ނައިޓް މާކެޓުގެ އުސޫލެއް ހަދައި ބާއްވަން ފުރުސަތު ހުޅުވާލައިފި

މާލޭގައި ނައިޓް މާކެޓް ބޭއްވުމަށް ޝައުގުވެރިވާ ފަރާތްތަކަށް އެ ފުރުސަތު މާލެ ސިޓީ ކައުންސިލުން ހުޅުވާލައިފި އެވެ.

އިއްޔެ ގެޒެޓްކޮށްފައިވާ ސިޓީ ކައުންސިލްގެ އިއުލާނުގައި ވަނީ ފެއާ ނައިޓް މާކެޓް ނުވަތަ މަގުމަތީ ބާޒާރު ބާއްވާނެ ގޮތުގެ އުސޫލެއް ހިމަނައިފަ އެވެ.

ގެޒެޓް ކުރާ ދުވަހުން ފެށިގެން އަމަލު ކުރުމަށް ލާޒިމްކޮށްފައިވާ މި އުސޫލުގައިވާ ގޮތުން ނައިޓް މާކެޓް ނުވަތަ މަގުމަތީ ބާޒާރު ބޭއްވުމަށް ހުއްދަދެވޭނީ ސަރުކާރު ބަންދު ދުވަސްތަކުގަ އެވެ. އެ ނޫން ދުވަހެއްގައި ބާއްވާނަމަ ވެސް ބޭއްވޭނީ ސިޓީ ކައުންސިލުން ކަނޑައަޅާ ދުވަހެއްގަ އެވެ.

އެފަދަ ކަމެއް ބާއްވާއިރު ކަރަންޓް، ސެކިއުރިޓީ އަދި އެނޫންވެސް ހިދުމަތްތައް ހަމަޖެހި، އިންތިޒާމްތައް ފުރިހަމަވާން ޖެހޭނެ ކަމަށް އެ އުސޫލުގައިވެ އެވެ. އަދި އެނައުންސްމެންޓްގެ ހިދުމަތާއި، އުޅަނދު ފަހަރާއި ފައިމަގުގެ ޓްރެފިކް މެނޭޖްކުރުމުގެ އިތުރުން މުދާ ގެނެއުމުގެ އިންތިޒާމްތަކާއި، ތަނުގެ ސާފުތާހިރުކަން ކަށަވަރުކުރުމަށް ކުނި އުކާލުމުގެ އިންތިޒާމް ފުރިހަމަވާނެ ޖެހޭނެ ކަމަށް ވެސް ސިޓީ ކައުންސިލުން ބުނެފައިވެ އެވެ.

މިފަދަ ކަމެއް ބާއްވަން ހުއްދަ ދޫކުރަނީ އަމިއްލަ ކުންފުނިތަކަށާއި، ވިޔަފާރިތަކުގެ އިތުރުން ކްލަބް ޖަމިއްޔާ ޖަމާއަތްތަކަށެވެ.

އިންތިޒާމް ކުރާ ފަރާތުން ޕްރޮސެސިންގް ފީއެއްގެ ގޮތުގައި 20 ހާސް ރުފިޔާ ސިޓީ ކައުންސިލަށް ދައްކަން ޖެހޭއިރު، ސެކިއުރިޓީ ޑިޕޮސިޓްގެ ގޮތުގައި 50 ހާސް ސިޓީ ކައުންސިލްއަށް ދައްކަން ޖެހެ އެވެ. އަދި މުދާ ވިއްކަން ބަހައްޓާ ކޮންމެ މޭޒަކުން ފަސް އިންސައްތަ ސިޓީ ކައުންސިލަށް ނަގާނެ އެވެ.

އިންތިޒާމް ކުރާ ފަރާތުގެ ޝަރުތުތައް

ވިޔަފާރިވެރިއެއް ނަމަ، އެ ވިޔަފާރީއަކީ 100 އިންސައްތަ ދިވެހިން ހިންގާ ވިޔަފާރީއަކަށް ވުން.

• އެ ވިޔަފާރީއެއް މީރާގައި ރަޖިސްޓްރީކޮށްފައި އޮތުން.
• އަމިއްލަ ފަރުދެއް ނަމަ މިފަދަ ތަޖުރިބާ އާއި ގާބިލްކަން ކުރިކަން ރަމްޒުކޮށްދޭ ލިޔުންތައް ހުށަހެޅުން.

އުސޫލުގައިވާ ގޮތުން އެއްވެސް މޭޒެއްގައި ކޭޝިއަރަކަށް ބިދޭސީއަކު ހުރުމަކީ މަނާ ކަމެކެވެ.

ނައިޓް މާކެޓް ބޭއްވުމަށް ޝައުގުވެރިވާ ފަރާތްތަކުން އެ ހުއްދައަށް އެދެން ޖެހޭ ފޯމް މާލެ ސިޓީ ކައުންސިލުން މިހާރު ލިބެން ހުންނާނެ އެވެ.