ނިއު ދިއްލީ، އިންޑިއާ (ނޮވެމްބަރު 16) - ނިއު ދިއްލީގެ ވައި ތަގައްޔަރުވެފައި ވާތީ ލޮކްޑައުނަކަށް ދާން ސުޕްރީމް ކޯޓުން ލަފާ ދިން ނަމަވެސް އެގޮތަށް އަމަލު ނުކުރަން ދިއްލީ ސްޓޭޓުގެ ސަރުކާރުން ނިންމައިފި އެވެ.
ދުނިޔޭގެ އެންމެ ބޮޑަށް ތަގައްޔަރުވެފައިވާ ސިޓީތަކުގެ ތެރެއިން ދިއްލީގެ ވައިގެ ކޮލިޓީ ގަވާއިދުން "އެންމެ ނުރައްކާތެރި" ކެޓަގަރީއަށް ވެއްޓެ އެވެ. އެ ހާލަތަށް ދިޔުމުން އިންސާނުންގެ ސިއްހަތަށް ނުރައްކާވާ މާއްދާތައް ވައިގެ ތެރޭގައި ގިނައިން އުޅެ އެވެ.
މިދިޔަ ހޮނިހިރު ދުވަހު ސުޕްރީމް ކޯޓުން ލަފާދީފައި ވަނީ ފުރަތަމަ ފަހަރަށް "ޕޮލިއުޝަން ލޮކްޑައުނަކަށް" ދިޔުމަށެވެ. ވައި ތަގައްޔަރުވުމުގެ ސަބަބުން ލޮކްޑައުންކޮށްފި ނަމަ ދިއްލީގެ 20 މިލިއަން މީހުން ގެތަކުން ނުކުތުން މަނާވާނެ އެވެ.
ނަމަވެސް ކޯޓަށް ހުށަހެޅި ލިޔުމެއްގައި ދިއްލީގެ ސަރުކާރުން ބުނީ އެފަދަ ފިޔަވަޅެއްގެ އަސަރު ފުރިހަމަ ގޮތެއްގައި ކުރާނީ ދިއްލީ ވަށައިގެންވާ ސްޓޭޓުތަކުން ވެސް ލޮކްޑައުން ކުރުމުން ކަމަށެވެ.
ފިނި މޫސުމާ ދިމާކޮށް ދިއްލީގެ ވައި ތަގައްޔަރުވާ އެއް ސަބަބަކީ ވަށައިގެންވާ ސްޓޭޓުތަކުގައި ހުންނަ ދަނޑުބިންތަކުން އުފެދޭ ކުނި އެންދުމެވެ. ދިއްލީ ވަށައިގެންވާ ސަރަހައްދުގައި އެތައް މިލިއަން މީހުން ދިރިއުޅޭ ނޮއިޑާ އަދި ގާޒީއާބާދު ފަދަ ސިޓީތައް ވެސް ހުރެ އެވެ.
"ދިއްލީގެ ސައިޒަށް ބަލާއިރު، ލޮކްޑައުންކޮށްފި ނަމަ ވައިގެ ކޮލިޓީ އަށް އަންނާނީ ވަރަށް ކުޑަ ބަދަލެއް،" ދިއްލީ ސަރުކާރުން ބުންޏެވެ.
ނަމަވެސް އެ ސިޓީގެ ވައި ތަގައްޔަރުވުމަށް އެންމެ ބޮޑަށް މަގުފަހިކުރަނީ އެކި ސިނާއަތްތަކާއި، ދަތުރުފަތުރާއި، މަގުތަކާއި އިމާރާތް ކުރުމުގެ މަސައްކަތުން އުފެދޭ ހިރަފުހުން ކަމަށް ސިޓީގައި އެއްބަސްވެފައި ވެ އެވެ. އަދި ވައި ތަގައްޔަރުވުމަށް ދަނޑުތަކުން ހިއްސާ ކުރަނީ އެންމެ ހަތަރު ޕަސެންޓު ކަމަށް ވެސް ބުންޏެވެ.
ވައިގައި ހިމެނޭ ޕީއެމް 2.5 އަކީ ފުއްޕާމެ އާއި ހިތުގެ ބަލިތަކަށް މަގުފަހިކުރުވާ އެއްޗެކެވެ. މިދިޔަ ހަފުތާގައި ދިއްލީގެ ޕީއެމް 2.5 މިންވަރު ހުރީ 500 ގަ އެވެ. އެއީ ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އިން ކަނޑައަޅާފައިވާ ރައްކާތެރި ލިމިޓަށް ވުރެ 30 ގުނަ މައްޗެވެ.
ދިއްލީ ސަރުކާރުން ނިންމާފައި ވަނީ ސަރުކާރު އޮފީސްތަކާއި ސްކޫލުތައް ހަފުތާއެއް ވަންދެން ބަންދު ކުރުމަށެވެ. އަދި ނޮވެމްބަރު 20 ވަނަ ދުވަހާ ހަމައަށް އެއްވެސް ކޮންސްޓްރަކްޝަން މަސައްކަތެއް ކުރުން މަނާވާނެ އެވެ.
