ހާރްތޫމް، ސޫދާން (ނޮވެމްބަރު 21) - އަސްކަރީ ބަގާވާތެއް ހިންގައިގެން އުޅޭ ސޫދާނުގައި ސިޔާސީ ޑީލަކަށް އައުމަށް ފަހު ބޮޑު ވަޒީރު އަބްދުﷲ ހަމްދޮކް އަށް އަލުން ބާރުތައް ދޭން ނިންމައިފި އެވެ.
ރިޕޯޓުތައް ބުނާ ގޮތުން އަސްކަރީ ޖެނެރަލް އަބްދުލް ފައްތާހް އަލް ބުރްހާން އާއި ހަމްދޮކްއާ ދެމެދު އެކުލަވާލި އެއްބަސްވުމުގެ ދަށުން ޖަލުގައި ތިބި ހުރިހާ ސިޔާސީ ލީޑަރުން ދޫކޮށްލާނެ އެވެ.
އޮކްޓޯބަރު 25 ވަނަ ދުވަހު ހިންގި އަސްކަރީ ބަގާވާތެއްގައި ކުއްލި ނުރައްކަލުގެ ހާލަތު އިއުލާނުކޮށް، ދެ އަހަރު ވަންދެން އޮތް ސަރުކާރުގެ ލީޑަރުން ހައްޔަރު ކުރި އެވެ.
އެއާއެކު ބައިނަލްއަގްވާމީ މުޖުތަމައިން ނުރުހުން ފާޅުކޮށް، އަސްކަރީ ވެރިންނާ މެދު ފިޔަވަޅު އެޅި އެވެ. އަދި ސޫދާނުގެ ރައްޔިތުން ބޮޑެތި އެއްވުންތައް ބޭއްވި އެވެ.
ބަގާވާތަށް ފަހު އަލުން ސުލްހަ ގެނެވޭތޯ މަޝްވަރާތަކުގައި އިސްކޮށް އުޅުނު އެކެޑެމިކް އޮފިޝަލުންނާއި، ނޫސްވެރިން އަދި ސިޔާސީ ފަރާތްތައް ގުޅިގެން ނެރުނު ބަޔާނެއްގައި ވަނީ އެއްބަސްވި ކަންކަން ހާމަކޮށްފަ އެވެ.
އެގޮތުން ބޮޑު ވަޒީރުގެ ބާރުތައް އަލުން ހަމްދޮކް އަށް ދެއްވުމާއި، ހައްޔަރުކޮށްފައި ތިބި އެންމެން މިނިވަން ކުރުމާއި، ގާނޫނީ ވެރިކަން އިއާދަކުރުން ހިމެނެ އެވެ.
ވިހި އަހަރު ވަންދެން ވެރިކަން ކުރި ރައީސް އުމަރް އަލް ބަޝީރުގެ ވެރިކަން ނިމުމަކަށް އައީ އޭޕްރިލް 2019 ގައި ބޮޑެތި އެއްވުންތަކަކަށް ފަހު ސިފައިން ހިންގި ބަގާވާތެއްގަ އެވެ.
އޭގެ ފަހުން ގާއިމްކޮށްފައި އޮތީ އާއްމުންނާއި ސިފައިންގެ މެދުގައި ބާރުތައް ހިއްސާކުރާ ސަރުކާރެކެވެ. ނަމަވެސް ސެޕްޓެމްބަރު މަހު ސިފައިން ބަގާވާތް ކުރަން އުޅެ ނާކާމިޔާބުވި އެވެ.
އޭގެ ފަހުން އޮކްޓޯބަރުގައި ބަގާވާތް ކުރުމުން، ރައްޔިތުން ނުކުމެ ކުރަމުންދާ މުޒާހަރާތަކުގައި 40 އަށް ވުރެ ގިނަ މީހުން މަރުވެފައި ވެ އެވެ.
