ސްޕްރީމް ކޯޓުގައި މިއަދު ތާވަލްކޮށްފައި އޮތް އަޑުއެހުމަށް ކުރީގެ ޓޫރިޒަމް މިނިސްޓަރު އަލީ ވަހީދު ހާޒިރުނުވާތީ ޝަރީއަތް ކުރިއަށް ނުގެންދެވިގެން އަޑުއެހުން ކެންސަލްކޮށްފި އެވެ.
މިއަދު އެ ކޯޓުގައި ކުރިއަށް ގެންދަން މަސައްކަތް ކުރީ ޖިންސީ ގޯނާގެ ދައުވާތަކެއް އުފުލާފައިވާ އަލީ ވަހީދުގެ ޝަރީއަތް އޮންލައިންކޮށް ކުރިއަށް ގެންދާ މައްސަލާގައި ޕްރޮސިކިއުޓާ ޖެނަރަލްގެ ފަރާތުން ހުށަހެޅި މައްސަލަ އެވެ.
މައްސަލާގެ އަޑުއެހުމެއް މިއަދު ހެނދުނަށް ތާވަލުކޮށް, އެ އަޑުއެހުމަށް ހާޒިރުވުމަށް އަލީ ވަހީދަށް އެންގި އެވެ. ނަމަވެސް, މިހާރު އިނގިރޭސިވިލާތުގައި އުޅޭ އަލީ ވަހީދު އަޑުއެހުމަށް ހާޒިރުވެފައެއް ނުވެ އެވެ.
ސްޕްރީމް ކޯޓުގެ މީޑީއާ އޮފިޝަލް "އަދަދު"އަށް ވިދާޅުވި ގޮތުގައި ދައުވާ ރައްދުވާ ފަރާތް އަޑުއެހުމަށް ހާޒިރުކުރެވިފައި ނުވާތީ އަޑުއެހުން ކެންސަލްކުރީ އެވެ. އަދި މި މައްސަލައިގެ އަޑުއެހުމެއް ދެން ތާވަލް ކުރާނެ ދުވަހެއް ފަނޑިޔާރު އަދި ނިންމަވާފައި ނުވާ ކަމަށް އޭނާ ވިދާޅުވި އެވެ.
މި މައްސަލަ ބައްލަވަނީ ފަނޑިޔާރު ހުސްނުއްސުއޫދު ރިޔާސަތުގައި އިންނަވައިގެން، ފަނޑިޔާރު އަލީ ރަޝީދު ހުސައިނާއި، ފަނޑިޔާރު ޑރ. މުހައްމަދު އިބްރާހީމްއާއެކު އެވެ.
މި މައްސަލާގެ ތެރެއިން ސުޕްރީމް ކޯޓުން މިހާތަނަށް ވަނީ ވަގުތީ އަމުރަކާއި އަލީ ވަހީދުގެ މައްޗަށް ޖަލު ހުކުމެއް އިއްވާފަ އެވެ.
އަލީ ވަހީދު ދެ މަހަށް ޖަލަށްލާން މި މައްސަލާގެ ތެރެއިން ސުޕްރީމް ކޯޓުން ހުކުމްކުރީ ޗިޓް ފޮނުވުމުން ވެސް އޭނާ ޝަރީއަތުގެ މަޖިލީހަށް ހާޒިރުނުވުމުން ކޯޓުގެ ހުރުމަތް ކެނޑުމުގެ އަމަލެއް ކަމަށް ކަނޑައެޅުމަށްފަހު އެވެ.
ވަގުތީ އަމުރު ނެރެފައިވަނީ އަލީ ވަހީދުގެ ޝަރީއަތް އޮންލައިންކޮށް ކުރިމިނަލް ކޯޓުގައި ކުރިއަށް ނުގެންދިޔުމަށެވެ. އެހެންވެ, އޭގެފަހުން ކުރިމިނަލް ކޯޓުގައި އަލީ ވަހީދުގެ މައްޗަށް ކުރެވޭ ޖިންސީ ގޯނާގެ ތުހުމަތުތަކާ ގުޅޭ ޝަރީއަތް ކުރިއަށް ނުދެ އެވެ.
