ސީލައިފް ފްލެޓްތަކުގެ މައްސަލާގައި ހިޔާނާތްތެރިވިކަމުގެ އެތައް ދައުވާ އުފުލާފައިވާ އެ ކުންފުނީގެ މެނޭޖިން ޑިރެކްޓަރު އަހުމަދު މޫސާ މުހައްމަދު (އަންމަޓީ) ކަފާލާތުގެ ދަށުން ދޫކޮށްލާފައިވަނީ ގާނޫނާއި ގަވާއިދާ ހިލާފަށް ކަމަށް ޕްރޮސެކިއުޓާ ޖެނެރަލް އޮފީސް (ޕީޖީ) އިން ބުނެފި އެވެ.
އެއްބަނޑު އެއްބަފާ ދައްތަ އާއި ކޮއްކޮ ޖާމިނު ކުރުމަށްފަހު ކަފާލާތުގެ ދަށުން އަހުމަދު މޫސާ ދޫކޮށްލަން އެ މައްސަލަ ބެއްލެވި ގާޒީ ހަސަން ސައީދު ނިންމެވުމާއި ގުޅިގެން، އެހުކުމް ޕީޖީއިން ވަނީ ހައިކޯޓުގައި އިސްތިއުނާފްކޮށްފަ އެވެ. އެހެންނަމަވެސް އަދި އެ މައްސަލަ ރަޖިސްޓްރީކޮށްދީފައެއްނުވެ އެވެ.
އެ މައްސަލަ އިސްތިއުނާފް ކުރި ސަބަބާއި، އިސްތިއުނާފް ކުރި ބައެއް ނުގުތާތައް ޕީޖީގެ އޮފިޝަލަކު "އަދަދު" އަށް ކިޔާދީފައިވެ އެވެ. އެގޮތުން ދައުލަތުގެ އެންމެ ބޮޑު ކަންބޮޑުވުމަކީ އެތައް މީހެއްގެ މަސްލަހަތު ހިމެނޭ މައްސަލައެއްގައި ތުހުމަތު ކުރެވޭ މީހެއް ބަންދަށް ލުޔެއް ދީފިނަމަ، އޭނާ ފިލައިގެން ދާނެ ކަމުގެ އިހްތިމާލް އޮތް ކަމަށް ހައިކޯޓުން ވެސް ކަނޑައަޅައިފައި ވަނިކޮށް، ކުޑަ ދުވަސްކޮޅެއްގެ ތެރޭގައި ހާލަތު ބަދަލުވެފައިވާ ކަމަށް ނިންމާ ދަށުކޯޓުން އޭނާ ގޭބަންދަށް ދޫކުރުން ކަމަށް އޭނާ ބުންޏެވެ. އަދި ކަފާލާތުގެ ދަށުން އަހުމަދު މޫސާ ދޫކުރަން ނިންމި ނިންމުމުގައި ގާނޫނީ ފުށުއެރުންތަކެއް ހުރި ކަމަށް ވެސް ޕީޖީ އޮފީހުން ދެކެ އެވެ.
ކަފާލާތުގެ ދަށުން މިނިވަންކުރުމުގައި ހަރުދަނާ އަސާސެއް ދެއްކިފައިނުވޭ
މި ނުކުތާ އިސްތިއުނާފް ކުރަމުން ޕިޖީއިން ބުނެފައި ވަނީ އަހުމަދު މޫސާ މިނިވަންކުރަން ގާޒީ ހަސަން ސައީދު ނިންމެވީ ޝަރީއަތްކުރުމާބެހޭ ޖިނާއީ އިޖުރާއަތުގެ ގަވާއިދާއި ހިލާފަށް ކަމަށެވެ.
titledesc
މި މާއްދާއަށް ރިޔާއަތް ކުރަމުން ޕީޖީއިން ބުނީ މި މައްސަލައިގެ ކުށުގެ ކުޑަބޮޑުމިނާއި ކުށް ކޮށްފައިވާ ގޮތާއި މީހުންނަށް ގެއްލުން ލިބިފައިވާ މިންވަރު މީގެ ކުރިން ހައިކޯޓުން ވަޒަންކޮށްފައިވާ ކަމަށެވެ. އަދި ދަށުކޯޓުގެ ހުކުމް އިސްތިއުނާފް ކުރީ، އަންމަޓީއަކީ ފިލާފާނެ ކަމުގެ އިހްތިމާލް އޮތް މީހެއް ކަމަށް މީގެ ކުރިން ހައިކޯޓުން ކަނޑައަޅާފައި ވާތީ އެވެ.
