ކާބުލް، އަފްގާނިސްތާން (ނޮވެމްބަރު 16) - އަފްގާނިސްތާނަށް ކުރިމަތިވެފައިވާ ކާބޯތަކެތީގެ ކާރިސާ އަކީ ކުރީ ސަރުކާރުގެ "ލެގަސީ" ކަމަށް ތާލިބާނުން ބުނެފި އެވެ.
ތާލިބާނުންގެ ޑެޕިއުޓީ ހެލްތު މިނިސްޓަރު އަބްދުލް ބާރީ އުމަރު ބުނީ އެހީ ފޯރުކޮށްދޭން ވައުދުވުމަށް ފަހު ބައިނަލްއަގްވާމީ މުޖުތަމައިން ވައުދު ފުއްދަމުން ނުދާ ކަމަށެވެ.
އދ. އިން އިންޒާރުދޭ ގޮތުގައި އަފްގާނިސްތާނުގެ އާބާދީގެ ދެބައިކޮށްފައި އެއްބައި ނުވަތަ 22 މިލިއަން މީހުންނަށް ކުރިއަށް އޮތް ފިނި މޫސުމުގައި ބަނޑުހައި ހޫނުކަމާ ކުރިމަތިވާނެ އެވެ.
ބޭރުގެ އެހީ އަށް ބަރޯސާވެފައި އޮތް އަފްގާނިސްތާނުގެ އިގްތިސާދު ހުއްޓުމަކަށް އައީ ތާލިބާނުން ވެރިކަމަށް އައުމުން އެހީތައް މެދުކަނޑާލުމުންނެވެ. އަދި އާދަޔާ ހިލާފަށް ހޫނުގަދަވާތީ ދަނޑުބިންތަކުން އެއްޗެއް ނުލިބެ އެވެ.
ވޯލްޑް ފުޑް ޕްރޮގްރާމް (ޑަބްލިއުއެފްޕީ) ގެ ތަފާސްހިސާބާ ހަވާލަދީ އުމަރު ބުނީ މި އަހަރު ނިމޭއިރު އުމުރުން ފަސް އަހަރުން ދަށުގެ 3.2 މިލިއަން އަފްގާން ކުދިން ތިބޭނީ މާ ބޮޑަށް ހިކިވެ އަނަރޫފަވެފައި ކަމަށެވެ.
"ވިހި އަހަރު ވަންދެން ސިއްހީ ނިޒާމު ބަރޯސާވެފައި އޮތީ ބޭރުގެ އެހީއަށް. އެންމެ ކުޑަމިނުން އާދައިގެ ކަމެއް ވެސް ކޮށްފައި ނެތް. ބޭރުގެ އެހީ ހުއްޓާލައިފި ނަމަ ސިއްހީ އިންފްރާސްޓްރަކްޗާ އާއި ވަސީލަތްތައް ބޭނުން ކުރެވޭނެ ގޮތުގައި ދެމެހެއްޓުމަށް."
އޭނާ ބުނީ އަފްގާނިސްތާނުގެ ހުރިހާ ކަމަށް ފައިސާ ފޯރުކޮށްދެމުން ދިޔައީ ބޭރުގެ ސަރުކާރުތަކާއި އެހީދޭ ޖަމިއްޔާތަކުން ކަމަށެވެ. އެހެންކަމުން ކުއްލިއަކަށް އެހީ ހުއްޓާލުމުން ހިދުމަތްތައް ދޭނީ ކިހިނެއްތޯ އޭނާ ސުވާލު އުފެއްދި އެވެ.
"ވޯލްޑު ބޭންކާއި، އީޔޫ އަދި ޔޫއެސްއެއިޑުން އަފްގާން ރައްޔިތުން ވީ ވައުދުތައް ނުފުއްދާ،" އޭނާ ބުންޏެވެ.