އަލީ ވަހީދުގެ އޮންލައިން ޝަރީއަތުގެ މައްސަލަ ސުޕްރީމް ކޯޓަށް ޕްރޮސިކިއުޓާ ޖެނަރަލް ގެންދިޔައީ ކްރިމިނަލް ކޯޓުންނާއި ހައިކޯޓުން ހައްލެއް ނުލިބިގެންނެވެ.
އަލީ ވަހީދުގެ މައްސަލަ ކުރިމިނަލް ކޯޓުގައި އޮންލައިންކޮށް ކުރިއަށް ގެންދާތީ އެ މައްސަލަ ހައިކޯޓުގައި އިސްތިއުނާފުކުރުމުން އެއީ ހައިކޯޓުގައި ކުރިއަށް ގެންދެވޭނެ މައްސަލައެއް ނޫން ކަމަށް ނިންމާފައި ވެއެވެ.
ހައިކޯޓުން އެގޮތަށް ނިންމި ސަބަބެއްގެ ގޮތުގައި ބުނެފައިވަނީ ގާޒީ ހަސަން ސައީދުގެ ނިންމެވުމަކީ އިޖުރާއީ ނިންމުމަކަށްވާއިރު، އެފަދަ މައްސަލަތައް ދަށު ކޯޓުގައި ކުރިއަށް ދަނިކޮށް އިސްތިއުނާފު ނުކުރެވޭނެތީ އެވެ. ޝަރީއަތް ކުރިއަށް ދަނިކޮށް އިސްތިއުނާފު ކުރެވޭނީ ޝަރީއަތް ފެށުމުގެ ކުރިން ހުށަހަޅާ ހުށަހެޅުންތަކާ ގުޅޭ ނިންމުންތައް އެކަނިކަން ހައިކޯޓުގެ ނިންމެވުމުގައި ފާހަގަކޮށްފައި ވެއެވެ.
ލަންޑަނުގައި ހުންނަވައިގެން ކުރިމިނަލް ކޯޓުގައި ކުރިއަށްދާ ޝަރީއަތުގައި އަލީ ވަހީދަށް ބައިވެރިވެވޭނެ އިންތިޒާމު އެ ކޯޓުން ހަމަޖައްސައިދީފައިވަނީ އޭނާގެ ބޭސްފަރުވާގެ ކަންކަން ނުނިމޭ ކަމަށް ބުނެ އެވެ.
އަލީ ވަހީދު ކޯޓަށް ފޮނުވާފައިވަނީ އިނގިރޭސި ވިލާތުގެ ޝާލީ ވިލެޖްގެ އަމިއްލަ ހޮސްޕިޓަލެއް ކަމަށްވާ ޝާލީ އޯކްސް ހޮސްޕިޓަލުން ދޫކޮށްފައިވާ ލިޔުމެކެވެ.
އެ ލިޔުމުގައިވާ ގޮތުން މައިބަދައިގައި ރިއްސާތީ، އަލީ ވަހީދު ދެ ފަހަރެއްގެ މަތިން އެ ކްލިނިކަށް ދައްކާފައި ވެއެވެ. އަދި އެތަނުން އޭނާގެ އެމްއާރުއައި ވެސް ހަދާފައިވާ ކަމަށެވެ. އެ ލިއުމުން އެނގޭ ގޮތުގައި ބޭރަށް ވަޑައިގަތް ފަހުން އޭނާ މައިބަދައިގެ ސާޖަރީއެއް ކުރައްވައިފައެއް ނުވެ އެވެ. އަދި އެފަދަ ސާޖަރީއެއް ކުރަން އެ ލިއުމުގައި ޑޮކްޓަރުން ލަފާދެއްވައިފައެއް ވެސް ނުވެ އެވެ.
އަލީ ވަހީދަށް ޑޮކްޓަރުން ލަފާދެއްވީ ކަސްރަތުކުރުމަށާއި އެކަން މެދުނުކެނޑި ކުރިއަށް ގެންދެވުމަށެވެ.
އެކަމަކު ހަ މަސް ފަހުން އިތުރު ޓެސްޓްތަކަކާއި އެސެސްމެންޓްތަކެއް ކުރިއަށް ގެންދަން މިދިޔަ މާޗް މަހުގެ 25 ގައި ދޫކުރި އެ ލިއުމުގައި ޑޮކްޓަރުން ލަފާ ދީފައި ވެ އެވެ.