މި ނުކުތާއަށް ބާރު ދިނުމުގެ ގޮތުން ސުޕްރިމް ކޯޓުގެ ގަޒިއްޔާއެއް ވެސް ދައުލަތުން ފާހަގަކޮށްފައިވެ އެވެ.
titledesc
ރޭޝިއޯ ޑެސިޑެންޑައި މައްސަލައިގެ ހުކުމާއި ހަމައަށް ވާސިލްވުމުގެ މައި ނުގުތާ ނުވަތަ މައްސަލަ ބިނާ ކުރާ މައި އަސާސް އެވެ. އޮބިޓާ ޑިކްޓާ އަކީ މައްސަލައެއްގެ ތެރެއިން ފަނޑިޔާރަކު ފާހަގަކުރައްވާފައިވާ ނުކުތާކެވެ.
މީގެ ހަތަރު މަސް ކުރިން އަންމަޓީ ޝަރީއަތް ނިމެންދެން ބަންދުކުރަން ހައިކޯޓުން ކުރި އަމުރަށް ހަވާލާދެމުން ޕީޖީ އޮފީހުން ބުނީ އެ ގަޒިއްޔާގެ ރޭޝިއޯ ޑެސިޑެންޑައިއަކީ، އަންމަޓީ ފިލަފާނެކަމުގެ އިހްތިމާލު ފާޅުކަން ބޮޑުގޮތެއްގައި އޮތުމުންނާއި އެކަމަށް ބާރުދޭ ހެކި ހުރުމުން، އޭނާ ފިލާފާނެކަމަށް ބެލެވޭތީ، ޝަރީއަތް ނިމެންދެން ބަންދުކުރަން ނިންމި ނިންމުން ކަމަށެވެ.
އޮބިޓާ ޑިކްޓާ، ތުހުމަތުކުރެވޭ މީހާ ފިލާގެން ދިއުމުގެ އިޙްތިމާލު ނައްތާލެވޭނެ ހަރުދަނާ ފިޔަވަޅުތަކެއް އެޅުމަށްފަހު ބަންދަށްލުއި ގޮތެއް ހެދުމުގައި ހުރަހެއް ނެތް ކަމަށް ހައިކޯޓުގެ ފަނޑިޔާރު ފާތިމަތު ފަރްހީޒާ ވިދާޅުވެފައިވާކަން ޕީޖީއިން ފާހަގަކުރި އެވެ.
އަދި އިސްފަނޑިޔާރު ހާތިފް ހިލްމީގެ ރައުޔުގައި އަންމަޓީ ފިލުމުގެ އިހްތިމާލް ބޮޑު ކަމަށް ވިދާޅުވެ، ބަންދު ލުއިކުރުމާމެދު އެއްވެސް ނުކުތާއެއް ފާހަގަކޮށްފައިނުވާ ކަމަށް ޕީޖީއިން ބުނެ އެވެ.
މިކަންކަން ފާހަގަކޮށް، ސުޕްރިމް ކޯޓުގެ ގަޒިއްޔާއަށް ހަވާލާދެމުން ޕިޖީ އޮފީހުން ބުނީ އޮބިޓާގައި ފަނޑިޔާރު ބަޔާންކުރާ ކަމަކީ އަމަލުކުރުން ލާޒިމު ކަމެއް ނޫން ކަމަށާއި އެކަމަށް ރިޔާއަތްކޮށް، ދަށު ކޯޓަށް އަހުމަދު މޫސާ ބަންދަށް ދޫކޮށްނުލެވޭނެ ކަމަށެވެ.
ޖާމިނުވާ ދެމީހުންގެ ޝަރުތު ފުރިހަމަވާކަން އަނގަބަހުން ބެލުމަކީ ގާނޫނު ދަންނަ ކަމެއް ނޫން
ޕީޖީއިން ދެވަނައަށް ފާހަގަކުރި ނުގުތާގައި ވަނީ އަންމަޓީ ފިލައިފި ނަމަ ޒިންމާވާ ގޮތަށް ޖާމިނު ކުރި އޭނާގެ އެއްބަނޑު އެއްބަފާ ދައްތައާއި ކޮއްކޮގެ ޝަރުތުތައް ގާނޫނީ އިމުގެ ތެރެއިން ކަށަވަރުކޮށްފައި ނުވާ ކަމަށެވެ.
މިމައްސަލައިގައި ފަނޑިޔާރު އަމަލު ކުރެއްވި ގޮތަކީ، ޖާމިނުވާ ދެ މީހުން އެއްވަގުތެއްގައި ޝަރީއަތުގެ މަޖިލީހަށް ހާޒިރުކޮށް، އެމީހުންނާ ސުވާލުކޮށް، ޝަރުތުތައް ފުރިހަމަ ވާކަން ނުވަތަ ނޫންކަން އެއްސެވުމެވެ.
މިކަން މިގޮތަށް ނުކުރެވޭނެ ކަމަށް ބުނެ، ޕީޖީއިން ދެކެ އެވެ. އެއީ ޝަރީއަތްކުރުމާބެހޭ ޖިނާއީ އިޖުރާއަތުގެ ގަވާއިދުގައި، ލިބެންހުރި ވަސީލަތްތައް ބޭނުންކޮށްގެން ޖާމިނުވާ މީހާގެ ކިބައިގައި ޝަރުތުތައް ފުރިހަމަވޭތޯ ވަލަން އަންގާފައިވާތީ ކަމަށް ޕީޖީއިން ބުންޏެވެ.
