އަންނަ އަހަރަށް ލަފާކޮށް ސަރުކާރުން ހުށަހަޅާފައިވާ 36.9 ބަޖެޓު 25 ބިލިއަން ރުފިޔާއަށް ކުޑަކޮށް އަލުން ހުށަހަޅަން އިދިކޮޅު ކޯލިޝަނުގެ ޕާލިމަންޓަރީ ގުރޫޕުގެ ލީޑަރު އަދި އޭދަފުށި ދާއިރާގެ މެމްބަރު އަހުމަދު ސަލީމް މިއަދު ގޮވާލައްވައިފި އެވެ.
އަންނަ އަހަރަށް ލަފާކުރާ ދައުލަތުގެ ބަޖެޓަށް ރައްޔިތުންގެ މަޖިލީހުގެ މިއަދުގެ ޖަލްސާގައި ކުރިއަށްދިޔަ ބަހުސްގައި ސަލީމް ވިދާޅުވީ މިއަހަރު ވެސް އިންތިހާއަށް ބޮޑު ޑެފިސިޓި ބަޖެޓެއް ހުށަހަޅާފައި ވާއިރު، އެކަމުގެ ސަބަބުން ޑޮލަރުގެ އަގު އުފުލިގެންދާނެ ކަމަށެވެ.
ޑޮލަރުގެ އަގާއެކު ތަކެތީގެ އަގު އުފުލުމުގެ ފުރުސަތު ބޮޑުކަމަށް އޭނާ ވިދާޅުވި އެވެ.
"އެހެންވީމާ ކުރިއަށް ދެވޭނީ ދައުލަތުގެ ދަރަނި އިންތިހާ އަށް ކުޑަކޮށްގެން. އަޅުގަނޑު ގޮވައިލަން ދައުލަތުގެ ބަޖެޓް 25 ބިލިއަނަށް ކުޑަކުރަން. ކުޑަކޮށްފައި އަލުން ބަޖެޓް މި މަޖިލީހަށް ގެނައުމަށް،" އެންމެ ފުޅާ ދާއިރާއެއްގައި ރީޓެއިލް ވިޔަފާރިކުރާ ރެޑްވޭވް ފިހާރަތަކުގެ ވެރިޔާ ސަލީމް ވިދާޅުވި އެވެ.
ކޮވިޑުގެ ބަލިމަޑުކަމާ ގުޅިގެން ދައުލަތުގެ ހަރަދުތައް ފޫބެއްދުމަށްޓަކައި ދަރަނި އިތުރަށް ނަގަން ޖެހުން ގަބޫލު ކުރެއްވި ނަމަވެސް، އެ ހާލަތު މިހާރު ގޮސްފައިވާއިރު، ވީހާވެސް ބޮޑަށް ދަރަނި ކުޑަ ބަޖެޓެއް ހުށަހަޅަންޖެހޭ ކަމަށް ސަލީމް ތަކުރާރުކޮށް ގޮވާލެއްވި އެވެ.
މިހާރު އޮތް ގޮތަށް ބަޖެޓު ފާސްކޮށްފިނަމަ، އަންނަ ރޯދަ މަހު ތަކެތީގެ އަގު ރައްޔިތުންނަށް އަތް ނުފޯރާ މިންވަރަށް އިތުރުވެގެން ހިނގައިދާނެކަމުގެ އިންޒާރު ވެސް އޭނާ ދެއްވި އެވެ.
މި އަހަރު ވެސް ބަޖެޓު ބަހުސް ރޭގަނޑު ޖަލްސާ ބާއްވައިގެން އަންނަ ބުދަ ދުވަހާ ހަމައަށް ކުރިއަށް ގެންދަން ނިންމާފައިވާއިރު، މިއަދު ވެސް ގިނަ މެމްބަރުން ވަނީ ބަޖެޓާ ގުޅޭ ގޮތުން ވާހަކަ ދައްކަވައިފަ އެވެ.
