"މިނިވަންކަމުގެ ދިފާއުގައި ދިވެހިން"ގެ ނަމުގައި ޕީޕީއެމް, ޕީއެސްންސީ ހިމެނޭ، ޕްރޮގްރެސިވް ކޮންގްރެސް ކޯލިޝަނުން މާދަމާ ހަވީރު ބާއްވަން ނިންމި އިހްތިޖާޖް މޫސުން ގޯސްވެ ކެންސަލްކޮށްފި އެވެ.
އިދިކޮޅު މަގުމަތީ ހަރަކާތްތަކާ ބެހޭ ކޮމިޓީގެ މުގައްރިރު، މުހައްމަދު އިސްމާއިލް ވިދާޅުވީ މާދަމާގެ އެއްވުން އެހެން ދުވަހަކަށް ފަސްކޮށްފައިވާ ކަމަށެވެ. އެހެންނަމަވެސް އެ އެއްވުން ދެން ބާއްވާނެ ދުވަހެއް ވިދާޅެއް ނުވެ އެވެ.
އެ ކޯލިޝަންގެ ލީޑު ކަމަށްވާ ކުރީގެ ރައީސް އަބްދުﷲ ޔާމީން އަބްދުލްގައްޔޫމް މިނިވަން ކުރުމަށް ގޮވާލާ، އިދިކޮޅުން އަންނަނީ ސިލްސިލާ ގޮތެއްގައި މަގުމައްޗަށް އެއްވެ އެކި ނަންނަމުގައި އިހްތިޖާޖްތައް ކުރަމުންނެވެ. މީގެ ދެ ހަފްތާ ކުރިން "މިނިވަންކަމުގެ ދިފާއުގައި ދިވެހިން"ގެ ނަމުގައި ބޭއްވި ސުލްހަވެރި ހިނގާލުމެއްގައި ގިނަ އަދަދެއްގެ ސަޕޯޓަރުން ބައިވެރިވެރިވެސްވި އެވެ.
މާދަމާ ހަވީރު ބޭއްވުމަށް ރޭވި އިހްތިޖާޖަކީ ރާއްޖޭގެ މިނިވަންކަން ގެއްލުވާލުމަށް ސަރުކާރުން މަސައްކަތް ކުރަމުންދާ ކަމަށް ބުނެ، އެކަންކަމާ ދެކޮޅަށް އަޑު އުފުލަން ބާއްވާ އިޖުތިޖާޖެކެވެ.
