މޮންޓްރިއަލް، ކެނެޑާ (ނޮވެމްބަރު 20) - ކެނެޑާ އަށް އެރި ތޫފާނެއްގައި ހުޅަނގުގެ ހިސާބުތަކަށް ކުރަމުންދާ އަސަރުތަކާ ހެދި ތެޔޮ ލިބުން ދަތިވެ ރޭޝަންކޮށްފި އެވެ.
މިދިޔަ އާދީއްތަ އަދި ހޯމަ ދުވަހު ބްރިޓިޝް ކޮލަމްބިއާ ސަރަހައްދަށް ރިކޯޑް މިންވަރަށް ވާރޭ ވެހުނެވެ. އޭގެ ސަބަބުން ފެންބޮޑުވެ، ބިންގަނޑު ކަނޑައިގެން ދިޔުމުގެ ހާދިސާތައް ހިނގި އެވެ.
ބައެއް ބޮޑެތި މަގުތަކާއި އެހެނިހެން އިންފްރާސްޓްރަކްޗާ އަށް ގެއްލުންވެފައި ވާއިރު، ތެޔޮ ސަޕްލައި ކުރަން ބޭނުން ކުރާ ޓްރާންސް މައުންޓެން ޕައިޕްލައިން ވަނީ ވަގުތީ ގޮތުން ބަންދުކޮށްފަ އެވެ.
އެ ޕްރޮވިންސްގެ ޕަބްލިކް ސޭފްޓީ މިނިސްޓަރު މައިކް ފާންވޯތު ވިދާޅުވީ ތެޔޮ ބޭނުން ކުރުން މަދުކޮށް، ތަންތަނަށް ދަތުރު ކުރުން މަދު ކުރުމަށް އާއްމުންގެ ކިބައިން އެދޭ ކަމަށެވެ.
މިހާރު އަޅާފައިވާ ފިޔަވަޅުތަކުގެ ދަށުން ޕެޓްރޯލް ސްޓޭޝަންތަކުން ލިބޭނީ ކޮންމެ މީހަކަށް 30 ލީޓަރުގެ ތެލެވެ. ތެލުގެ ސަޕްލައި ލިމިޓުވެފައި ވާތީ އެ ޕްރޮވިންސުން އެދެނީ ޒަރޫރީ ބޭނުމެއްގައި ނޫން ގޮތަކަށް ދަތުރު ނުކުރުމަށެވެ.
ތޫފާނާ ހެދި ކުރި އަސަރުގައި ގެއްލުނު ހަތަރު މީހަކު ހޯދުމުގެ މަސައްކަތް ޕެމްބަޓަން ސަރަހައްދުގައި އަދިވެސް ދަނީ ކުރަމުންނެވެ. މިދިޔަ ބުދަ ދުވަހުން ފެށިގެން ސިފައިން އަންނަނީ މަގުތައް ސާފުކޮށް، އާއްމުންނަށް އެހީވަމުންނެވެ.
މި ފެށޭ ހަފުތާގައި ވެސް ކެނެޑާގެ ހުޅަނގު ހިސާބުތަކަށް ބޯކޮށް ވާރޭ ވެހޭނެ ކަމަށް ވަނީ ލަފާކޮށްފަ އެވެ. ފާއިތުވި މަހެއްހާ ދުވަސް ތެރޭގައި ކެނެޑާގެ ޕެސިފިކް އައްސޭރިފަށަށް ވަނީ ގިނަ އަދަދެއްގެ ގުދުރަތީ ކާރިސާތަކާ ދިމާވެފަ އެވެ. އެގޮތުން އާދަޔާ ހިލާފަށް ހޫނުގަދަވުމާއި ޖަންގަލިތަކުގައި ރޯވުމުގެ މައްސަލަ ދިމާވި އެވެ.
