އިންޑިއާގެ ދަނޑުވެރިން ހުއްޓުމެއް ނެތި މުޒާހަރާ ކުރާތާ އަހަރެއް ފާއިތުވި ފަހުން ބޮޑު ވަޒީރު ނަރެންދްރަ މޯދީ އެންމެ ފަހުން ދޫދެއްވައި، ދަނޑުވެރިން ކަންބޮޑުވި ގާނޫނުތައް އުވާލައްވައިފި އެވެ.
މިދިޔަ އަހަރުގެ ނޮވެމްބަރު މަހުން ފެށިގެން އެތައް ހާސް ދަނޑުވެރިން ތިބީ ވެރިރަށް ނިއު ދިއްލީ ވަށައިގެންވާ ސަރަހައްދުތަކުގައި ކޭމްޕު ޖަހައިގެންނެވެ. އެ ތަނުގައި ޓެންޓުތަކުގައި އުޅުނު އިރު ދިމާވި ފިންޏާއި ހޫނުގެ އިތުރުން ކޮވިޑުގެ ސަބަބުން ވެސް އެތައް ދަނޑުވެރިންނެއް މަރުވެފައިވެ އެވެ.
ދަނޑުވެރިން މުޒާހަރާ ކުރަން ފެށީ ސަރުކާރުން ހެދި ތިން ގާނޫނެއްގެ ދަށުން ދަނޑުވެރިންގެ އާމްދަނީއަށް ގެއްލުންވެ، މަހުޖަނުންނަށް ބިންތައް ލިބޭނެ ކަމަށް ބުނެ އެވެ.
ދަނޑުވެރިންގެ ކަންބޮޑުވުންތަކާ ގުޅޭ ގޮތުން ފަހުގެ ތާރީހެއްގައި މަޝްވަރާއެއް ވެސް ކޮށްފައި ނުވާތީ މޯދީ ހުކުރު ދުވަހު ގާނޫނުތައް އުވާލެއްވުން ވެގެން ދިޔައީ ޝޮކަކަށެވެ.
ދަނޑުވެރިންގެ ޔޫނިއަންތަކުން ބުނީ މިއީ ބޮޑު ކާމިޔާބެއް ކަމަށެވެ. ނަމަވެސް އެނެލިސްޓުން ބުނާ ގޮތުގައި މޯދީގެ ނިންމެވުން ގުޅިފައި ވަނީ ކުރިއަށް އޮތް އިންތިހާބުތަކާ އެވެ.
އެގޮތުން ޕަންޖާބް ސްޓޭޓާއި އުއްތަރް ޕްރަދޭޝް ސްޓޭޓުގެ އިންތިހާބު އޮތް އިރު، އެ ދެ ތަނުގައި ވެސް ދަނޑުވެރިން ގިނަ އެވެ.
