މެންޗެސްޓާ (ނޮވެމްބަރު 6) - އިނގިރޭސި ޕްރިމިއާ ލީގުގައި އެންމެ ފަހުން އަމިއްލަ ދަނޑުގައި ކުޅުނު މެޗުން ވާދަވެރި ލިވަޕޫލް އަތުން ބަލިވި ހިތްދަތި މެޗަކީ މާޒީ ކަމަށާއި މިހާރު އަމާޒަކީ މިއަދު ހަވީރު އަމިއްލަ ދަނޑުގައި އަވައްޓެރި ކްލަބް، މެންޗެސްޓާ ސިޓީ ބަލިކުރަން ކަމަށް މެންޗެސްޓާ ޔުނައިޓެޑްގެ ކޯޗު އޮލެ ގުނަ ސޯލްޝެއާ ބުނެފި އެވެ.
އަމިއްލަ ދަނޑުގައި ޔުނައިޓެޑް އެންމެ ފަހުން ކުޅުނު މެޗުން ވަނީ ޒަމާންވީ ވާދަވެރިޔާ ލިވަޕޫލް އަތުން 5-0 އިން ބަލިވެފަ އެވެ. އޭގެ ފަހުން ޔުނައިޓެޑް ކުޅުނު ދެ މެޗު ވެސް ކުޅުނީ ރަށުންބޭރުގަ އެވެ. އެއީ ލީގުގައި ޓޮޓެންހަމް އަތުން 3-0 އިން މޮޅުވި މެޗާއި ޗެމްޕިއަންސް ލީގުގައި އެޓަލަންޓާއާ 2-2 އިން އެއްވަރުވި މެޗެވެ. ލިވަޕޫލް އަތުން ބަލިވި މެޗަށް ފަހު އަމިއްލަ ދަނޑުގައި ފުރަތަމަ ފަހަރަށް މިއަދު ޔުނައިޓެޑް ނުކުންނާނީ ސިޓީއާ ދެކޮޅަށެވެ.
"ތެދެއް ލިވަޕޫލްގެ އެ މެޗަކީ އަހަރަމެންގެ ތާރީހުން ފޮހެވޭނެ މެޗެއް ނޫން. އެކަމަކު، ބުނެވޭނީ އޭގެ ފަހުން މިވީ ދެ ހަފްތާއެއްހާ ދުވަސްތެރޭ އަހަރެމެންނަށް އެކަމުން އަރައިގަނެވިއްޖެއޭ. އެކަން ސާބިތުކޮށްދޭން ބަލާއިރު ސިޓީ މެޗުން މޮޅެއް ހޯދުން ވަރަށް މުހިއްމު،" މިއަދުގެ މެޗުގެ ކުރިން މީޑިއާ އަށް ދިން އިންޓަވިއުއެއްގައި ސޯލްޝެއާ ބުންޏެވެ.
އެންމެ ފަހުން ލީގުގައި ކުޅުނު ފަސް މެޗުން ޔުނައިޓެޑް މޮޅުވީ އެންމެ ފަހަރަކު އެވެ. އެގޮތަށް ރެކޯޑް އޮތް ކަމުގައި ވިޔަސް މިއަދު ސިޓީ އަތުން މޮޅުވެގެން އެ ޓީމާ ޕޮއިންޓުގެ ގޮތުން ހަމަކުރުމުގެ ފުރުސަތު ޔުނައިޓެޑަށް އޮތީ ހުޅުވިފަ އެވެ. ސޯލްޝެއާ ހުރީ މިއީ ހާލަތު ބަދަލުކޮށްލަން ބަލާއިރު، ލިބިފައި އޮތް ރަނުގެ ފުރުސަތެއްގެ ގޮތުގައި ދެކި ބޭނުންހިފަން އަޒުމުކަނޑައަޅައިގެންނެވެ.
"މިއީ ލޯކަލް ޑާބީއެއް. އަހަރެމެންނަށް އެނގޭ ކިހާ ކަމެއް މި މެޗުން ހާސިލް ކުރެވޭނެކަން. އެހެންވީމަ ކޮންމެ ގޮތެއް ހަދާފައިވިޔަސް މޮޅުވާން ބޭނުން،" ސޯލްޝެއާ ބުންޏެވެ.
މި މެޗާ ކުރިމަތިލާއިރު، ޔުނައިޓެޑަށް އޮތް ހިތްނުތަނަވަސް ކަމަކީ އަނިޔާގެ ސަބަބުން އެ ޓީމުގެ ފްރާންސް ޑިފެންޑަރު ރަފައެލް ވަރާން މަހެއްހާ ދުވަހަށް ކުޅުމާ ދުރަށް ދާން ޖެހުމެވެ. އެކަމަކު، ސޯލްޝެއާ އަށް ހިތްހަމަޖެހުމެއް ވެސް އެބައޮތެވެ. އެއީ އެ ޓީމުން އެންމެ ބޮޑަށް ބަރޯސާވާން ޖެހޭ ކްރިސްޓިއާނޯ ރޮނާލްޑޯ ހުރީ ވަރަށް ރަނގަޅު ފޯމެއްގައި ކަމަށްވާތީ އެވެ.
