އިއުލާނުކުރި ފަހުން ލިޔޯން ކުޅުންތެރިން ވަނީ އަލުން މެޗު ފެށޭތޯ ވޯމްއަޕަށް ނުކުމެފަ އެވެ.
އެކަމަކު، މާސޭ ޓީމު މެޗު ކުޅެން ބޭނުންނުވާތީ ރޭ އިތުރަށް މެޗު ކުރިއަށް ނުދިޔަ އެވެ. ލިޔޯންގެ ރައީސް ޖީން-މިޝެލް އޯލަސް ވަނީ މާސޭގެ ފަރާތުން މައާފަށް އެދި މެޗު ކުރިއަށް ނުގެންދެވުނު ސަބަބުތައް ދެނެގަނެ ވީ އެންމެ އަވަހަށް ގޮތްތަކެއް ނިންމަން ފްރާންސްގެ ފުޓްބޯޅަ ފެޑެރޭޝަނަށް ގޮވާލައިފަ އެވެ.
