ފްރީޓައުން، ސިއެރާ ލިއޯން (ނޮވެމްބަރު 6) - ސިއެރާ ލިއޯންގެ ވެރިރަށް ފްރީޓައުންގެ ޕެޓްރޯލް ސްޓޭޝަނެއްގައި ބާރުގަދަ ގޮވުމެއް ގޮވައި 92 މީހުން މަރުވެފައިވާ ކަމަށް އެ ގައުމުގެ ނައިބު ރައީސް ވިދާޅުވެއްޖެ އެވެ.
ނައިބު ރައީސް މުހައްމަދު ޖުލްދެހް ޖަލޮހް ވިދާޅުވީ އެ ހާދިސާގައި އަނިޔާވި އިތުރު 88 މީހަކަށް ހޮސްޕިޓަލްތަކުގައި ފަރުވާދެމުންދާ ކަމަށެވެ. އޭގެ ތެރެއިން ގިނަ މީހުން ވަނީ ވަރަށް ބޮޑަށް ފިހިފައި ކަމަށް ހާދިސާ ހިނގި ސަރަހައްދަށް އޮފިޝަލުންނާ އެކު ވަޑައިގެންނެވި ޖަލޮހް ވިދާޅުވި އެވެ.
މަންޒަރު ދުށް ފަރާތްތަކުން ބުނެފައި ވަނީ ބޮޑު ގޮވުމެއް ގޮވަން މެދުވެރިވީ އެކްސިޑެންޓެއްގައި ހިމެނުނު އުޅަނދެއް ޕެޓްރޯލް ސްޓޭޝަން ކައިރީގައި އޮއްވާ އޭގައި ހުޅު ހިފައިގެން ކަމަށެވެ. އެ ހުޅުގަނޑު ފެތުރި މަގުމަތީގައި ހުރި އެހެން ކާރުތަކާއި މީހުން އަނދަން ފެށި އެވެ.
މަރުވި ގިނަ މީހުންނަކީ މަގުމަތީގައި ތަކެތި ވިއްކަން އުޅުނު މީހުންނާއި ސައިކަލުތަކުގައި ތިބި މީހުންނެވެ. އޭގެ ތެރެއިން ގިނަ ބަޔަކު މަރުވީ އަލިފާންގަނޑު ފެތުރުނު ވަގުތު ސައިކަލަށް ޕެޓްރޯލް އަޅަން ކިޔު ހަދައިގެން ތިއްބަ އެވެ.
އެ ހާދިސާ އަށް ފަހު އެތައް ސަތޭކަ ބަޔަކު ހޮނިހިރު ދުވަހު ހެނދުނު ހާދިސާ ހިނގި ސަރަހައްދަށް ޖަމާވެ، ގެއްލިފައިވާ އާއިލާ މެމްބަރުން ފެނޭތޯ މަސައްކަތް ކުރި އެވެ.
ބައެއް ވީޑިއޯތަކުން ފެންނަނީ އަނދާ ހުލިވެފައި އޮތް ތެޔޮ ޓޭންކަރަކާއި ޓްރަކެއް ކައިރީގައި ގިނަ އަދަދެއްގެ އުޅަނދުތައް ފުނިޖެހިފައި ހުއްޓަ އެވެ. އޭގެ ތެރެއިން ބައެއް އުޅަނދުތަކުގެ ހުޅުގަނޑު ނުނިވި ހުރުމުން ދުން އަރާ މަންޒަރު ވެސް ފެނެ އެވެ.
ރައީސް ޖޫލިއަސް މާޑަ ކުރެއްވި ޓްވީޓެއްގައި ހިތާމަ ފާޅުކުރެއްވުމަށް ފަހު ވިދާޅުވީ މަރުވި މީހުންނާއި އަނިޔާވި މީހުންގެ އާއިލާތަކަށް އެހީވުމަށް ސަރުކާރުން މަސައްކަތް ކުރާނެ ކަމަށެވެ.
ދުނިޔޭގެ އެންމެ ފަގީރު ގައުމުތަކުގެ ތެރޭގައި ހިމެނޭ ސިއެރާ ލިއޯންގައި މީގެ ކުރިން ވެސް ޕެޓްރޯލް ޓޭންކަރުތައް ގޮވައި ނުރައްކާތެރި ހާދިސާތައް ހިނގާފައި ވެ އެވެ.
އެފްރިކާގެ އެހެން ހިސާބުތަކުގައި ވެސް މިފަދަ ހާދިސާތައް ހިނގަ އެވެ. އެގޮތުން 2009 ވަނަ އަހަރު ކެންޔާގެ ވެރިރަށް ނައިރޯބީގައި ޕެޓްރޯލް ޓޭންކަރެއް އެކްސިޑެންޓުވެ އެކޮޅުކޮޅުން ޖެހުމުން ހިނގި ގޮވުމެއްގައި 100 އަށް ވުރެ ގިނަ މީހުން މަރުވި އެވެ.
އޭގެ ފަހުން 2015 ވަނަ އަހަރު ދެކުނު ސޫދާނުގައި ހިނގި އެފަދަ ހާދިސާއެއްގައި 200 އަށް ވުރެ ގިނަ މީހުން މަރުވި އެވެ. އަދި 2019 ވަނަ އަހަރު ޓެންޒޭނިއާގައި ތެޔޮ ޓޭންކަރެއް ގޮވައި 100 މީހުން މަރުވި އެވެ.
