ހދ. ކުޅުދުއްފުށި ރީޖަނަލް ހޮސްޕިޓަލް (ކޭއާރްއެޗް)އަށް އައިސްފައިވާ ތަރައްގީން ކުޅުދުއްފުއްޓާއި ކައިރި ރައްތަކާއި ދުރު ރައްތަކުގެ މީހުންނަށް ވެސް ފައިދާ ކުރަމުންދާ ކަމަށް ނައިބް ރައީސް ފައިސަލް ނަސީމް ވިދާޅުވެއްޖެ އެވެ.
ހއ އަދި ހދ އަށް ކުރައްވަމުން ގެންދަވާ ދެ ދުވަހުގެ ދަތުރުފުޅުގައި މިއަދު ހަވީރު ވަނީ ކުޅުދުއްފުށި ސިޓީއަށް ވަޑައިގެންފަ އެވެ.
ރިޕްރޮޑަކްޓިވް ހެލްތް ސެންޓަރު ހުޅުވުމަށް ކުޅުދުއްފުށީ ރީޖަނަލް ހޮސްޕިޓަލުގައި ބޭއްވި ރަސްމިއްޔާތުގައި ވާހަކަ ދައްކަވަމުން ނައިބް ރައީސް ވިދާޅުވީ ސިއްހީ ނިޒާމް ތަރައްގީކޮށް ފުޅާ ކުރުމަށްޓަކައި މި ސަރުކާރުން ގިނަ މަސައްކަތްތަކެއް ކުރަމުންދާ ކަމަށެވެ. އެގޮތުން ނައިބް ރައީސް ވަނީ ކޭއެޗްއާރްއަށް އައިސްފައިވާ ބަދަލުތަކާއި ހިދުމަތް ހޯދުމަށް އަންނަ މީހުންގެ އަދަދު އިތުރުވެފައިވާކަން ފާހަގަކުރައްވާފަ އެވެ.
"އަޅުގަނޑުމެންނަށް ކުޅުދުއްފުށިން ފަށައިގެންގޮސް ސ އަތޮޅާ ހަމަށް ގިނަ ހިދުމަތްތަކެއް ދިނުމަށްޓަކައި މި ވަނީ ފެށިފައި. އޭގެ ހެޔޮ ނަތީޖާ ވަރަށް ބޮޑަށް ދަނީ ފެންނަމުން. ކުޅުދުއްފުށި ހޮސްޕިޓަލަށް ގެނެވުނު ތަރައްގީއާ އިތުރު ކުރެވުނު ހިދުމަތްތަކުގެ ފަސޭހަކަން ވަރަށް ކައިރި އަތޮޅުތަކާއި ދުރު ހިސާބުތަކުގެ ރައްޔިތުންނަށް ވަނީ ކޮށްފައި،" ނައިބް ރައީސް ވިދާޅުވި އެވެ.
މީގެ އިތުރުން ކޭއާރްއެޗަށް އައިސްފައިވާ ކުރިއެރުން ފާހަގަކޮށް ނައިބް ރައީސް ވިދާޅުވީ ވޭތުވެދިޔަ ތިން އަހަރުތެރޭ ތަފާތު އެކި ހިދުމަތް ހޯދި މީހުންގެ އަދަދު ތިން ލައްކައަށް އަރާފައިވާ ކަމަށެވެ.
އުތުރުގެ ހަތަރު ރަށަކަށް ނައިބު ރައީސްގެ ދަތުރުފުޅުގައި އެންމެ ފުރަތަމަ ވަޑައިގެންފައި ވަނީ ހއ. ހޯރަފުއްޓަށެވެ. އެއަށްފަހު ހދ. ނެއްލައިދުއަށެވެ. އޭގެ ފަހުން ވައިކަރަދޫ އަށްފަހު އެންމެ ފަހު ރަށަކަށް ވަޑައިގެންފައިވަނީ ކުޅުދުއްފުއްޓަށެވެ.
