ކާބުލް، އަފްގާނިސްތާން (ނޮވެމްބަރު 9) - މިދިޔަ އޯގަސްޓު މަހު ތާލިބާނުން ވެރިކަމަށް އައުމާއެކު ވޯލްޑު ބޭންކުން މެދުކަނޑާލި އަފްގާނިސްތާނުގެ އެހީ އަލުން ދޭން ފެށުން ނާދިރު ކަމަށް އެ ޖަމިއްޔާގެ ރައީސް ޑޭވިޑް މެލްޕާސް ވިދާޅުވެއްޖެ އެވެ.
"އިގްތިސާދުގެ ހާލަތު އޮތް ގޮތުން އަފްގާނިސްތާނުގެ އެތެރޭގައި އަޅުގަނޑުމެންނަށް އޮޕަރޭޓް ކުރެވޭކަށް ނެތް،" ސެންޓާ ފޯ ސްޓްރެޓެޖިކް އެންޑް އިންޓަނޭޝަނަލް ސްޓަޑީޒް (ސީއެސްއައިއެސް) އަށް ދެއްވި އިންޓަވިއުއެއްގައި އޭނާ ވިދާޅުވި އެވެ.
"އެއް ގޮންޖެހުމަކީ ފައިސާ ދެއްކުމަށް އޮތް ނިޒާމު،" ތާލިބާން ސަރުކާރުގެ ސިޔާސަތުތަކާ ހެދި ފައިސާ ދައުރުވުމުގެ ގާބިލްކަން ގެއްލިފައިވާކަން ފާހަގަކުރައްވަމުން މެލްޕާސް ވިދާޅުވި އެވެ.
މިދިޔަ އޯގަސްޓު މަހު ވޯލްޑު ބޭންކުން އަފްގާނިސްތާނަށް ދޭ އެހީ މެދުކަނޑާލުމަށް ފަހު ބުނީ ސެކިއުރިޓީ ހާލަތާއި އަންހެނުންގެ ހައްގުތަކުގެ ހާލަތު ކައިރިން ބަލައި މޮނީޓާ ކުރަމުންދާ ކަމަށެވެ.
ވޯލްޑް ބޭންކުގެ ވެބްސައިޓުގައިވާ ގޮތުން އެ ޖަމިއްޔާ އިން އަފްގާނިސްތާނަށް އެހީ ދިނުން ހުއްޓާލިއިރު 24 އަށް ވުރެ ގިނަ ޕްރޮޖެކްޓުގެ މަސައްކަތް ނުނިމެ އެވެ. އެ ޖަމިއްޔާ އިން ވަނީ 2002 ވަނަ އަހަރުން ފެށިގެން 5.3 ބިލިއަން ޑޮލަރު އަފްގާނިސްތާނަށް ދީފަ އެވެ. އޭގެ ތެރެއިން ބޮޑު ބަޔަކީ ހިލޭ އެހީ އެވެ.
ވޯލްޑު ބޭންކުގެ އިތުރުން އިންޓަނޭޝަނަލް މަނިޓަރީ ފަންޑު (އައިއެމްއެފް) އިން ވެސް ވަނީ އެ ގައުމަށް ދޭ އެހީ މެދުކަނޑާލާފަ އެވެ. އެގޮތުން އައިއެމްއެފް އިން އަފްގާނިސްތާނަށް ދީފައިވާ ނުވަ ބިލިއަން ޑޮލަރު އެމެރިކާގެ އެކައުންޓުތަކުގައި ހުރިއިރު، ތާލިބާނުންނަށް އެ ފައިސާގައި އަތް ނުލެވޭނެ ގޮތް ވަނީ ހަދާފަ އެވެ.
މެލްޕާސް ވިދާޅުވީ އަފްގާނިސްތާނުގައި މިހާރު ވެސް އޮޕަރޭޓް ކުރަމުންދާ އިންޓަނޭޝަނަލް ކޮމިޓީ އޮފް ދަ ރެޑް ކްރޮސް އާއި އދ. ގެ އެޖެންސީތަކާ ބައްދަލުކުރި ކަމަށެވެ.
ބައިނަލްއަގްވާމީ މުޖުތަމައިން ތާލިބާން ސަރުކާރު ބަލައިގަނެފައި ނުވި ނަމަވެސް، އެމެރިކާ އިން ވަނީ އިންސާނީ އެހީ ފޯރުކޮށްދިނުމަށް ބައެއް ފިޔަވަޅުތަކަށް ލުއި ދީފަ އެވެ.
