މަޑަގަސްކަރައިގެ 30،000 މީހުން ބަނޑަށް ޖެހިފައި ވަނީ މޫސުމީ ބަދަލާ ހެދި ކުރަމުންދާ އަސަރުތަކުގެ ސަބަބުން ކަމަށް އދ. އިން ބުނެފި އެވެ.
ދެކުނު އިރުމަތީ އެފްރިކާގެ އައްސޭރި ފަށާ ދިމާލުން އޮންނަ ޖަޒީރާ ގައުމެއް ކަމަށްވާ މަޑަގަސްކަރަ އަށް މިހާރު ކުރިމަތިވެފައި ވަނީ 40 އަހަރުގެ ތެރޭގައި އައި އެންމެ ހޫނުގަދަ ދުވަސްވަރެވެ.
އދ. ގެ ވޯލްޑް ފުޑް ޕްރޮގްރާމް (ޑަބްލިއުއެފްޕީ) އިން ބުނީ ރަސްމީ ހިސާބުތަކުން ދައްކާ ގޮތުގައި 27،800 އަށް ވުރެ ގިނަ މީހުން ބަނޑަށް ޖެހިފައިވާ ކަމަށާއި އިތުރު 1.3 މިލިއަން މީހުން އުޅެމުން ދަނީ ކާބޯތަކެތީގެ ސެކިއުރިޓީއާ ގުޅިފައިވާ އެމެޖެންސީއެއްގައި ކަމަށެވެ.
"މިއީ މޫސުމީ ބަދަލާ ހެދި ދުނިޔޭގެ ގައުމަކަށް ޖެހިފައިވާ ހަމައެކަނި ބަނޑުހައި ހޫނުކަން،" ޑަބްލިއުއެފްޕީގެ ޑެޕިއުޓީ ކަންޓްރީ ޑިރެކްޓަރު އާޑުއިނޯ މަންގޯނީ ނޫސްވެރިންނަށް ބުންޏެވެ.
މި ވަގުތު ބަނޑުހައި ހޫނުކަން ދިމާވެފައިވާ އެހެން ގައުމުތަކަކީ ޔަމަން، އިތިއޮޕިއާގެ ޓިގްރޭ ސަރަހައްދު އަދި ދެކުނު ސޫދާން އެވެ. ނަމަވެސް އެ ހުރިހާ ތަނަކަށް ވެސް އެހެން ދިމާވީ ހަނގުރާމަ އާއި ހަމަނުޖެހުމާ ހެދި އެވެ.
މަންގޯނީ ވިދާޅުވީ ދުނިޔެ ހޫނުވަމުންދާ ގޮތަށް ބަލާއިރު ކުރިއަށް އޮތް ތަނުގައި މޫސުމީ ބަދަލާ ހެދި ބަނޑުހައި ހޫނުކަން ދިމާވުމުގެ ޓްރެންޑެއް ފެށުމުގެ ފުރުސަތު އެބަ އޮތް ކަމަށެވެ.
"އެކަމުގެ ނިޝާންތައް ހުރިހާ ދިމާލަކުން ވެސް ދަނީ ފެންނަމުން."
އދ. އިން މަޑަގަސްކަރައިގެ ހާލަތާ ގުޅޭ ގޮތުން އެހެން ބުނެފައި ވާއިރު މޫސުމީ ބަދަލާ ގުޅޭ އދ. ގެ ބޮޑު ބައްދަލުވުން ކޮޕް26 ފަށައިގެން މިހާރު ދަނީ ކުރިއަށެވެ.
ޑަބްލިއުއެފްޕީން ބުނީ މަޑަގަސްކާ އަށް ބޭނުންވާ އެމެޖެންސީ އެހީ ފޯރުކޮށްދޭން ކުރިއަށް އޮތް ހަ މަސް ދުވަހަށް 69 މިލިއަން ޑޮލަރު ބޭނުންވާ ކަމަށެވެ.
މިހާރު ވެސް އެ ގައުމުގެ ބައި މިލިއަނެއްހާ ކުދިންނަށް މާ ބޮޑަށް ހިކިވެ އަނަރޫފަވުމުގެ މައްސަލަ ދިމާވެފައި ވާއިރު، 110،000 ކުދިން ތިބީ ސީރިއަސް ހާލުގައި މަރުގެ ތުންފަތް މަތީގަ އެވެ.
