އައްޑޫ ސިޓީގެ ކޮވިޑަ ހާލަތު ގޯސްވެފައި ވާއިރު މިވަގުތު ވެސް ކޮވިޑަށް ޕޮޒިޓިވެފަ ތިބި މީހުން 400 އާ ގާތްކުރާ ކަމަށް އައްޑޫ އެމަޖެންސީ އޮޕަރޭޝަން ސެންޓަރުން ބުނެފި އެވެ.
އައްޑޫގެ ކޮވިޑްގެ ހާލަތު ގޯސްވެގެން މޮނިޓަރިން އަށް ލިތާ މިހާރު ވަނީ ތިން މަސް ވެފަ އެވެ. އެކަމާ ގުޅިގެން ރަށުގެ ގިނަ ބަޔަކު ކަންބޮޑުވުން ފާޅުކުރަމުން ދާ ނަމަވެސް އައްޑޫގެ ކޮވިޑް ހާލަތު ރަނގަޅު ނުވާތީ މޮނިޓަރިންގެ ހާލަތު މިހާތަނަށް އުވާލާފައެއް ނުވެ އެވެ.
އައްޑޫ ސިޓީގެ ޖުމްލަ 2،323 މީހަކަށް ކޮވިޑް ޖެހިފައިވާއިރު، މިހާތަނަށް 1،918 މީހަކު ވަނީ ބަލިން ރަނގަޅުވެފަ އެވެ.
އައްޑޫ އެމަޖެންސީ އޮޕަރޭޝަންސް ސެންޓަރުން ރޭ އާންމުކުރި ކޮވިޑާ ގުޅޭ އެންމެ ފަހުގެ ތަފާސްހިސާބުތަކަށް ބަލާ އިރު އިއްޔެ ހަވީރު 6:00 ހަމައަށް ވެސް 29 މީހަކު ބައްޔަށް ޕޮޒިޓިވްވެފައިވެ އެވެ. އެއީ ފޭދޫން ޕޮޒިޓިވްވި މީހަކާއި މަރަދޫން ތިން މީހެއްގެ އިތުރުން ހިތަދޫން 22 މީހެކެވެ.
ކޮވިޑަށް ޕޮޒިޓިވްވާ އަދަދު އިތުރު ވަމުންދާއިރު މިވަގުތު އެންމެ ގިނަ ބަޔަކު ޕޮޒިޓިވް ވެފައި ވަނީ ހިތަދޫންނެވެ. އެއީ ޖުމްލަ 198 މީހުންނެވެ. ދެން އެންމެ ގިނައީ މަރަދޫން ނެވެ. ޖުމްލަ 75 މީހަކު މަރަދޫން ޕޮޒިޓިވް ވެފައި ވާއިރު، ފޭދޫން 63 މީހަކު ވަނީ ޕޮޒިޓިވް ވެފަ އެވެ.
މީދޫން 36 މީހަކު ބައްޔަށް ޕޮޒިޓިވް ވެފައި ވާއިރު، މަރަދޫފޭދޫން 11 މީހަކާއި ހުޅުދޫން ހަތް މީހެއްގެ އިތުރުން މީހުން ދިރިނޫޅޭ އަވަށްތަކުން ބޭރުން ހަ މީހަކު ވަނީ ޕޮޒިޓިވް ވެފަ އެވެ. ޕޮޒިޓިވްވި މީހުންނާ ކޮންޓެކްޓްވި މީހުންގެ އަދަދު ވަނީ 243އަށް އަރާފަ އެވެ.
އައްޑޫން ޕޮޒިޓިވްވި މީހުންގެ ތެރެއިން ދެ މީހުންނަށް ހޮސްޕޮޓަލުގައި ފަރުވާ ދެމުން ދާއިރު މި ބަލީގައި ނުވަ މީހަކު ވަނީ އެ އަތޮޅުން މަރުވެފަ އެވެ.
އައްޑޫގެ ކޮވިޑް ހާލަތު ގޯސްވެފައި ވާއިރު، އަތޮޅު ތަކުގެ ބައެއް ރަށްރަށުގައި ވެސް ޕޮޒިޓިވްވާ މީހުންގެ އަދަދު އަންނަނީ އިތުރުވަމުންނެވެ. އެގޮތުން މިދިޔަ ދެ ހަފްތާ ރާއްޖޭގެ ކޮންމެ ދުވަހެއްގެ ނަމްބަރުތައް ހުރީ 100 އިން މަތީގަ އެވެ.
ރާއްޖޭގައި މިހާރު ތިބި ކޮވިޑް އެކްޓިވް ކޭސްތަކުގެ އަދަދު ވަނީ 2080 އަށް އަރާފަ އެވެ. ރާއްޖެ އިން ކޮވިޑަށް ޕޮޒިޓިވްވި މީހުންގެ ޖުމްލަ އަދަދު ވަނީ 89126 އަށް އަރާފަ އެވެ. މިހާތަނަށް 86787 މީހުން ވަނީ ކޮވިޑުން ރަނގަޅު ވެފައި ވާއިރު، މި ބަލީގައި ރާއްޖެ އިން ނިޔާވި މީހުންގެ އަދަދު މިހާރު 246 އަށް އަރާފަ އެވެ.
