ދެކުނު އަފްގާނިސްތާނުގައި އިސްލާމިކް ސްޓޭޓް (އައިއެސް) ގްރޫޕުގެ ޓެރަރިސްޓުން ފިލައިގެން އުޅޭ ތަންތަން ހޯދަން ހާއްސަ އޮޕަރޭޝަނެއް ތާލިބާނުން ފަށައިފި އެވެ.
މިދިޔަ އޯގަސްޓު މަހު ގާނޫނީ ސަރުކާރު ވައްޓާލުމަށް ފަހު ތާލިބާނުން ވެރިކަމާ ހަވާލުވުމާ އެކު އައިއެސް އިން ދޭ ހަމަލާތައް ވަނީ ވަރުގަދަކޮށް، އިތުރުކޮށްފަ އެވެ.
އައިއެސްއާ ދެކޮޅު އޮޕަރޭޝަން ފެށީ ރޭގަނޑު ދަންވަރު ކަންދަހާރް ޕްރޮވިންސްގެ ހަތަރު ޑިސްޓްރިކްޓެއްގައި ކަމަށް ތާލިބާނުންގެ ޕްރޮވިންޝަލް ފުލުހުންގެ ވެރިޔާ އަބްދުލް ގަފަރް މުހައްމަދީ ބުންޏެވެ.
"މިހާތަނަށް އައިއެސްގެ ހަތަރު ޓެރަރިސްޓުން މަރާލެވިއްޖެ. އިތުރު 10 މީހަކު ހުރީ ހައްޔަރުކޮށްފައި. އެކަކު ވަނީ ގެޔެއްގެ ތެރޭގައި އަމިއްލަ އަށް މަރުވެގެން ބޮމެއް ގޮއްވާލާފައި،" އޭނާ އޭއެފްޕީ އަށް ބުންޏެވެ.
ތާލިބާނުންގެ ޖާސޫސީ އިދާރާގެ މެމްބަރަކު ބުނީ އޮޕަރޭޝަނުގައި އާއްމުންގެ ތިން މީހަކު މިހާތަނަށް މަރުވެފައިވާ ކަމަށެވެ.
އަފްގާނިސްތާނުގެ ނޫސްތަކުން ބުނީ ވެރިރަށް ކާބުލްގެ ހުޅަނގުގެ ހިސާބެއްގައި ހޯމަ ދުވަހު ގޮވުމެއް ގޮވި ނަމަވެސް އެއްވެސް މީހަކަށް އަނިޔާ ނުވާ ކަމަށެވެ.
ތާލިބާނުން ވެރިކަމުގައި ހޭދަވި ތިން މަސް ދުވަހު އައިއެސްގެ ހަރަކާތްތައް ފާހަގަވެފައި ވަނީ ޖަލާލްއާބާދާއި، ކުންދޫޒް، ކަންދަހާރް އަދި ކާބުލް ގަ އެވެ.
މިދިޔަ މަހު ހުކުރު ނަމާދު ވަގުތާ ދިމާކޮށް ކަންދަހާރްގެ ޝިއައީ މުސްލިމުންގެ މިސްކިތަކަށް ހަމަލާދީ 60 މީހުން މަރާލުމުގެ ފަހަތުގައި ވަނީ އައިއެސް އެވެ.
އޭގެ ކުރީ ހަފުތާ ބަންދުގައި ވެސް ހަމަ އެފަދަ ހަމަލާއެއް ކުންދޫޒްގައި ދިނުމަށް ފަހު 60 އަށް ވުރެ ގިނަ މީހުން މަރާލި އެވެ. ކޮންމެ ހުކުރު ދުވަހަކާ ދިމާކޮށް އައިއެސް އިން ހަމަލާދޭކަން ފާހަގަކުރެވެ އެވެ.
ފާއިތުވި ހަފުތާ ބަންދުގައި ކާބުލްގައި ދަތުރު ކުރަމުން ދިޔަ މިނީބަހެއް ގޮއްވާލި ހަމަލާގެ ޒިންމާ ވެސް އައިއެސް އިން ވަނީ އުފުލާފަ އެވެ. އެ ހަމަލާގައި ނޫސްވެރިއަކާއި އިތުރު ދެ މީހުން މަރުވި އެވެ.
މި މަހުގެ ކުރީކޮޅު އައިއެސް އިން ވަނީ ކާބުލްގެ މައި އަސްކަރީ ހޮސްޕިޓަލުގެ ތެރެއަށް ވަދެގަނެ، 19 މީހުން މަރާލާފަ އެވެ. އެ ފަހަރު ތާލިބާނުންގެ އިސް ކޮމާންޑަރަކު ވެސް މަރުވި އެވެ.
އޭގެ އިތުރުން ޖަލާލްއާބާދުގައި ދީފައިވާ ގިނަ ހަމަލާތަކެއްގެ ޒިންމާ ވެސް އައިއެސް އިން އުފުލާފައި ވެ އެވެ. އިރުމަތީ ނަންގަހާރް ޕްރޮވިންސްގެ ވެރިރަށަކީ އައިއެސްގެ ޓެރަރިސްޓުން ވަރަށް ގިނަ ހިސާބެކެވެ.
