އަފްގާނިސްތާނުގެ ވެރިރަށް ކާބުލްގެ ހޮސްޕިޓަލަށް އިސްލާމިކް ސްޓޭޓް (އައިއެސް) އިން ދިން ހަމަލާއެއްގައި ތާލިބާނުންގެ އިސް ކޮމާންޑަރަކު މަރުވެއްޖެ އެވެ.
ވިހި އަހަރަށް ފަހު މިދިޔަ އޯގަސްޓު މަހު ގާނޫނީ ވެރިކަން ވައްޓާލުމަށް ފަހު ސަރުކާރެއް ހަދައިގެން އުޅޭ ތާލިބާނުންނަށް މިހާރު އޮތް އެންމެ ބޮޑު ނުރައްކަލަކީ ވާދަވެރި އައިއެސްގެ ހަމަލާތަކެވެ.
އަންގާރަ ދުވަހު ކާބުލްގައި ހުންނަ މައި އަސްކަރީ ހޮސްޕިޓަލަށް އައިއެސް އިން ދިން ހަމަލާގައި 19 މީހުން މަރުވި އެވެ. އޭގެ ތެރޭގައި ތާލިބާނުންގެ އިސް ކޮމާންޑަރަކު ހިމެނެ އެވެ.
ތާލިބާނުންގެ ތެރޭގައި ހިމެނޭ ހައްގާނީ ނެޓްވޯކު އަދި ބަދްރީ ކޯޕްސް ހާއްސަ ފައުޖުގެ މެމްބަރެއްގެ ގޮތުގައި ހިމެނޭ ހަމްދުﷲ މުހްލިސް އަކީ ތާލިބާނުން ވެރިކަމަށް އައި ފަހުން ހަމަލާއެއްގައި މަރުވި އެންމެ އިސް މީހާ އެވެ.
ސަރްދާރް ދާއޫދް ހާން ހޮސްޕިޓަލަށް ހަމަލާދޭކަމުގެ މައުލޫމާތު ލިބުމާއެކު މައުލާވީ ހަމްދުﷲ ވަގުތުން އެތަނަށް ދިޔަ،" ތާލިބާނުންގެ މީޑިއާ އޮފިޝަލް ބުންޏެވެ.
"އޭނާ ހުއްޓުވޭތޯ އަޅުގަނޑުމެން މަސައްކަތް ކުރިން. ނަމަވެސް އޭނާ ބޭނުންވި ގޮތަށް ޝާހިދުވެގެން ދިޔެއީ ހޮސްޕިޓަލް ތެރޭގައި ހަމަލާ ބަދަލުކުރަމުން."
އައިއެސް އިން އެންމެ ފުރަތަމަ ހަމަލާދިނީ ހޮސްޕިޓަލަށް ވަންނަ މައި ދޮރާށި ކައިރީގައި ޓެރަރިސްޓަކު އަމިއްލަ އަށް މަރުވެ ބޮމެއް ގޮއްވާލައިގެންނެވެ. އޭގެ ފަހުން ހަތިޔާރާ އެކު ގިނަ ޓެރަރިސްޓުންތަކެއް ހޮސްޕިޓަލުގެ އެތެރެ އަށް ވަދެގަތެވެ.
ހަމަލާ އަށް ރައްދު ދިނުމުގެ ގޮތުން ތާލިބާނުންގެ ހާއްސަ ފައުޖުގެ މެމްބަރުން ހޮސްޕިޓަލަށް ދިޔެއީ ހެލިކޮޕްޓަރެއްގަ އެވެ. އެމެރިކާ ސިފައިން އަފްގާނިސްތާނުން ފޭބިއިރު ދޫކޮށްލި ގިނަ ހަތިޔާރާއި ހެލިކޮޕްޓަރު އަދި އެހެނިހެން އުޅަނދު މިހާރު ހުރީ ތާލިބާނުންގެ އަތްދަށުގަ އެވެ.
ޓެލެގްރާމް ޗެނަލްތަކުގައި އާއްމުކުރި ބަޔާނެއްގައި އައިއެސް އިން ބުނީ ފަސް މީހުން ވެގެން އެއް ފަހަރާ ރާވައިގެން ހަމަލާ ދިން ކަމަށެވެ.
ތާލިބާނުންގެ ތަރުޖަމާނު ޒަބީހުﷲ މުޖާހިދު ބުނީ ހަމަލާގައި މަރުވީ 15 މީހުން ކަމަށެވެ. އަދި ތާލިބާން ހާއްސަ ފައުޖުގެ މެމްބަރުން ހަމަލާ ހުއްޓުވަން އަދާކުރި ދައުރަށް ތައުރީފް ކުރި އެވެ.
