ޑީންގީއެއް ބަންޑުން ޖަހާލައި ކަނޑުވި ބަޔަކު ސަލާމަތް ކޮށްފި އެވެ.
އެއީ ހދ. ނޮޅިވަރަމާއި ހދ. ނޮޅިވަރަންފަރާއި ދޭތެރޭ މަހަށް ނުކުމެ އުޅުނު ޑިންގީއެކެވެ. އައި ވިލާގަނޑެއްގައި ޖެހި، ރާޅެއްގައި ބަންޑުން ޖަހާލުމާއި ގުޅިގެން އެހީތެރިކަން ފޯރުކޮށްދީފައި ވަނީ އެމްއެންޑީއެފް އިންނެވެ.
އެމްއެންޑީއެފުން ބުނީ އެ ހާދިސާގައި ބަންޑުން "ހަހާލި" ނަމަކަށް ކިޔާ ޑިންގީގައި ތިބީ ދެ ފިރިހެނުންނާއި ދެ ކުޑަކުދިން ކަމަށެވެ. އެއްވެސް މީހަކަށް ޖިސްމާނީ އަނިޔާއެއް ނުވެ އެވެ.
އެމްއެންޑީއެފުން ބުނީ އެ ހާދިސާ ހިނގައިގެން އުޅޭކަން އެތަނުގެ ނޮދަން އޭރިއާ ކޮމާންޑަށް އެނގުނީ އެ ސަރަހައްދުގައި އޮންނަ އެމްއެންޑީއެފްގެ ހާބާ ކްރާފްޓް ލޯންޗް ގަޑި ހަމަކުރުމަށް ދުއްވަން ނުކުމެ އުޅެނިކޮށް މިއަދުގެ 3:40 ހާއިރު ކަމަށެވެ.
ނޮދަން އޭރިއާގެ ލޯންޗަށް އެ ހިސާބަށް ދެވުނީ ނޮޅިވަރަމާއި ނޮޅިވަރަންފަރާއި ދޭތެރޭ ޑިންގީއެއް ބަންޑުންޖަހާލައިގެން ކަނޑުވެފައި ތިބި މީހުން އެސަރަހައްދުން ދަތުރުކުރި މެރީނާ ނަމަކަށް ކިޔާ ދޯންޏަކަށް ނަގައިގެން އުޅެނިކޮށް ކަމަށް އެމްއެންޑީއެފުން މައުލޫމާތުދެ އެވެ.
މީހުން ސަލާމަތްކުރުމަށް ފަހު އެނބުރި ލޯންޗު އޮތް ސަރަހަށްދަށް ގޮސް ލޯންޗް ފުށުން ޖަހައި ކަފުޖަހައިގެން ގަލްފް ކްރާފްޓްގައި ނޮދަން އޭރިއާގެ ސިފައިން ވަނީ ބަންޑުން ޖަހާލި ލޯންޗް ނޮޅިވަރަމަށް މިއަދު 5:15 ހާއިރު ގެންގޮސްދީފައިވާ ކަމަށް އެމްއެންޑީއެފުން މައުލޫމާތު ދެ އެވެ.
ކަނޑުމަތީގެ ހާދިސާއެއް ހިނގާފައި ވާއިރު މޫސުން ގޯސްވެ ރާއްޖޭގެ ބޮޑު ބަޔަކަށް، މޫސުމާ ބެހޭ ގައުމީ އިދާރާ އިން ވަނީ ވައިޓް އެލާޓް ނެރެފަ އެވެ. ވައިޓް އެލާޓް ނެރެފައިވަނީ ހއ.އަތޮޅުން ތ.އަތޮޅާއި ހަމައަށް މިއަދު މެންދުރު 1 އިން ދަންވަރު 1 އާ ހަމައަށެވެ.
މި ވަގުތުތަކުގައި ގަޑިއަކު 22 މޭލާއި 27 މޭލާ ދެމެދުގެ ބާރުމިނުގައި ވައިޖެހި ވިލާގަނޑުގައި ގަޑިއަކު 45 މޭލަށް ވައިގަދަވެ ކަނޑުތައްވެސް ގަދަވާނެ ކަމަށް ވަނީ ލަފާކޮށްފަ އެވެ.
މި ދުވަސްވަރު ރާއްޖޭގެ އެކި ހިސާބުތަކަށް މޫސުން ގޯސްވާނެތީ، ކަނޑު ދަތުރުކުރުމުގައި ސަމާލުވާން ކަނޑުމަތީގެ ސަލާމަތާ ބެހޭ ފަރާތްތަކުން ވަނީ އިލްތިމާސް ކޮށްފަ އެވެ.