އަދި ވަސީލަތްތައް ނެތްނަމަ، ޖާމިނުވާމީހުންގެ ބަސް ލިޔުމުން ހޯދަން ޖެހޭނެ ކަމަށް ޕީޖީއިން ގަބޫލުކުރެ އެވެ.
ޕީޖީއިން ބުނީ ގާނޫނީ ގޮތުން މީހަކު ކަފާލާތުގެ ދަށުން ދޫކޮށްލާއިރު، ޖާމިނުވާ ފަރާތްތަކުގެ ޝަރުތުތަށް ކަށަވަރުކުރަން ވަކި ތަރުތީބެއް އޮތް ނަމަވެސް، ދަށު ކޯޓުގައި މި މައްސަލަ ބެއްލެވި ގާޒީ ހަސަން ސައީދު އެކަންކަމަށް ބައްލަވާފައި ނުވާ ކަމަށެވެ.
"ޖިނާއީ އިޖުރާއަތުގެ ގަވާއިދުގައި އޮތް ވާހަކަތައް ކިޔުއްވައި، އެއާ އެއްގޮތަށް އަމަލު ކުރެއްވުމަކީވެސް ފަނޑިޔާރުގެ މައްޗަށް ލާޒިމުކަމެއް. މައްސަލައިގެ ތަރުތީބު ދެނިގަނެ އެގޮތަށް އަމަލު ކުރުމަކީވެސް ފަނޑިޔާރުގެ މައްޗަށް ލާޒިމް ކަމެއް،" ޕީޖީއިން ބުނިއެވެ.
titledesc
އަންމަޓީ ދޫކޮށްލަން ގާޒީ ހަސަން ސައީދު ނިންމެވީ ކީއްވެ؟
މިދިޔަ މަހުގެ 20 ވަނަ ދުވަހު ކްރިމިނަލް ކޯޓުގައި ބޭއްވުނު ބަންދު މުރާޖާގެ އަޑުއެހުމުގައި އަހުމަދު މޫސާ ދޫކޮށްލަން ގާޒީ ހަސަން ސައީދު ކޮށްފައިވާ ހުކުމުގައި ވަނީ އޭނާ ބަންދުގައި ބަހައްޓަން ޖެހޭ ހާލަތަށް ބަދަލު އައިސްފައިވާ ކަމަށް ވިދާޅުވެފަ އެވެ.
ކަފާލާތުގެ ދަށުން ދެ މީހަކު ޖާމިނިކޮށް ޝަރުތުތަކަކާއި އެކު އޭނާ ދޫކޮށްލަން ނިންމީ އެ މައްސަލައިގެ އަޑުއެހުން ދިގުދެމިގެން ދާނެތީ ކަމަށް ގާޒީ ވިދާޅުވި އެވެ. އަދި އެ މައްސަލަ އުފަންވީ މަދަނީ މައްސަލައަކުން ކަމަށް ވާތީ ކަން ފާހަގަކުރެއްވި އެވެ.
މި ނިންމުމާއި ހަމައަށް ވާސިލްވާން ބާރުލިބުނީ އަހުމަދު މޫސާ ބަންދުގައި ހުރިއިރު ވެސް، ބަރާބަރަށް ކޯޓަށް ހާޒިރުވެ، ޝަރީއަތްތަކަށް އެއްބާރުލުން ދީފައި ވާތީ، ކަމަށްވެއެވެ. އަދި އެކަމުން އޭނާއަކީ ފިލައިގެން ދާނެ މީހެއް ނޫންކަން ގަބޫލުކުރަން ޖާގަ ލިބޭ ކަމަށް ގާޒީ ހަސަން ސައީދު ވިދާޅުވި އެވެ.
ކަފާލާތުގެ ދަށުން އަންމަޓީގެ ބަންދަށް ލުއިދޭން ނިންމި ބަންދު މުރާޖާގެ އަޑުއެހުމުގެ ކުރިން ބޭއްވި އަޑުއެހުމުގައި އޭނާ ކަފާލާތުގެ ދަށުން ދޫކުރުމަށް ގާޒީ އިއުތިރާޒު ކުރެއްވީ، އޭނާ ދޫކޮށްލައިފިނަމަ މުޖުތަމައުގެ މަސްލަހަތު ގެއްލި، ކުށް ކުރުމަށް ހިތްވަރު ލިބޭނެ ކަމަށް ވިދާޅުވެ އެވެ. ދި އޭނާ ބަންދުން ދޫކޮށްލައިފިނަމަ ޝަރީއަތަށް ހާޒިރުނުވެ ފިލައިގެން ގޮސްދާނެ ކަމަށް ބުރަވެވޭ ކަން ފާހަގަކުރައްވަ އެވެ.