"އަހަންނަކަށް ނޭނގޭ އޭނަ (ރޮނާލްޑޯ)އާ ބެހޭގޮތުން މީހުން ދައްކާނެ ގޯސް ވާހަކައެއް އޮންނާނެ ކަމެއް. ޔަގީނުން ވެސް ރޮނާލްޑޯ އަކީ މި ޕްލެނެޓްގައި ފުޓްބޯޅަ ކުޅޭ އެންމެ މޮޅު އެއް ފުޓްބޯޅަ ކުޅުންތެރިޔާ،" ރޮނާލްޑޯ އަށް ތައުރީފުކުރަމުން ސޯލްޝެއާ ބުންޏެވެ.
އެންމެ ފަހުގެ މެޗުތަކަށް ބަލާއިރު، ސިޓީއާ ދެކޮޅަށް ލީގުގައި ޔުނައިޓެޑްގެ ރެކޯޑް ރަނގަޅެވެ. އެންމެ ފަހުން ލީގުގައި ސިޓީއާ ދެކޮޅަށް ކުޅުނު ހަތަރު މެޗުން ވެސް ޔުނައިޓެޑް ބަލިވެފައިނުވެ އެވެ. ސިޓީގެ ކޯޗު ޕެޕް ގާޑިއޯލާއާ ދެކޮޅަށް މިހާތަނަށް ސޯލްޝެއާ ނުކުތް އަށް މެޗުގެ ތެރެއިން ހަތަރު މެޗުން ވަނީ މޮޅުވެފަ އެވެ. އެކަމަކު، ސޯލްޝެއާ ވަނީ މިއީ އޭނާ އާއި ގާޑިއޯލާއާ ދެމެދު އޮތް ވާދަވެރިކަމެއްގެ ގޮތުުގައި ނުހަދަން އެދިފަ އެވެ.
ގާޑިއޯލާ ބުނީ މި ވަގުތުގެ ހާލަތަށް ބަލާއިރު، އެކި ގޮތްގޮތުން މި މެޗުގެ މުހިއްމުކަން ދެ ޓީމަށް ވެސް ބޮޑު ކަމަށެވެ. އެކަމަކު، މިއީ ލީގުގެ މަގާމެއް ކަނޑައެޅޭނެ މެޗަކަށް ނުވާއިރު، މާ ބޮޑަށް ފޯރި އަރުވައިގެން ދެ ޓީމަށް ޕްރެޝަރު ދީގެން މި މެޗުން ހާސިލްކުރެވޭނެ ކަމެއް ނެތް ކަމަށް ގާޑިއޯލާ ވަނީ ބުނެފަ އެވެ.
"އަހަރެން ބޭނުމީ ބޯ ހަމަޖައްސާލައިގެން މި މެޗާ ކުރިމަތިލާން. މާ ބޮޑަށް ފޯރިގަދަ ކޮށްލައިގެން އަންނަން ނުޖެހޭ ޕްރެޝަރެއް ގެންނަން ޖެހޭ ވަރުގެ މެޗެއް ނޫން މިއީ. އެއީ މިއީ ލީގެއް. އަހަރެމެން ގަބޫލުކުރަން ޖެހޭ މި މެޗުން މޮޅުވެގެން ޓްރޮފީއެއް ހޯދޭކަށް ނެތް. އެހެންވީމަ ރަނގަޅު ފުޓްބޯޅައެއް ކުޅެން ހަމަޖެހިލަން މާ ރަނގަޅުވާނެ،" ގާޑިއޯލާ ބުންޏެވެ.
ޔުނައިޓެޑާ ދެކޮޅަށް ނުކުންނައިރު، ސިޓީ އަށް ވަނީ ސަސްޕެންޝަނުގެ މައްސަލަ ކުރިމަތިވެފަ އެވެ. އެންމެ ފަހުން އަމިއްލަ ދަނޑުގައި ކްރިސްޓަލް ޕެލަސް އަތުން ބަލިވި މެޗުގައި ދެއްކި ރަތް ކާޑުގެ ސަބަބުން ސިޓީގެ ސްޕެއިން ޑިފެންޑަރު އައިމެރިކް ލަޕޯޓް ހުރީ ސަސްޕެންޝަނުގަ އެވެ.
ސިޓީއާ ދެކޮޅަށް ޔުނައިޓެޑުން އެ ޓީމުގެ ހޯމް ސްޓޭޑިއަމް، އޯލްޑް ޓްރެފޯޑްގައި މިއަދު ކުޅޭ މެޗު ފަށާނީ ރާއްޖެ ގަޑިން 17:30ގަ އެވެ.
