ބަގްދާދް، އިރާގް (ނޮވެމްބަރު 7) - އިރާގުގެ ވެރިރަށް ބަގްދާދުގެ ސެކިއުރިޓީ ވަރުގަދަ ގްރީން ޒޯނުގައި ހުންނަ ބޮޑު ވަޒީރު މުސްތަފާ އަލް ކަދޭމީގެ ގެކޮޅަށް އަމާޒުކޮށް ޑްރޯން ހަމަލާއެއް ދީފި އެވެ.
"އަޅުގަނޑުގެ ހާލު ރަނގަޅު. ގައުމަށް ހެޔޮ އެދޭ ކަމަށް ވާ ނަމަ ހުރިހާ އެންމެން ވެސް ހަމަޖެހިގެން ތިބުމަށް އަޅުގަނޑު ގޮވާލަން،" ކަދޭމީ ކުރެއްވި ޓްވީޓެއްގައި ވިދާޅުވި އެވެ.
ބޮޑު ވަޒީރުގެ ގެކޮޅުގެ އިތުރުން އެމެރިކާގެ އެމްބަސީ ވެސް ހުންނަނީ ގްރީން ޒޯނުގަ އެވެ. އެ އެމްބަސީ އަކީ ވަރަށް ގިނައިން ރޮކެޓު ހަމަލާތައް އަމާޒުވާ އިމާރާތެކެވެ.
ބޮޑު ވަޒީރުގެ ގެކޮޅަށް ދިން ހަމަލާ އަށް ފަހު ގްރީން ޒޯނުގެ އެތެރެ އާއި ވަށައިގެންވާ ސަރަހައްދުގައި ގިނަ އަދަދެއްގެ ސިފައިން ދަނީ ހަރަކާތްތެރިވަމުންނެވެ.
ހަމަލާ އައިސްފައި މި ވަނީ އޮކްޓޯބަރު 10 ވަނަ ދުވަހު ބޭއްވި އިންތިހާބުގެ ނަތީޖާއާ މެދު ހިތްހަމަނުޖެހި ސިޔާސީ މަޝްރަހު ހަލަބޮލިވެފައިވާ ދަނޑިވަޅެއްގަ އެވެ.
ވަގުތީ ނަތީޖާ އިން ދެއްކި ގޮތުގައި އިރާނަށް ތާއީދު ކުރާ ފަތަހް އެލަޔަންސްގެ ގިނަ އަދަދެއްގެ މަޖިލިސް ގޮނޑިތައް އެ ކޯލިޝަނަށް ގެއްލުނެވެ. އެއާއެކު އެ މީހުން ބުނީ ވޯޓު އޮޅުވާލާފައިވާ ކަމަށެވެ.
އެ ގްރޫޕަށް ތާއީދު ކުރާ އެތައް ސަތޭކަ ބަޔަކު މިދިޔަ ހުކުރު ދުވަހު ގްރީން ޒޯން ކައިރީގައި ބޭއްވި އެއްވުމެއްގައި ފުލުހުންނާ ކުރިމަތިލުންތަކެއް ހިނގި އެވެ.
މުޒާހަރާގެ ތެރެއިން އަނިޔާވި އެކަކަށް ފަރުވާ ދެނިކޮށް މަރުވެފައި ވާއިރު، ފުލުހުންގެ ހަމަލާގައި އިތުރު ދެ މީހަކު މަރުވެފައިވާ ކަމަށް ރިޕޯޓުތައް ބުނެ އެވެ.
އިރާގުގެ ހެލްތު މިނިސްޓްރީން ބުނީ އަނިޔާވީ 125 މީހުންނަށް ކަމަށާއި އޭގެ ތެރޭގައި ގިނައިން ހިމެނެނީ ފުލުހުން ކަމަށެވެ.
ހޮނިހިރު ދުވަހު ވެސް އިރާނަށް ތާއީދު ކުރާ ގްރޫޕުތަކުން ގްރީން ޒޯން ކައިރީގައި މުޒާހަރާކޮށް، ބޮޑު ވަޒީރުގެ ފޮޓޯއެއްގައި ހުޅުޖެހި އެވެ.
