މުމްބާއީ، އިންޑިއާ (ނޮވެމްބަރު 6) - ހުޅަނގު އިންޑިއާގެ ހޮސްޕިޓަލެއްގައި ހޮނިހިރު ދުވަހު ރޯވެ ހިނގި ނުރައްކާތެރި އަލިފާނުގެ ހާދިސާއެއްގައި ކޮވިޑް ބައްޔަށް ފަރުވާ ކުރަމުން ދިޔަ 11 މީހަކު މަރުވެއްޖެ އެވެ.
މީގެ ކުރިން ވެސް އިންޑިއާގެ ކޮވިޑް ބަލި މީހުންނަށް ހާއްސަ ފެސިލިޓީތަކާއި ވޯޑުތަކުގައި ނުރައްކާތެރި އަލިފާނުގެ ހާދިސާތައް ހިނގާފައި ވެ އެވެ.
މަހަރާޝްތްރަ ސްޓޭޓުގެ އަހްމަދުނަގަރް ޑިސްޓްރިކްޓުގައި ހުންނަ ހޮސްޕިޓަލުގައި އަލިފާން ރޯވިއިރު، އެ ތަނުގެ އައިސީޔޫ ވޯޑުގައި ގާތްގަނޑަކަށް 30 މީހުން ތިއްބެވެ. އޭގެ ތެރެއިން މަރުވި ގިނަ މީހުންނަކީ އުމުރުން 60 އަހަރުން މަތީގެ މީހުންނެވެ.
އެ ހާދިސާގައި އައިސީޔޫ އެއްކޮށް އަނދާ ހުލިވެފައި ވާއިރު، އެ ތަނަކީ ކޮވިޑް ބަލި މީހުންނަށް ހާއްސަކޮށް ވަރަށް ފަހުން އިމާރާތް ކުރި ތަނެކެވެ.
މަހަރާޝްތްރަ ސްޓޭޓުގެ ޗީފް މިނިސްޓަރު އުދަވް ތަކެރާ ވަނީ އެ ހާދިސާ ހިނގަން މެދުވެރިވި ސަބަބު ހޯދަން ތަހުގީގަކަށް އަމުރު ކުރައްވާފަ އެވެ.
މިދިޔަ އޭޕްރިލް މަހު އިންޑިއާ އަށް ކުރިމަތިވި ކޮވިޑުގެ ރާޅުގައި ސިއްހީ ނިޒާމު ހުއްޓުމަކަށް އައެވެ. އެ ދުވަސްވަރު ބައެއް ހޮސްޕިޓަލުތަކުގައި އަލިފާނުގެ ހާދިސާތައް ވެސް ހިނގި އެވެ.
އެގޮތުން މޭ މަހު ގުޖަރާތު ސްޓޭޓުގެ ހޮސްޕިޓަލެއްގައި ރޯވެ ކޮވިޑް ބައްޔަށް ފަރުވާ ކުރަމުން ދިޔަ 16 މީހުންނާއި ދެ ނަރުހަކު މަރުވި އެވެ. ފުލުހުން ކުރި ތަހުގީގަށް ފަހު ބުނީ އަލިފާން ރޯވީ އައިސީޔޫ ވޯޑުގައި ކަރަންޓު މައްސަލައެއް ދިމާވެގެން ކަމަށެވެ.
އޭޕްރިލް މަހު މުމްބާއީގެ ކްލިނިކެއްގައި ރޯވެ ކޮވިޑް ބައްޔަށް ފަރުވާ ކުރަމުން ދިޔަ 13 މީހުން މަރުވި އެވެ. އޭގެ ދުވަސްކޮޅެއް ކުރިން ހަމަ އެ ސިޓީގެ ހޮސްޕިޓަލެއްގައި ރޯވެ 22 މީހުން މަރުވި އެވެ.
