އަފްގާނިސްތާނުގައި ހަލުވިކަމާއެކު ހިމަބިހި ފެތުރި އެތައް ހާސް ބަޔަކު ބަލިވެ، 100 އަށް ވިރެ ގިނަ މީހުން މަރުވެފައިވާ ކަމަށް ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އިން ބުނެފި އެވެ.
ހުކުރު ދުވަހު އދ. އިން ބުނީ އަވަސް ފިޔަވަޅު ނާޅައިފި ނަމަ ހާލަތު އިތުރަށް ގޯސްވާނެ ކަމަށެވެ. އދ. ގެ ސިއްހަތާ ބެހޭ އެޖެންސީން ބުނީ މި ހާލަތާ މެދު އިތުރަށް ކަންބޮޑުވަނީ އަފްގާނިސްތާނަށް ދިމާވެފައިވާ ކާބޯތަކެތީގެ ދަތިކަމާ ހެދި ކަމަށެވެ.
"ހަށިގަނޑަށް ބޭނުންވާ މާއްދާތައް ނުލިބި، ހިކި، އަނަރޫފަވެފައިވާ ކުދިންނަށް ހިމަބިއްސަކީ މަރުގެ ހުކުމެއް،" ޑަބްލިއުއެޗްއޯގެ ތަރުޖަމާނު މާގަރެޓް ހެރިސް ކާބުލްގައި ހުންނަވައި ވީޑިއޯ ލިންކް މެދުވެރިކޮށް ނޫސްވެރިންނަށް ވިދާޅުވި އެވެ.
ހެރިސް ވިދާޅުވީ ބަލި ފެތުރެމުންދާ ގޮތް ބަލަން ޖެހޭ ކަމަށާއި ޓެސްޓު ކުރުން އިތުރު ކުރަން ޖެހޭ ކަމަށެވެ. ބައްޔަށް މޮނީޓާ ނުކުރި ނަމަވެސް ހަލުވިކަމާއެކު ބަލި ފެތުރެމުންދާކަމުގެ ނިޝާންތައް ވަރަށް ބޮޑަށް ފެންނަ ކަމަށް އޭނާ ވިދާޅުވި އެވެ.
"މި އަހަރު ފެންނަ ކޭސްތައް އިތުރުވެއްޖެ. ކޮންމެ ދުވަހަކު ވެސް އަދަދުތައް ދަނީ މަތިވަމުން،" އޭނާ ވިދާޅުވި އެވެ.
ހަލުވިކަމާއެކު ފެތުރޭ ހިމަބިހި ނުވަތަ މީޒްލްސްގެ 24،000 ކޭސް މި އަހަރު އަފްގާނިސްތާނުން ފެނިފައިވެ އެވެ. ޑަބްލިއުއެޗްއޯގެ ހިސާބުތަކުން ދައްކާ ގޮތުގައި އޭގެ ތެރެއިން 87 މީހަކު މަރުވި އެވެ. ނަމަވެސް އަސްލު އަދަދު އެއަށްވުރެ މަތިވާނެ ކަމަށް ބެލެވެ އެވެ.
އދ. އިން ތަކުރާރުކޮށް ވަނީ އަފްގާނިސްތާނަށް ދިމާވެފައިވާ ކާރިސާއާ ގުޅޭ އިންޒާރުތައް ދީފަ އެވެ. ކުރިއަށް އޮތް ފިނި މޫސުން ގާތްވަމުން ދާއިރު އެތައް މިލިއަން ބަޔަކު އުޅެން ޖެހޭނީ ބަނޑުހައި ހޫނުކަމުގަ އެވެ. އޭގެ ސަބަބުން ހިޖުރަ ކުރަން މަސައްކަތް ކުރާ ރެފިއުޖީންގެ އަދަދު ދަނީ އިތުރުވަމުންނެވެ.
ހެރިސް ވިދާޅުވީ އަފްގާނިސްތާނުގައި އުމުރުން ފަސް އަހަރުން ދަށުގެ ތިން މިލިއަން ކުދިންނަށް މި އަހަރު މެލްނިއުޓްރިޝަންގެ މައްސަލަ ދިމާވާނެ ކަމަށް ލަފާކުރެވޭ ކަމަށެވެ. އޭގެ ތެރެއިން މިލިއަނަކަށް ވުރެ ގިނަ ކުދިން މަރުވާނެ ކަމަށް ބެލެވެ އެވެ.