ސަރުކާރަށް ނިސްބަތްވާ އެމްޑީޕީގެ ގިނަ މެމްބަރުން ވަނީ ބަޖެޓަށް ތާއީދުކުރައްވާކަން ހާމަކުރައްވައި، މުޅި ރާއްޖޭގައި ތަރައްގީގެ މަޝްރޫއުތައް ހިންގަން ހިމަނާފައިވާކަން ފާހަގަކުރައްވައިފަ އެވެ.
ބަޖެޓު ދިރާސާ ކުރުމުގެ މަސައްކަތް މަޖިލީހުގެ ކޮމިޓީން ފަށާފައި ވާއިރު، ދިރާސާ ނިންމައި މި މަހުގެ 18 ގެ ކުރިން ރިޕޯޓް ރިޔާސަތަށް ފޮނުވަން ޖެހޭނެ އެވެ. ރިޕޯޓުގެ ބަހުސް މަރުހަލާގައި ކޮންމެ މެމްބަރަކަށް އިތުރު ހަތް މިނެޓުގެ ވަގުތެއް ދޭން ވެސް ވަނީ ނިންމައިފަ އެވެ.
މި މަހުގެ ނިޔަލަށް ބަޖެޓު ފާސްކުރަން މަޖިލީހުން ވަނީ އަމާޒު ހިފައިފަ އެވެ.
ބަޖެޓު 2022 ގެ ހުލާސާ
އަންނަ އަހަރަށް ލަފާކޮށް ސަރުކާރުން މަޖިލީހަށް ހުށަހަޅާފައިވަނީ 36.9 ބިލިއަން ރުފިޔާގެ ބަޖެޓެކެވެ. ބަޖެޓްގެ 24.8 ބިލިއަން ރުފިޔާ ރިކަރަންޓް ހަރަދުގެ ގޮތުގައި ހިމަނާފައިވާއިރު، ކެޕިޓަލް ހަރަދަށް ލަފާކޮށްފައިވަނީ 12.1 ބިލިއަން ރުފިޔާ އެވެ.
ފިނޭންސް މިނިސްޓްރީން ލަފާކުރާ ގޮތުގައި އަންނަ އަހަރު އާމްދަނީ އާއި ހިލޭ އެހީގެ ގޮތުގައި 24.3 ބިލިއަން ރުފިޔާ ލިބޭނެ ކަމަށް ލަފާކުރެ އެވެ.
އަންނަ އަހަރަށް ހުށަހަޅާފައިވަނީ 9.7 ބިލިއަން ރުފިޔާގެ ޑެފިސިޓް ބަޖެޓެކެވެ.
ނަމަވެސް، އޭގެ ތެރޭގައި ލޯނު އަނބުރާ ދެއްކުމުގެ ބައި ނުހިމެނޭތީ، ލޯނު އަނބުރާ ދެއްކުމަށް 2.9 ބިލިއަން ރުފިޔާގެ އިތުރުން އެހެނިހެން ކަންކަމަށް އިތުރު 805 މިލިއަން ރުފިޔާ ބޭނުންވާކަމަށް ވަނީ ލަފާކޮށްފަ އެވެ.
އެއާއެކު އަންނަ އަހަރުގެ ބަޖެޓު ފިނޭންސް ކުރުމަށްޓަކައި ޖުމްލަ 13.4 ބިލިއަން ރުފިޔާ ހޯދަންޖެހެ އެވެ. އެކަމަށް ބޭނުންވާ އަދަދުގެ 7.5 ބިލިއަން ރުފިޔާ ބޭރުގެ އެކި ފަރާތްތަކުން ހޯދަން ހިމަނާފައި ވާއިރު، ބާކީ ހަމަޖައްސަނީ އެތެރޭގެ ފަރާތްތަކަށް ބޮންޑާއި ޓީ ބިލު ފަދަ ސެކިއުރިޓީޒް ވިއްކައިގެންނެވެ.
