ކުރިމިނަލް ކޯޓުގެ ގާޒީ ހަސަން ސައީދުގެ ސުލޫކީ އިތުރު މައްސަލައެއް ތަހުގީގު ކުރަން ޖުޑީޝަލް ސާވިސް ކޮމިޝަން (ޖޭއެސްސީ)އިން ނިންމައިފި އެވެ.
ގާޒީ ހަސަންގެ އާ މައްސަލައެއްގެ ގޮތުގައި ބަލަމުން ދަނީ ބަންދު މުރާޖައާކުރުމުގެ އަޑުއެހުމެއްގައި ޖިނާއީ އިޖުރާއަތުގެ ގާނޫނު އާއި ޝަރީއަތްކުރުމާއިބެހޭ ޖިނާއީ އިޖުރާއަތުގެ ގަވާއިދުގައިވާ އުސޫލުތަކާ ކަނޑައެޅިގެން ހިލާފަށް އަމަލުކުރި ކަމަށް ބުނާ މައްސަލައެކެވެ.
ޖޭއެސްސީން ބުނި ގޮތުގައި އެ މައްސަލަ ބަލަން މިއަދު ޖޭއެސްސީން ނިންމާފައިވާއިރު އެކަމަށް ތަހުގީގު ކޮމިޓީ ވެސް މިހާރު ވަނީ އެކުލަވާލާފަ އެވެ.
ނަމަވެސް, އެ މައްސަލާގެ ތަފްސީލެއް ޖޭއެސްސީން ހާމައެއް ނުކުރެ އެވެ.
ގާޒީ ހަސަން ސައީދު, ކުރިމިނަލް ކޯޓުގެ ގާޒީ ކަމަށް ބަދަލުކުރީ ވެސް ސުލޫކީ މައްސަލައެއް ސާބިތުވެ ފިޔަވަޅެއްގެ ގޮތުންނެވެ. ކުރިން އޭނާ ހުންނެވީ ފެމެލީ ކޯޓުގެ އިސްގާޒީގެ ގޮތުގަ އެވެ.
ޖޭއެސްސީއިން ގާޒީ ހަސަންއާ ގުޅޭ ސުލޫކީ މައްސަލައެއް އޭރު ބެލީ އެ ކޯޓުގެ މުވައްޒަފުންތަކެއް ހުށަހެޅި ޝަކުވާތަކަކާ ގުޅިގެންނެވެ. އެގޮތުން، މުވައްޒަފުންނަށް އޭނާގެ ފަރާތުން އެކި ކަހަލަ ފުރައްސާތަކާ ކުރިމަތިލާން ޖެހުނުކަން މުވައްޒަފުން ބުންޏެވެ.
އެ މައްސަލަ ސާބިތުވެ، ފިޔަވަޅެއްގެ ގޮތުން އޭނާގެ ކުރިމިނަލް ކޯޓުގެ ގާޒީއެއް ކަމަށް ބަދަލު ކުރި ނަމަވެސް، އެ މަގާމުގެ މުސާރަ ކުރިން ހުރި މަގާމަށްވުރެ ބޮޑުކަމުން ޖޭއެސްސީއަށް ފާޑުކިޔުން އަމާޒުވި އެވެ.
އޭނާ ފެމިލީ ކޯޓުގެ އިސް ގާޒީގެ މަގާމުގައި ހުރެ ކޯޓުގެ ފަރާތުން މުވައްޒަފުން ރާއްޖޭން ބޭރަށް ފޮނުވައިގެން ކައިވެންޏެއް ކޮށްދިން މައްސަލައެއް ވެސް ޖޭއެސްސީން މިހާރު ވެސް ދަނީ ބަލަމުންނެވެ.
އޭގެއިތުރުން ކުރިމިނަލް ކޯޓުގެ ގާޒީއަކަށް އައްޔަންވި ފަހުން އަމަލު ކުރެއްވި ގޮތްތަކާ ގުޅިގެން ވެސް އޭނާގެ މައްސަލަ ބައެއް ފަރާތްތަކުން ޖޭއެސްސީއަށް ހުށަހަޅާފައިވެ އެވެ. ގާޒީ ހަސަން ސައީދަކީ އޭނާގެ ބައެއް ނިންމުންތަކާހެދި ވަރަށް ބޮޑަށް ފާޑުކިޔުން އަމާޒުވެފައިވާ ގާޒީއެކެވެ.
އެގޮތުން, ކުރީގެ ޓޫރިޒަމް މިނިސްޓަރު އަލީ ވަހީދު ރާއްޖޭން ބޭރަށް ފުރުމުގެ ހުއްދަ, މީހަކު ޖާމިނުކޮށް ދިނުމުގެ މައްސަލާގައި ފާޑުކިޔުން އަމާޒުވި އެވެ. އަދި, މިފަހުން ސީލައިފް މައްސަލާގައި ދައުވާ ލިބޭ އަހުމަދު މޫސާ (އަންމަޓީ) ދޫކޮށްލި މައްސަލާގައި ވެސް ފާޑުކިޔުން އަމާޒުވި އެވެ.
