ޒިއުރިކް (ނޮވެމްބަރު 17) - ވޯލްޑް ކަޕް ކޮލިފައިންގައި ދެކުނު އެފްރިކާ އާއި ގާނާ ބައްދަލުކުރި މެޗާ ގުޅިގެން ދެކުނު އެފްރިކާ އިން ހުށަހެޅި މައްސަލަ ބެލުމަށް ދުނިޔޭގެ ފުޓްބޯޅައިގެ މައި އިދާރާ ފީފާ އިން ނިންމައިފި އެވެ.
ދެކުނު އެފްރިކާ އާއި ގާނާ މިދިޔަ އާދިއްތަ ދުވަހު ބައްދަލުކުރި މެޗުން ޕޮއިންޓެއް ހޯދައިގެން، ދެކުނު އެފްރިކާ އަށް 2022 ވަނަ އަހަރުގެ ވޯލްޑް ކަޕް ކޮލިފައިންގެ ފަހު ބުރުގެ ޖާގައެއް ހޯދުމުގެ ފުރުސަތު އޮތެވެ. އެކަމަކު އެ މެޗުން 1-0 އިން ބަލިވެ، ދެކުނު އެފްރިކާ އަށް ވަނީ ވޯލްޑް ކަޕަށް ކޮލިފައިވުމުގެ ފުރުސަތު ގެއްލިފަ އެވެ. މި މެޗުގައި ގާނާ އިން ލަނޑު ޖެހީ ފުރަތަމަ ހާފުގައި ލިބުނު ޕެނަލްޓީއަކުންނެވެ. އެކަމަކު ސެނެގާލްގެ ރެފްރީ މަގުއޭ އެންޑިއާޔޭ ދިން ޕެނަލްޓީއާމެދު ސުވާލު އުފެދެ އެވެ.
މެޗަށް ފަހު، ދެކުނު އެފްރިކާގެ ފުޓްބޯޅަ އެސޯސިއޭޝަން ޗީގް އެގްޒެކުޓިވް ތެބޯގޯ މޮތްލަންޓޭ ބުނީ ރެފްރީގެ ބޭއިންސާފު ނިންމުންތަކާ ގުޅިގެން، ދެކުނު އެފްރިކާގެ "ހައްގު ފޭރިގަނެފައިވާ" ކަމަށެވެ.
"މެޗުގެ ރެފްރީން މި މެޗުގެ ނަތީޖާ މި ބަދަލުކުރީ. މިއީ އިންސާފެއް ނޫން،" މޮލަންޓޭ ބުންޏެވެ.
މި މެޗުގެ ނަތީޖާއާއެކު، ގުރޫޕް ޖީގައި ދެކުނު އެފްރިކާ އަށްވުރެ ކުރިއަށް ގާނާ ޖެހިލީ ލަނޑުގެ ތަފާތުންނެވެ. އަދި އެފްރިކާގެ ވޯލްޑް ކަޕް ކޮލިފައިންގެ ޕްލޭއޮފްގެ ޖާގައެއް، ގާނާ އިން ވަނީ ހޯދައިފަ އެވެ.
ފީފާ އިން ބުނީ މި މެޗާ ގުޅިގެން ދެކުނު އެފްރިކާ އިން ޝަކުވާއެއް ހުށަހަޅާފައިވާ ކަމަށާއި އެ މައްސަލަ ބަލަމުންދާ ކަމަށެވެ.
ދެކުނު އެފްރިކާ އިން ހުށަހެޅި މައްސަލަ ބަލައި، މެޗު އަލުން ކުޅުވާނެ ކަމުގެ އުންމީދު އެ ގައުމަށް ބޮޑެވެ. އެއީ މީގެ ކުރިން 2018 ވަނަ އަހަރުގެ ވޯލްޑް ކަޕް ކޮލިފައިންގައި ދެކުނު އެފްރިކާ ކުޅުނު މެޗެއްގައި ރެފްރީ ހެދި ގޯސްތަކަކާ ގުޅިގެން، ފީފާ އިން މެޗު އަލުން ކުޅުވުމެވެ.
ވޯލްޑް ކަޕް ކޮލިފައިންގައި 2018 ވަނަ އަހަރު ސެނެގާލް އަތުން 2-1 އިން ދެކުނު އެފްރިކާ މޮޅުވި އެވެ. އެކަމަކު، އެ މެޗުގެ ރެފްރީ ޖޯސެފް ލަމްޕްޓޭ ހެދި ގޯސްތަކުގެ ސަބަބުން، ފީފާ އިން ވަނީ މެޗު އަލުން ކުޅުވައިފަ އެވެ. އެ މެޗު 2-0 އިން ކާމިޔާބުކޮށް، ސެނެގާލް ވަނީ ވޯލްޑް ކަޕްގެ ޖާގައެއް ހޯދައިފަ އެވެ. -- ބީބީސީ
