ކޮލޮމްބޯ، ސްރީ ލަންކާ (ނޮވެމްބަރު 15) - ސާފު ނުކުރާ ކްރޫޑް ތެޔޮ އިމްޕޯޓް ކުރާނެ ޑޮލަރު ނުލިބޭތީ ސްރީ ލަންކާގެ ހަމައެކަނި ތެޔޮ ރިފައިނެރީ ނުވަތަ ތެޔޮ ސާފުކުރާ ފެކްޓްރީ ބަންދުކޮށްފި އެވެ.
މީގެ ދެ އަހަރު ކުރިން ގޮތަބަޔަ ރާޖަޕަކްސަ ރައީސްކަމާ ހަވާލުވެވަޑައިގެންނެވި އިރު ބޭރު ފައިސާގެ ރިޒާވްގައި 7.5 ބިލިއަން ޑޮލަރު ހުރި ނަމަވެސް، މިދިޔަ އޮކްޓޯބަރު މަސް ނިމުނު އިރު އެ އަދަދު ވަނީ 2.3 ބިލިއަން ޑޮލަރަށް ވެއްޓިފަ އެވެ.
ބައިނަލްއަގްވާމީ ރޭޓިން އެޖެންސީތަކުން ލަންކާގެ ކްރެޑިޓް ރޭޓިން ޑައުންގްރޭޑްކޮށްފައި ވާއިރު، ކޮވިޑު ބަލިމަޑުކަމާ ހެދި 2020 ވަނަ އަހަރު އެ ގައުމުގެ އިގްތިސާދު 3.6 ޕަސެންޓުން ކުޑަވި އެވެ.
ފަތުރުވެރިކަމާއި ބޭރު މަސައްކަތްތެރިންގެ ރެމިޓެންސްގެ ގޮތުގައި ލިބޭ ޑޮލަރު ވެސް ވަރަށް ބޮޑު ތަނުން ވެއްޓިފައި ވާއިރު، މިދިޔަ އަހަރުގެ މާޗް މަހުން ފެށިގެން ސަރުކާރުން ވަނީ ބައެއް ބާވަތްތަކުގެ މުދާ އެތެރެ ކުރުން މަނާކޮށްފަ އެވެ.
ލަންކާގެ ހަމައެކަނި ތެޔޮ ރިފައިނެރީ ސަޕުގަސްކަނޑަ އަކީ އިރާނުން 1969 ގައި އަޅައިދިން ތަނެކެވެ. އެނާޖީ މިނިސްޓަރު އުދަޔަ ގަމަންޕިލަ ވިދާޅުވީ މިއީ އެ ތަން ހުޅުވި ފަހުން އޮޕަރޭޝަންތައް ހުއްޓާލަން ޖެހުނު ފުރަތަމަ ފަހަރު ކަމަށެވެ.
ގަމަންޕިލަ ވިދާޅުވީ ސަރުކާރުން ނިންމާފައި ވަނީ ރިފައިނެރީގެ މަސައްކަތްތައް މެދުކަނޑާލުމަށް ފަހު ސާފުކޮށްފައިވާ ޕެޓްރޯލާއި ޑީސެލް އިމްޕޯޓް ކުރަން ކަމަށެވެ. އޭގެ ސަބަބުން ފައިސާ ސަލާމަތް ކުރެވޭނެ ކަމަށް ވިދާޅުވި ނަމަވެސް، ސަލާމަތް ކުރެވެނީ ކިހާ އަދަދެއް ކަމަށް އޭނާ ވިދާޅެއް ނުވެ އެވެ.
"ސަޕުގަސްކަނޑައިގައި ތެޔޮ ސާފު ކުރީމާ އަޅުގަނޑުމެންނަށް ލިބެނީ 37 ޕަސެންޓު ފާނޭސް ތެޔޮ، 19 ޕަސެންޓު އޭވިއޭޝަން ތެޔޮ އަދި 43 ޕަސެންޓު ޕެޓްރޯލާއި ޑީސެލް،" ކޮލޮމްބޯގައި ނޫސްވެރިންނަށް އޭނާ ވިދާޅުވި އެވެ.
"ފާނޭސް ތެލާއި އޭވިއޭޝަން ތެލަށް މާ ބޮޑު ޑިމާންޑެއް ނެތް. އެހެންވީމަ ޑިމާންޑު އޮތް ސާފުކޮށްފައިވާ ޕެޓްރޯލާއި ޑީސެލް އިމްޕޯޓް ކުރުން މާ ރަނގަޅު,"
ތެޔޮ ބޭނުން ކުރާ މިންވަރު ވަރަށް ބޮޑު ތަނުން މަދު ނުކުރާ ނަމަ މި އަހަރު ނިމޭއިރު، ރޭޝަން ކުރަން ޖެހިދާނެކަމުގެ އިންޒާރު އޮފިޝަލުން ވަނީ ދީފަ އެވެ.
މިދިޔަ އަހަރު ލަންކާ އަށް ތެޔޮ އިމްޕޯޓް ކުރަން 2.32 ބިލިއަން ޑޮލަރު ހޭދަކުރި އެވެ. ނަމަވެސް މި އަހަރު ތެލުގެ އަގުތައް އުފުލިފައި ވާތީ އެ އަދަދު 4.0 ބިލިއަން ޑޮލަރަށް އަރާނެ ކަމަށް ބެލެވެ އެވެ.
އޮފިޝަލުން ބުނެފައި ވަނީ ތެލުގެ އިމްޕޯޓުތަކަށް ފައިނޭންސް ކުރަން އޮމާން އާއި އިންޑިއާ އިން ބޮޑެތި ލޯންތަކެއް ހޯދަން ރޭވި ކަމަށެވެ. ނަމަވެސް މަޝްވަރާތަކުގައި ކުރިއެރުމެއް ނުލިބުމުން ލޯންތައް ހަމަޖެހިފައެއް ނުވެ އެވެ.
ބޭރު ފައިސާގެ ދަތިކަމާ ހެދި މިހާރު ވެސް ހިކި ކިރާއި ހަކުރު އަދި ކައްކާ ގޭހާއި ސިމެންތި ފަދަ ތަކެތި ވިއްކަމުން ދަނީ ރޭޝަންކޮށްގެންނެވެ.
