ނިއު ދިއްލީ، އިންޑިއާ (ނޮވެމްބަރު 21) - މަސްތުވާތަކެތީގެ ބާވަތެއް ކަމަށްވާ މެރުއާނާ ވަގަށް އެތެރެކޮށް ވިއްކަން އެމެޒޯންގެ އޮންލައިން ޕޯޓަލް ބަޔަކު ބޭނުންކޮށްފައިވާކަމުގެ ތުހުމަތުގައި އެ ކުންފުނީގެ އިންޑިއާ ގޮފީގެ ވެރިންތަކަކަށް ދައުވާކޮށްފި އެވެ.
މިދިޔަ ހަފުތާގައި އިންޑިއާގެ މެދުގައި އޮންނަ މަދްޔަ ޕްރަދޭޝް ސްޓޭޓުން ދެ ފިރިހެނުން ހައްޔަރު ކުރީ 21 ކިލޯގްރާމްގެ މެރުއާނާއާ އެކު އެވެ. އެ މީހުން ބުނެފައި ވަނީ އެ ތަކެތި އިންޑިއާގެ އެކި ހިސާބުތަކަށް ފޮނުވަން ބޭނުން ކުރަނީ އެމެޒޯން ކަމަށެވެ.
ފުލުހުންގެ ރިޕޯޓުގައިވާ ގޮތުގައި އެމެޒޯން މެދުވެރިކޮށް އެ މީހުން އެ ތަކެތި ވިއްކީ ފޮނި ރަހަ ލެއްވުމަށް ބޭނުން ކުރާ "ނެޗުރަލް ސްވީޓްނާ" އެއް ކަމަށްވާ ސްޓޭވިއާގެ ގޮތުގައި މާކެޓުކޮށްގެންނެވެ.
އެމެޒޯން އިންޑިއާގެ ވެރިންނަށް ދައުވާ ކުރަން ނިންމީ ކުންފުނިން ފުލުހަށް ދިން ބަޔާނާއި ފުލުހުން ހޯދި ހެކިތަކާ ދިމާނުވާތީ ކަމަށް ފުލުހުންގެ ރިޕޯޓުގައިވެ އެވެ. ނަމަވެސް ދައުވާ ކުރަނީ ކިހާ އަދަދެއްގެ ވެރިންނަށް ކަމެއް އަދި ސާފެއް ނޫނެވެ.
އެމެޒޯން އިން ބުނީ ކުންފުނީގެ އެތެރޭގެ ތަހުގީގެއް ވެސް ކުރިއަށްދާ ކަމަށާއި ފުލުހުންނަށް ފުރިހަމަ އަށް އެއްބާރުލުން ފޯރުކޮށްދެމުންދާ ކަމަށެވެ.
"ގާނޫނުން ވިއްކުން މަނާ އެއްވެސް އެއްޗެއް ލިސްޓުކޮށް ވިއްކުމަށް އަޅުގަނޑުމެން ހުއްދައެއް ނުދެން،" ކުންފުނީގެ ތަރުޖަމާނަކު ވިދާޅުވި އެވެ.
އިންޑިއާ އަކީ އެމެޒޯން ކުންފުނީގެ މުހިއްމު މާކެޓެކެވެ. އިންޑިއާ ގައި އެ ކުންފުނީގެ ވިޔަފާރި 2013 ވަނަ އަހަރު ފެށި ފަހުން އިންވެސްޓްމަންޓުގެ އަގު 6.5 ބިލިއަން ޑޮލަރަށް އަރަ އެވެ.
