އިންޑިއާގެ ޖަންގައްޔެއްގެ ތެރޭގައި ސިފައިންނާއި މާއޮއިސްޓުންނާ ދެމެދު ހަމަލާ ބަދަލުކޮށް ހިނގި ކުރިމަތިލުމެއްގައި ހަނގުރާމަވެރިންގެ 26 މީހަކު މަރުވެއްޖެ އެވެ.
ތިން ގަޑިއިރު ވަންދެން ކުރިއަށް ދިޔަ ހަމަލާ ބަދަލުކުރުމުގައި ސިފައިންގެ ތިން ކޮމާންޑޯއިންނަށް ވަރަށް ބޮޑަށް އަނިޔާވި އެވެ. ހަމަލާތައް ބަދަލު ކުރީ މުމްބާއީއާ 1000 ކިލޯމީޓަރު އިރުން ގަޑްޗިރޮލި ޑިސްޓްރިކްޓުގެ ޖަންގަލީގަ އެވެ. އަނިޔާވި ސިފައިންނަށް ފަރުވާ ދިނުމަށް ހެލިކޮޕްޓަރުގައި ގެންދިޔައީ ނަގްޕޫރް ސިޓީއަށެވެ.
އިންޑިއާގެ މެދުތެރެ އާއި އިރުމަތީގައި މާއޮއިސްޓުން އުޅެ އެވެ. އޭގެ ތެރެއިން ގަޑްޗިރޮލި އަކީ ގިނަ އަދަދެއްގެ މާއޮއިސްޓް ހަނގުރާމަވެރިން ފިލައިގެން އުޅޭ ހިސާބެކެވެ. ރިޕޯޓުތައް ބުނާ ގޮތުން ހަމަލާ ބަދަލު ކުރަން ހާއްސަ ކޮމާންޑޯ ޔުނިޓަކުން މާޑިންޓޮލަ ޖަންގަލި ތެރެއަށް ވަދެ ހަނގުރާމަވެރިން އުޅޭ ހިސާބާ ހަމައަށް ފޯރުމުން ކަމަށެވެ.
މަދުވެގެން 26 "ނަކްސަލްސް" މަރުވެފައިވާ ކަމަށް ފުލުހުންނާ ހަވާލަދީ އޭއެފްޕީ އިން ބުންޏެވެ. މާއޮއިސްޓުންނަށް "ނަކްސަލްސް" ގެ ނަމުން މުހާތަބު ކުރަނީ 1967 ގައި ހުޅަނގު ބެންގޯލް ސްޓޭޓުގެ ނަކްސަލްބަރީ އަވަށުގައި އެ މީހުން ފެށި އިންގިލާބާ ގުޅުވައިގެންނެވެ.
އިންޑިއާގެ ނޫސްތަކުން ރިޕޯޓު ކުރާ ގޮތުގައި ހަނގުރާމަވެރިންގެ އިސް ލީޑަރަކު ވެސް ހަމަލާތަކުގައި މަރުވެފައި ވެ އެވެ. ހަތިޔާރު ހިފައިގެން 1960 ގެ އަހަރުތަކުގައި މާއޮއިސްޓުން ފެށި އަސްކަރީ ކެމްޕެއިން މިއަދާ ހަމައަށް ވެސް ކުރިއަށް ދާއިރު، އެތައް ހާސް ބަޔަކު މަރުވެފައި ވެ އެވެ.
މާއޮއިސްޓުން އުޅޭ ހިސާބުތަކަށް "ރެޑް ކޮރިޑޯ"ގެ ނަން ދީފައި ވާއިރު، އެ ހިސާބުތަކަށް އެތައް ހާސް ސިފައިންނެއް އިންޑިއާ ސަރުކާރުން ފޮނުވާފައި ވެ އެވެ. ރެޑް ކޮރިޑޯ ފެތުރިފައި އޮންނަނީ އިންޑިއާގެ މެދުތެރެ އާއި ދެކުނު އަދި އިރުމަތީގެ ބައެއް ސްޓޭޓުތަކުގަ އެވެ.
މާއޮއިސްޓުން ބުނާ ގޮތުގައި އެ މީހުން މަސައްކަތް ކުރަނީ ޖަންގަލިތަކާއި ދުރު ހިސާބުތަކުގައިވާ މީސްކޮޅު މަދު އަވަށްތަކުގެ މީހުންގެ ހައްގުގަ އެވެ. އެ މީހުންނަކީ އިންޑިއާގެ ކޮމިއުނިސްޓް ޕާޓީ އަށް ނިސްބަތްވާ ހަނގުރާމަވެރި ގްރޫޕެކެވެ.
