ނިއު ދިއްލީ، އިންޑިއާ (ނޮވެމްބަރު 7) - އިންޑިއާގެ އިރުއުތުރުގައި ހުންނަ ބައެއް މިސްކިތްތަކަށް ހަމަލާ ދިން މައްސަލަ އަށް ފަހު ނަފުރަތު އުފައްދަން ސޯޝަލް މީޑިއާގައި ދޮގު ހަބަރު ފެތުރި 100 އަށް ވުރެ ގިނަ އެކައުންޓުގެ ވެރިފަރާތް ހައްޔަރު ކުރަން މަސައްކަތް ފަށައިފި އެވެ.
ޓްރިޕޫރާ ސްޓޭޓުގައި މިދިޔަ މަހު މިސްކިތްތަކަށް ހަމަލާ ދިނީ ހިންދޫ ގްރޫޕަކުން ބޭއްވި ބޮޑު އެއްވުމަކަށް ފަހު އެވެ. ބެލެވޭ ގޮތުގައި ހަމަލާ ދިނީ އަވައްޓެރި ބަންގްލަދޭޝްގައި ހިންދޫ މީހުންނަށް އަމާޒުކޮށް ހިންގި ހަމަލާތަކަށް ބަދަލު ހިފުމުގެ ގޮތުންނެވެ.
އެ ސްޓޭޓުގައި ހިންދޫ ގްރޫޕުން ވަނީ ހަތަރު މިސްކިތަކަށް ގެއްލުންދީ، މުސްލިމުންގެ ގެތަކާއި ވިޔަފާރިތަކަށް ވެސް ހަމަލާދީފަ އެވެ. ފުލުހުން ބުނީ އިތުރު ހަމަނުޖެހުމަށް ހިތްވަރު ދޭން ބޭނުންވާ ބައެއް މީހުން ސޯޝަލް މީޑިއާގައި ފޭކު ފޮޓޯ ދައުރުކޮށްފައިވާ ކަމަށެވެ.
"ފާހަގަ ކުރެވުނު އެކައުންޓުތަކުން ވަނީ ދޮގު ހަބަރާއި ސާބިތު ނުހިފޭ ވާހަކަ އަދި ފޭކު ވީޑިއޯ އާއި ފޮޓޯ ދައުރުކޮށްފައި. އެއީ ޓްރިޕޫރާގެ ހަމަނުޖެހުމާ ނުވެސް ގުޅޭ ކޮންޓެންޓުތަކެއް،" އެ ސްޓޭޓުގެ އިސް ފުލުހަކު ބުންޏެވެ.
އިންޑިއާގެ ނޫސްތަކުން ބުނީ ދޮގު ހަބަރު ފަތުރާ ޕޯސްޓުތައް ރިމޫވްކުރަން އެދި ފުލުހުން ފޭސްބުކް އާއި ޓްވިޓާ އަދި ޔޫޓިއުބަށް ލިޔުމުން ފޮނުވާފައިވާ ކަމަށެވެ. އޭގެ ތެރެއިން ގިނަ ޕޯސްޓުތަކެއް އާދީއްތަ ދުވަހު ވަނީ ނުފެންނަ ގޮތް ހަދާފަ އެވެ.
ސޯޝަލް މީޑިއާ ޕްލެޓްފޯމުތަކުން މިހާތަނަށް ރިމޫވް ނުކޮށް ހުރި ޕޯސްޓުތަކުގައި ގިނައިން ހުރީ މުސްލިމުންނަށް ހަމަލާދޭތީ ކަންބޮޑުވުން ފާޅުކޮށްފަ އެވެ.
މިދިޔަ މަހު ހިނގި ހަމަނުޖެހުމަށް ފަހު ޓްރިޕޫރާ ސްޓޭޓް އެލާޓަށް ގެނެސް، ފުލުހުން މިސްކިތްތައް ކައިރީގައި ސެކިއުރިޓީ ބަލަހައްޓަން ފެށި އެވެ. އަދި ހަތަރު މީހުންނަށް ވުރެ ގިނައިން އެކުގައި މަގުމަތީގައި އުޅުން މަނާކުރި އެވެ.
ޓްރިޕޫރާގެ ވެރިކަން ކުރާ ޕާޓީ އަކީ ބޮޑު ވަޒީރު ނަރެންދްރަ މޯދީގެ ބަރަތިޔަ ޖަނަތަ ޕާޓީ (ބީޖޭޕީ) އެވެ. ހިންދޫ ފިކުރުގެ އެ ޕާޓީ 2014 ވަނަ އަހަރު ވެރިކަމަށް އައުމާއެކު މުސްލިމުންނާއި ނަސާރާއިންނަށް ދޭ ހަމަލާތައް ވެސް އިންޑިއާގައި އިތުރުވި އެވެ.
