ކާބުލް، އަފްގާނިސްތާން (ނޮވެމްބަރު 6) - އަފްގާނިސްތާނުގެ އުތުރުގައި އޮންނަ މަޒަރީ ޝަރީފު ސިޓީގައި ހަތަރު އަންހެނުން މަރާލާފައިވާ ކަމަށް ތާލިބާން ސަރުކާރުގެ ތަރުޖަމާނަކު ބުނެފި އެވެ.
އޭގެ ތެރެއިން އެކަކަކީ އެކްޓިވިސްޓެކެވެ. އިންޓީރިއާ މިނިސްޓްރީގެ ތަރުޖަމާނު ގާރީ ސަޔިދު ހޮސްޓީ ބުނީ ހަތަރު އަންހެނުންގެ ހަށިގަނޑު ގެޔެއްގެ ތެރެއިން ފެނުމުން ތުހުމަތު ކުރެވޭ ދެ މީހަކު ހައްޔަރުކޮށްފައިވާ ކަމަށެވެ.
"ހައްޔަރު ކުރި މީހުން ވަނީ އަންހެނުންތައް އެ ގެޔަށް ދިޔެއީ އެ މީހުންގެ ދައުވަތަށް ކަމަށް ތަހުގީގުގައި އެއްބަސްވެފައި. އިތުރު ތަހުގީގުތައް ދަނީ ކުރިއަށް އަދި މައްސަލަ ވާނީ ކޯޓަށް ފޮނުވަން ތައްޔާރުކޮށްފައި،" އޭނާ ބުންޏެވެ.
މަރުވި މީހުންނަކީ ކޮން ބަޔެއްކަން އޭނާ ސާފުކޮށެއް ނުދެ އެވެ. ނަމަވެސް މަޒަރީ ޝަރީފުގެ ބައެއް މަސްދަރުތަކުން އޭއެފްޕީ އަށް ބުނީ އޭގެ ތެރޭގައި އަންހެނުންގެ ހައްގުތަކަށް މަސައްކަތް ކުރާ އެކްޓިވިސްޓު އަދި ޔުނިވާސިޓީ ލެކްޗަރާ ފްރޯޒަން ސާފީ ހިމެނޭ ކަމަށެވެ.
މަރާލާފައި އޮއްވާ ފެނުނު ހަތަރު އަންހެނުން ވެސް އެ ގެޔަށް ދިޔައީ އަފްގާނިސްތާން ދޫކޮށް ދާން ތައްޔާރަށް އޮތް ހާއްސަ ފްލައިޓެއްގެ ވާހަކަ ފޯނު ކޯލަކުން ބަޔަކު ކިޔައިދިނުމުން ކަމަށް އޭއެފްޕީއާ ވާހަކަދެއްކި މަސްދަރުތަކުން ބުންޏެވެ.
"އަހަރެން އޭގެ ތެރެއިން ފްރޯޒަން ސާފީ ދަންނަން. އޭނާ އަކީ މި ސިޓީގައި ވަރަށް މަޝްހޫރު އަންހެނުންގެ އެކްޓިވިސްޓެއް،" ބައިނަލްއަގްވާމީ ޖަމިއްޔާ އަކަށް މަސައްކަތް ކުރާ އަފްގާނިސްތާނުގެ އަންހެނަކު ބުންޏެވެ.
އޭނާ ބުނީ މީގެ ދުވަސްކޮޅެއް ކުރިން އޭނާ އަށް ވެސް އެފަދަ ފޯނު ކޯލެއް އައި ކަމަށާއި އިވެކުއޭޝަން ފްލައިޓެއް ތައްޔާރަށް އޮތް ކަމަށް އެ މީހުން ބުނި ކަމަށެވެ.
"އެ މީހުންނަށް އަހަރެންގެ ހުރިހާ މައުލޫމާތެއް އެނގޭ. އެ މީހުން ބުނީ އަހަރެންގެ ލިޔެކިޔުންތައް ފޮނުވަން. ދެން އެދުނީ އެއްޗެއްގައި ސޮއިކުރަން އަންނަން."
ނަމަވެސް އޭނާ ވަނީ ޝައްކު އުފެދިގެން އެ ނަންބަރު ބްލޮކްކޮށްފަ އެވެ. ހަތަރު އަންހެނުންގެ މަރުގެ ހަބަރު ލިބުމާއެކު ބިރުގަނެފައިވާ ކަމަށް އޭނާ ބުންޏެވެ.
ވިހި އަހަރަށް ފަހު މިދިޔަ އޯގަސްޓު މަހު އަފްގާނިސްތާނުގެ ގާނޫނީ ސަރުކާރު ވައްޓާލައިގެން ވެރިކަމަށް އައި ތާލިބާނުން ބުނެފައި ވަނީ އަންހެނުންގެ ހައްގުތަކަށް އިހްތިރާމް ކުރާނެ ކަމަށެވެ.
ނަމަވެސް މީގެ ކުރިން އެ މީހުން ވެރިކަން ކުރިއިރު އަންހެނުންގެ ހައްގުތައް ދީފައެއް ނުވެ އެވެ. އެހެންވެ، މި ފަހަރު ވެރިކަމަށް އައުމާއެކު ގިނަ އެކްޓިވިސްޓުން ވަނީ ގައުމު ދޫކޮށް ގޮސްފަ އެވެ.
ނަމަވެސް ފްލައިޓުތަކުގައި ނުފުރުނު ބައެއް އަންހެން މީހުން ވަނީ ހައްގުތަކަށް ޑިމާންޑުކޮށް މަގުމަތީގައި މުޒާހަރާކޮށްފަ އެވެ. އެއް ޑިމާންޑަކީ ހައި ސްކޫލް އަންހެން ކުދިންގެ ކިޔެވުން ފެށުމެވެ.
ތާލިބާނުން މުޒާހަރާތައް ރޫޅާލައި، އެއްވުން ރިޕޯޓު ކުރާ ނޫސްވެރިން ހައްޔަރު ކުރާނެ ކަމުގެ އިންޒާރު ދީފައި ވެ އެވެ. ނަމަވެސް ތާލިބާން ސަރުކާރުން ތަކުރާރުކޮށް ބުނެފައި ވަނީ އެކްޓިވިސްޓުން މެރުން މެމްބަރުންނަށް މަނާކޮށްފައިވާ ކަމަށާއި އެފަދަ ކަމެއް ކޮށްފި ނަމަ ހަރުކަށި އަދަބު ދޭނެ ކަމަށެވެ.
