ރާއްޖޭގެ ޖަލުތަކުގައި ހުރި ކެޕޭސިޓީގެ މައްސަލަތަކަށް ހައްލެއް ގެނައުމުގެ ގޮތުން 250 ޖާގަ އިތުރުކޮށް، މާލޭގައި ހުންނަ ޖަލު އަންނަ އަހަރު ތެރޭ ހުޅުމާލެއަށް ބަދަލުކުރުމަށް ސަރުކާރުން ނިންމާފައިވާކަމަށް ހޯމް މިނިސްޓަރު އިމްރާން އަބްދުﷲ ވިދާޅުވެއްޖެ އެވެ.
މިހާރު ކުރިޔަށްދާ ޕްރެސް ކޮންފަރެންސްއެއްގައި ވާހަކަދައްކަވަމުން ހޯމް މިނިސްޓަރު އިމްރާން އަބްދުﷲ ވިދާޅުވީ ރާއްޖޭގެ ޖަލުތަކުގައި ހުރި މައްސަލަތައް ދަނެގަނެ، އެކަންކަން ހައްލުކުރުމަށްޓަކައި ސަރުކާރުން ކޮވިޑުގެ ހާލަތުގައި ވެސް ބޮޑެތި މަސައްކަތްތަކެއް ކޮށްފައިވާކަމަށެވެ.
އެގޮތުން ސަރުކާރުން ކޮވިޑާއެކުގައި ވެސް ޖަލުތަކަށް ދިމާވެފަ ހުރި ޖާގައިގެ ދަތިކަން ހައްލުކުރުމަށް މަސައްކަތްތަކެއްކޮށް، ރިމާންޑް އަދި އެހެނިހެން ކުއްވެރިންނަށް ވެސް އިތުރު ޖާގަ މިހާރު ހަދާފައިވާކަމަށް މިނިސްޓަރު އިމްރާން ވިދާޅުވި އެވެ.
"މިދިޔަ މުއްދަތުގެ ތެރޭގައިވެސް މި ގޮންޖެހުންތަކާއެކުވެސް، ކަރެކްޝަނަލް ސާވިސްގެ ދަށުގައި ހިނގާ ޖަލުތަކަށް 250 ޖާގަ އަޅުގަނޑުމެން ވާނީ އިތުރު ކޮށްފައި،" މިނިސްޓަރު އިމްރާން ވިދާޅުވި އެވެ.
އަދި ރިމާންޑް ކުއްވެރިން ބޭއްތިބުމުގައި ކުރިމަތިވެފައިވާ ޖާގައިގެ ދަތިކަން އަދި ޖަލުތަކުގެ ހާލަތަށް ރިއާޔަތްކޮށް ސަރުކާރުން ބޮޑެތި މަސައްކަތްތަކެއް ކޮށްފައިވާކަމަށް މިނިސްޓަރު ވިދާޅުވި އެވެ.
އެ މަސައްކަތުގެ ނަތީޖާއެއްގެ ގޮތުން ޖަލުތަކަށް ކުރިމަތިވެފައިވާ ދަތިތަކަށް ވަރަށް ފުރިހަމަ ހައްލެއް ލިބިގެންދާނެކަމަށް ވެސް މިނިސްޓަރު އިމްރާން ވިދާޅުވި އެވެ.
"ރިމާންޑް ޖާގައަށް 400 އެއްހާ ޖާގަ އިތުރުކުރެވިގެންދާނެ. މީ މިހާރު ހާއްސަކޮށް ރިމާންޑް ކުށްވެރިން ގެންގުޅެން ޖެހިފައިވާ ވުމަށް، ކުރިމަތިވެފައިވާ ބޮޑު މައްސަލައަށް ލިބިގެންދާނެ ވަރަށް ފުރިހަމަ ހައްލެއް،" މިނިސްޓަރު އިމްރާން ވިދާޅުވި އެވެ.
އޭގެ އިތުރުން ވެސް މާލެ ޖަލު ހުޅުމާލެއަށް ބަދަލުކުރުމަށް ވެސް ސަރުކާރުން ނިންމާފައިވާކަމަށް މިނިސްޓަރު ވިދާޅުވި އެވެ.
އަދި މިހާރު އެކަމަށްވާންޖެހޭ ތައްޔާރީތައްވުމުގެ ފަހުގެ މަރުހަލާތައް ކުރިއަށް ދާކަމަށާއި އެ ހުރިހާ ކަމަކާއެކު ޖަލުތަކުގައި ހުރި ގިނަ މައްސަލަތަކެއް ހައްލުވެ ގައިދީންގެ ހައްގުތައް ވެސް ކަށަވަރުވެގެންދާނެ ކަމަށް މިނިސްޓަރު އިމްރާން ވިދާޅުވި އެވެ.
"އަޅުގަނޑުމެން މިހާރު މަސައްކަތްކުރަމުން ދަނީ މާލެ ޖަލު ހުޅުމާލެއަށް ބަދަލުކުރުމުގެ މަސައްކަތްކުރުމަށް. މިހާރު ވަނީ އެކަމަށްތަކައި ވާންޖެހޭ ތައްޔާރީވުމުގެ ފަހުގެ މަރުހަލާގައި،" މިނިސްޓަރު އިމްރާން ވިދާޅުވި އެވެ.
